ဖန်ဆင်းခြင်း နှင့် ဖန်တီးခြင်း

ကမ္ဘာကြီးနှင့် လူသားများ ဖန်ဆင်းခြင်း

အဲ့ဒါဆိုရင် ဒီကမ္ဘာကြီးနဲ့ လူသားတွေကို ဘုရားသခင်ဖန်ဆင်းတယ်ဆိုတာကို ရိုးရိုးရှင်းရှင်း လေ့လာကြည့်ရအောင်။

Big Bang သီအိုရီအရ စကြဝဠာကြီးသည် အလွန်ပူပြင်း သိပ်သည်းတဲ့ အခြေအနေကြောင့် မဟာပေါက်ကွဲမှုဖြစ်ပေါ်ခါ ပြန့်ကားလာပြီးတဲ့နောက် တဖြည်းဖြည်းအေးခဲသွားပြီး အက်တမ်အမှုန်လေးတွေ ဒြပ်စင်တွေ ဒြပ်ဆွဲအားတွေ အစိုင်အခဲတွေ မျိုးစုံဖြစ်သွားပြီး အစိုင်အခဲတွေကနေ လေထု သမုဒ္ဒရာတွေ မြေကြီးတွေ ဖြစ်ပေါ်လာတယ်။ ဆဲလ်တွေကနေ သက်ရှိလေးတွေ ဖြစ်လာပြီး ဆင့်ကဲပြောင်းလဲလာပြီးနောက် ယခု ကျွန်ုပ်တို့ မြင်နေရတဲ့ သက်ရှိ သတ္တဝါတွေ လူသားတွေ ဖြစ်လာတယ်။ Big Bang ကို အသေးစိတ်သိချင်ရင်တော့ Google မှာ ရှာဖတ်ကြည့်ပါ။

ကျွန်ုပ်တို့ သာမာန်လူတစ်ယောက်အနေနဲ့ ရိုးရိုးလေး စဉ်းစားကြည့်ကြရအောင်။ အကယ်၍ ထို သီအိုရီအရ သက်ရှိတွေ လေထုတွေ သမုဒ္ဒရာတွေ ဖြစ်လာတယ်ဆိုရင် ဘာကြောင့် တခြားဂြိုလ်တွေပေါ်မှာ သက်ရှိတွေ လေထုတွေ သမုဒ္ဒရာတွေ မရှိတာလဲ။ စကြဝဠာကြီး ပူပြင်းကျယ်ပြန့်လာပြီး ဘာကြောင့် ဒီကျွန်ုပ်တို့နေထိုင်တဲ့ကမ္ဘာထဲမှာပဲ လေထုရေထု သက်ရှိ သစ်ပင် အားလုံးဖြစ်တည်နေတာလဲ။ သူ့အလိုလို ဖြစ်တည်တာပဲဖြစ်ဖြစ် Big Bang theory အရပဲဖြစ်ဖြစ် တခြားဂြိုလ်တွေပေါ်မှာ အနည်းဆုံး လေထုတို့၊ အောက်စီဂျင်၊ ကာဗွန်ဒိုင်အောက်ဆိုက်၊ နိုက်ထရိုဂျင်၊ ဟိုက်ဒရိုဂျင်စတဲ့ သက်ရှိဖြစ်ထွန်းဖို့ ဓာတ်ငွေ့တွေ ပါးပါးမျှင်မျှင်လေးရှိတယ်ဆိုရင်တောင် သစ်ပင်လေးတစ်ပင် သို့မဟုတ် မြက်ပင်လေးတစ်ပင်၊ ပိုးမွှားလေးတကောင်လောက်ပဲဖြစ်ဖြစ် ရှိသင့်တယ် မဟုတ်ဘူးလား။

ဘာကြောင့် ဒီ ကမ္ဘာဂြိုလ်ထဲမှာပဲ အသက်ရှင်နေထိုင်နိုင်တဲ့ လေထု ရေထု နှင့် သက်ရှိအားလုံး ရှိနေတာလဲ။ သိပ္ပံနှင့်နည်းပညာဖွံ့ဖြိုးလာတာနဲ့အမျှ သိပ္ပံပညာရှင်များဟာ အခြားဂြိုလ်များကို လေ့လာသုတေသနပြုလုပ်လာခဲ့ကြပါတယ်။ သိပ္ပံပညာရှင်များဟာ လပေါ်ကို စက်ရုပ်တွေနဲ့ လူတွေကိုပါ ပို့ဆောင်နိုင်ခဲ့ပြီး၊ အင်္ဂါဂြိုလ်သို့လည်း စက်ရုပ်များစေလွှတ်ပြီး လေ့လာခဲ့ကြပါတယ်။ အဲ့ဒီလို လေ့လာတွေ့ရှိချက်များအရ အခြားဂြိုလ်များတွင် ကျွန်ုပ်တို့ကမ္ဘာကဲ့သို့ အသက်ရှင်နေထိုင်ဖို့  လေထု ဖွဲ့စည်းပုံ၊ အပူချိန်၊ အလင်းနှင့်အရေအတွက်၊ ရေရရှိနိုင်မှုတို့လို သင့်တော်တဲ့ အခြေအနေများ စသည်တို့ မပြည့်စုံကြောင်း တွေ့ရှိရပါတယ်။

ကျွန်ုပ်တို့ ကမ္ဘာဂြိုလ်ဟာ နေမှအကွာအဝေး၊ ဂြိုလ်အရွယ်အစား၊ ဒြပ်ဆွဲအားတန်ဖိုးနဲ့ ၎င်းရဲ့ဝန်းကျင်ရှိ အခြားအကြောင်းအရာများ စုဆုံမိခြင်းကြောင့် သက်ရှိဖြစ်ထွန်းနိုင်ဖို့ အထူးသင့်တော်တဲ့ ဝန်းကျင်ရှိနေခြင်းဖြစ်ပါတယ်။ ဒီအချက်များအားလုံးဟာ ကျွန်ုပ်တို့ သက်ရှိလူသားတွေ ပေါ်ထွန်းလာနိုင်ရန်အတွက် အလွန်တိကျသော ကိန်းသေတန်ဖိုးသတ်မှတ်ချက်များဖြစ်ပြီး ဘုရားသခင်ရဲ့ အနုပညာလက်ရာ ဆန်သောဖန်ဆင်းခြင်းသက်သေတစ်ခုအဖြစ် ယုံကြည်သူများက မှတ်ယူကြပါတယ်။

ဒါ့အပြင် ထင်ရှားကျော်ကြားတဲ့ သိပ္ပံပညာရှင်ကြီး နယူတန် ရှာဖွေတွေ့ရှိထားတဲ့ လ ဟာ ကမ္ဘာပေါ်သို့ ကျမလာခြင်း၊ ဂြိုလ်များသည်လည်း နေထဲသို့ ဝင်မသွားဘဲ နေမင်းအား ဟန်ချက်ညီညီ လှည့်ပတ်နေခြင်း၏ အကြောင်းရင်းမှာ ဒြပ်ဆွဲအား (The Force of Gravity) ကြောင့်ဖြစ်တယ်ဆိုတာပါပဲ။ ဂြိုလ်များ တစ်ခုနှင့်တစ်ခု မထိခိုက်ဘဲ ဟန်ချက်ညီညီ လှည့်ပတ်နိုင်အောင် ဒြပ်ဆွဲအားဆိုသောအရာနဲ့ ထိန်းချုပ်ထားခြင်းကလည်း ဘုရားသခင်ရဲ့ ဖန်ဆင်းခြင်း အနုပညာလက်ရာတခုဖြစ်တယ်လို့ စာရေးသူ ရှုမြင်ပါတယ်။

ဥပမာမှာ လူတစ်ယောက်က ကွန်ပြူတာဆော့ဖ်ဝဲပရိုဂရမ်ကို ရေးသားထားပြီး တနေ့တာ လုပ်ငန်းလုပ်ငန်းစဉ်များကို သူ့အလိုလို အော်တို လည်ပတ်နေအောင် နောက်ကွယ်မှ ထိန်းချုပ်ထားတာမျိုးနဲ့ ဆင်တူနိုင်ပါမယ်။ လူကတော့ အလုံးစုံကို တိုက်ရိုက်ထိန်းချုပ်နေခြင်းမျိုးမဟုတ်ဘဲ စက်က လူရေးထားသည့် ညွှန်ကြားချက် (instruction) အတိုင်း အော်တိုလုပ်ဆောင်ပေးနေသော်လည်း ထို ပရိုဂရမ်အစီအစဉ်များကို စတင်ဖန်တီးရေးသားထားသူမှာ လူပဲ ဖြစ်ပါတယ်။

ထိုအရာများဟာ ဘုရားသခင်ရဲ့ ဖန်ဆင်းခြင်း အနုပညာ လက်ရာတွေပါပဲ။ ကျွန်ုပ်တို့ ဉာဏ်နဲ့ စဉ်းစားတွေးတောလို့ မရတဲ့ လှပလွန်းတဲ့ ဖန်ဆင်းခြင်းပါပဲ။ ဘုရားသခင်က စကြဝဠာအရာအားလုံး မြင်နိုင်ရာ မမြင်နိုင်ရာ များကိုဖန်ဆင်းတဲ့ ဘုရားသခင်ဖြစ်ပါတယ်။ သို့သော် ကျွန်ုပ်တို့ ယုံကြည်သူ ခရစ်ယာန်များသည် မည်သူ (Who) ဖန်ဆင်းထားသည်ကို သိရှိယုံကြည်နိုင်ပြီး ဘုရားသခင်က ဤစကြဝဠာကြီးကို မည်ကဲ့သို့ (How) အနုစိတ်ဖန်ဆင်းခဲ့သည်ဆိုသည်ကို ကျွန်ုပ်တို့ အလုံးစုံ မသိနားမလည်နိုင်သည်ကို ဝန်ခံရပါလိမ့်မယ်။