သခင်ဘုရားအတွက်ကျွန်တော်တို့ရဲ့ “အတွင်းစရိုက်လက္ခဏာ”ဟာ ကျွန်တော်တို့ရဲ့ “အပြင်ပိုင်းသွင်ပြင်လက္ခဏာ” ထက် ပိုအရေးကြီးပါတယ်။
ကိုရီးယား ပေါ့ပ်ဂီတဟာတကမ္ဘာလုံးကိုထိုးဖောက်အောင်မြင်မှုရရှိထားတယ်ဆိုတာအားလုံးသိကြပါတယ်။ ကြိုက်နှစ်သက်အားပေးတဲ့သူတွေဟာလည်းတကယ်ကို အရူးအမူးအားပေးကြတာတွေ့ရပါတယ်။ ဒီလိုအရူအမူးအားပေးကြတဲ့အထဲမှာ ကျွန်တော်တွေ့ဖူးသလောက်ပြောပြရရင် ဘရာဇီးနိုင်ငံသားလူငယ်တယောက်ကိုတော့လက်ဖျားခါလောက်အောင် အံ့ဩမိပါတယ်။ ဘာကြောင့်လဲဆိုတော့ သူကြိုက်နှစ်သက်တဲ့ ကေပေါ့ပ်အဆိုတော်ရဲ့ ပုံသဏ္ဍန်အတိုင်း နာရီပေါင်းများစွာ၊ ငွေကြေးပေါင်းမြောက်များစွာ အကုန်ကျခံပြီးခွဲစိတ်ပြုပြင်သည်အထိအားပေးကြမ်းလို့ပါပဲ။
ဆင်ခြင်မိတာကတော့ ရုပ်တော့တော်တော်တူသွားပေမယ့် သူတို့နှစ်ဦးရဲ့ဖြစ်ခြင်းကတော့ မတူဘူးဆိုတာပါဘဲ။ အထူးသဖြင့် အတွင်းစိတ်နှလုံးပေါ့။ နှလုံးရောဂါအတွက် အစားထိုးခွဲစိတ်လို့ရပေမယ့်၊ ကြင်နာတတ်၊ ချစ်တတ်၊ ရက်ရောပေးကမ်းတတ်တဲ့ နှလုံးသားဖြစ်ဖို့ကတော့ ခွဲစိတ်ဆရာဝန်တွေမတတ်နိုင်ပါ။
“ယဉ်ကျေးသောအရာသည် လှည့်စားခြင်းနှင့် ယှဉ်တတ်၏။ လှသောအဆင်းသည်လည်း အချည်းနှီးဖြစ်၏။ ထာဝရဘုရားကို ကြောက်ရွံ့သောမိန်းမမူကား၊ ချီးမွမ်းခြင်းကို ခံရလိမ့်မည်။”
သုတ္တံကျမ်း ၃၁:၃၀
ဒီခေတ်ဟာ အမျိုးသမီးတွေမှမဟုတ်ပါဘူး အမျိုးသားအများစုလည်း အလှအပခုံမင်လာတဲ့ခေတ်ကာလပါ။ ဒါကြောင့်ဒီနေရာမှာ အမျိုးသားရော အမျိုးသမီးကိုရော သတိခြပ်စေချင်သည်က “အပြင်ပိုင်းအလှ” ဆိုတာကွယ်ပျောက်တတ်ပါတယ်။ လှချင်လို့ခွဲစိတ်တဲ့သူရော၊ သဘာဝအတိုင်းလှတဲ့သူရော “ဇရာ”ကအချိန်တန်ရင် စကားပြောမှာဖြစ်သလို၊ ဘုရားပြောစကားကလည်း အချိန်တိုင်းမှာ ပြည့်စုံမှန်ကန်နေမှာပါ။
“လျှို့ဝှက်သော ကျမ်းပြုဆရာ၊ ဖာရိရှဲတို့၊ သင်တို့သည် အမင်္ဂလာရှိကြ၏။ အကြောင်းမူကား၊ အဖြူသုတ်သော သင်္ချိုင်းတွင်းနှင့် တူကြ၏။ ထိုတွင်းသည် အပြင်၌ တင့်တယ်စွတကား။ အတွင်း၌ကား လူသေအရိုး၊ အညစ်အကြေးအမျိုးမျိုးနှင့် ပြည့်လျက်ရှိ၏။-”
ရှင်မဿဲခရစ်ဝင် ၂၃:၂၇
“အပြင်ပိုင်းသွင်ပြင်လက္ခဏာ”ဟာလှည့်စားတတ်ပါတယ်။ ဒီနေရာမှာ လှတယ်မလှဘူးဆိုတာထက်။ ကြည့်ကောင်းတယ် ကြည့်မကောင်းဘူးဆိုတ ထက်။ သင်ခွဲစိတ်စရာမလို၊ ပြုပြင်စရာမလို၊ ဆေးသောက်စရာလို၊ ထိန်းသိမ်းဖို့မလိုဘဲ အလိုလိုလုပ်တတ်နေတာက “ဟန်ဆောင်ခြင်း”(hypocrisy)ပါဘဲ။ သင်ဟာသင်္ချိုင်းတွင်း ဖြစ်နေတာကိုသိလျက်နှင့် ဟန်ဆောင်နေတုန်းလား?။
အပြင်ဘယ်လောက်လှလှ လူသေထည့်ထားတဲ့ဂူဆိုတာ ဘယ်အသက်ရှင်တဲ့သူမှ ဝင်နေမှာမဟုတ်ပါဘူး။ မသိတဲ့သူဘဲခံရမှာပါ။
“ထာဝရဘုရားသည် လူမြင်သကဲ့သို့ မြင်တော်မူသည်မဟုတ်။ လူသည် အဆင်းသဏ္ဌာန်ကိုကြည့်ရှုတတ်၏။ ထာဝရဘုရားမူကား နှလုံးကိုကြည့်ရှုတတ်သည်ဟု ရှမွေလအားမိန့်တော်မူ၏။”
ဓမ္မရာဇဝင်ပထမစောင် ၁၆:၇
ကဲ… ထာဝရဘုရားနေ့စဉ်ရှုမြင်နေတဲ့အရာက ကျွန်တော်တို့ နေ့စဉ်ပြုပြင်နေတဲ့ အပြင်ပိုင်းသွင်ပြင်လက္ခဏာကိုမှမဟုတ်ဘဲ။ အဆင်းသဏ္ဏ္ဌန် အကျဉ်းတန်တာကကိစ္စမဟုတ်၊ နှလုံးသားက သူဖုန်းစားလိုမွဲပြာညစ်ညူးနေလျင်တော့ခက်လေပြီ။
ကျွန်တော်တို့ပြောနေကျကျမ်းစကားရှိပါတယ်။
“ငါတို့ဟာ ဘုရားသခင်ရဲ့ပုံသဏ္ဌာန်နဲ့အညီဖန်ဆင်းခံထားရတာ”။
ဟုတ်ပြီ ဒါဆိုရင် ဘာလို့အပြင်သဏ္ဌာန်ကိုစိုးရိမ်နေလဲ? ထိန်းသိမ်းဆင်ခြင်ရမယ့်အပိုင်းတော့ရှိတာပေါ့။ ဒီခန္ဒာဟာ သန့်ရှင်းသောဝိညာဉ်တော်ရဲ့ဗိမ္မာန်တော်ဖြစ်သလို၊ အဖိုးအခပေးရွေးဝယ်ထားသောကြောင့် ဤခန္ဒာအားဖြင့် ဘုရားသခင်ရဲ့ဂုဏ်တော်ကိုထင်ရှားစေဖို့လိုအပ်ပါတယ်။
ဒါဆိုရင် အတွင်းစရိုက်လက္ခဏာကြတော့ရော?
“ထိုလူကို သွန်သင်နိုင်မည်အကြောင်း အဘယ်သူသည် ထာဝရဘုရား၏ စိတ်တော်ကို သိသနည်း။ ငါတို့မူကား ခရစ်တော်၏စိတ်ကို ခံရကြ၏။”
ကောရိန္သုဩဝါဒစာပစာမစောင် ၂:၁၆
“ထိုကြောင့် ခရစ်တော်၌သက်သာခြင်း၊ မေတ္တာနှင့်စပ်ဆိုင်သော ချမ်းသာခြင်း၊ ဝိညာဉ်တော်နှင့် မိတ်သဟာယဖွဲ့ခြင်း၊ သနားစုံမက်ခြင်းတည်းဟူသောအရာ တစ်စုံတစ်ခုရှိလျှင်၊- သင်တို့သည် အချင်းချင်းချစ်ကြ၍၊ စိတ်မကွဲပြားဘဲ တစ်လုံးတစ်ဝတည်း ကြံစည်ခြင်းနှင့်တကွ၊ သဘောတညီတညွတ်တည်း ရှိသောအားဖြင့်၊ ငါဝမ်းမြောက်စရာအကြောင်းကို စုံလင်စေကြလော့။- ရန်တွေ့လိုသောစိတ်၊ အချည်းနှီး ကျော်စောကိတ္တိကို တပ်မက်သောစိတ်ရှိ၍ အဘယ်အမှုကို မပြုကြနှင့်။ သူတစ်ပါးသည် ကိုယ်ထက်သာ၍ ကောင်းမြတ်သည်ဟု နှိမ့်ချသော စိတ်ရှိ၍ တစ်ယောက်ကိုတစ်ယောက် ထင်မှတ်ကြလော့။- ကိုယ်အမှုအရာကိုသာ မရှုမမှတ်ဘဲ၊ သူ့အမှုအရာကို အချင်းချင်းရှုမှတ်ကြလော့။- ယေရှုခရစ်၌ရှိသော ထိုစိတ်သဘောကို သင်တို့၌လည်း ရှိစေကြလော့။-”
ဖိလိပ္ပိဩဝါဒစာ ၂:၁-၅
“သင်တို့သည် အထက်က လောကီတရားသို့လိုက်၍ အာကာသကောင်းကင်၏ တန်ခိုးကို အစိုးရသော မင်းတည်းဟူသော ငြင်းဆန်သော သူတို့၌ ပြုပြင်သော ဝိညာဉ်၏အလိုနှင့်အညီ၊ ဒုစရိုက်အပြစ်တို့၌ ကျင်လည်ကြ၍၊ ထိုဒုစရိုက်အပြစ်၌ သေလျက်ရှိနေသော သင်တို့ကိုပင် ဘုရားသခင်သည် အသက်ရှင်စေတော်မူပြီ။ ထိုငြင်းဆန်သော သူတို့နှင့်တကွ၊ ငါတို့ရှိသမျှသည် အထက်က ကိုယ်ကာယ၏အလိုသို့လည်းကောင်း၊ စိတ်၏ အလိုသို့လည်းကောင်း၊ လိုက်သဖြင့် ကာမဂုဏ်တို့၌ ကျင်လည်သည်ဖြစ်၍၊ ကြွင်းသောသူတို့ကဲ့သို့ပင် ပကတိအတိုင်း အမျက်တော်ကို ခံရသောသူဖြစ်ကြ၏။- သို့သော်လည်း ကရုဏာတော်နှင့် ကြွယ်ဝတော်မူသော ဘုရားသခင်သည် ငါတို့ကို ချစ်တော်မူသော မဟာမေတ္တာတော်အားဖြင့်၊- ဒုစရိုက်အပြစ်၌သေလျက်ရှိနေသော ငါတို့ကို ခရစ်တော်နှင့်အတူ အသက်ရှင်စေတော်မူပြီ။ ကျေးဇူးတော်ကြောင့်သာ ကယ်တင်ခြင်းသို့ ရောက်ရ၏။- ယေရှုခရစ်အားဖြင့် ငါတို့ကို ထမြောက်စေ၍ ကောင်းကင်အရပ်၌ နေရာပေးတော်မူပြီ။- အကြောင်းမူကား၊ ထိုသခင်အားဖြင့် ငါတို့၌ ကျေးဇူးပြု၍၊ ကျေးဇူးတော်၏ အလွန်ကြွယ်ဝခြင်းကို နောင်ကပ်ကာလတို့၌ ထင်ရှားစေမည်အကြောင်း ဖြစ်သတည်း။- ယုံကြည်သောအားဖြင့် ကျေးဇူးတော်ကြောင့် ကယ်တင်ခြင်းသို့ ရောက်ရ၏။ ကိုယ်အလိုအလျောက် ရောက်သည်မဟုတ်။ ဘုရားသခင် သနားတော်မူရာ ဖြစ်သတည်း။- ကိုယ်ကုသိုလ်ကြောင့် ကယ်တင်တော်မူခြင်းသို့ ရောက်သည်မဟုတ်။ သို့ဖြစ်၍ အဘယ်သူမျှ ဝါကြွားစရာ အခွင့်မရှိ။- အဘယ်ကြောင့်နည်းဟူမူကား၊ ငါတို့သည် ကောင်းသောအကျင့်တို့ကို ကျင့်ရမည်အကြောင်း၊ ယေရှုခရစ်၌ ပြုပြင်၍ ဖန်ဆင်းတော်မူရာ ဖြစ်ကြ၏။ ထိုကောင်းသော အကျင့်တို့၌ ငါတို့သည် ကျင်လည်ရမည် အကြောင်း၊ ဘုရားသခင်သည် ငါတို့ကို ပြင်ဆင်တော်မူနှင့်ပြီ။”
ဧဖက်ဩဝါဒစာ ၂:၁-၁၀
သခင်စိတ်နဲ့ဆရာကြီးလုပ်ဖို့မဟုတ်ဘူးနော်။
သခင့်ရဲ့စိတ်နဲ့ သခင့်ရဲ့သဘောကို ကျေးဇူးတော်အားဖြင့်လည်းကောင်း၊ သန့်ရှင်းသောဝိညာဉ်တော်အားဖြင့်လည်းကောင်း ရရှိသောကြောင့်
နှုတ်ကပတ်တော်အားဖြင့်နေ့စဉ် အတွင်းစရိုက်လက္ခဏာကို ပြင်ဆင်ကြရအောင်။
မေတ္တာဖြင့်
Thy Logos
-စာကြွင်း-
Stay Home ကာလခန္ဒာအချိုးအစားပြောင်းလဲတာကိစ္စမရှိဘူး၊ သခင့်အဖို့အလို့ငှါ၊ သခင့်၌ရှိသောဝိညာဉ်သဘောထား မပြောင်းလဲဖို့ကအရေးကြီးတယ်နော်။ 
