ခရစ်ယာန်တွေက ဘုရားသုံးဆူ (Three Gods) ကို ကိုးကွယ်ကြသလား?

သုံးပါးတဆူတည်းသော ထာဝရဘုရား – ခရစ်ယာန်ယုံကြည်မှု၏ အသည်းနှလုံး 

ခရစ်ယာန်ဘာသာ (Christianity) အကြောင်းကို Wikipedia မှာပဲ ရှာဖတ်ဖတ်၊ World Religion အကြောင်း အသေးစိတ်ရေးထားတဲ့စာအုပ်တွေမှာပဲ ရှာဖတ်ဖတ်၊ Encyclopedia မှာပဲ ရှာဖတ်ဖတ် ခရစ်ယာန်ဘာသာကို တဆူတည်းသော ထာဝရဘုရားကိုးကွယ်တဲ့ဘာသာတရား (Monotheism) အနေနဲ့သာ ဖော်ပြရေးသားထားကြတာကို အမြဲတွေ့ရမှာပါ။ ဘယ်တော့မှ ဘုရားသုံးဆူ (Tritheism) ကိုးကွယ်တဲ့အယူဝါဒ အဖြစ်သော်၎င်း၊ ဘုရားအများ (Polytheism) ကိုးကွယ်တဲ့အယူဝါဒအဖြစ်သော်၎င်း ဘယ်တော့မှ တွေ့ရမှာ မဟုတ်ပါဘူး။ ဒါကြောင့် ဂျူး၊ ခရစ်ယာန်၊ အစ္စလာမ် ဒီဘာသာကြီး ၃ ဘာသာကို “အဘအာဗြံဟံမှ ဆင်းသက်သော ဘာသာတရား” (Abrahamic Religions) ဆိုပြီး သမိုင်းပညာရှင်များက သတ်မှတ်ထားကြတာကို တွေ့ရမှာပါ။ “ဘုရားသုံးဆူကို ကိုးကွယ်ကြတာလား” ဆိုတဲ့ မေးခွန်းဟာ ကျွန်တော်တို့ ခရစ်ယာန်တွေ ရာစုနှစ်ပေါင်းများစွာ ကြားခဲ့ရတဲ့ မေးခွန်းပါ။ တကယ်တော့ ခရစ်ယာန်တွေက ဘုရားသုံးဆူကို ကိုးကွယ်တာ မဟုတ်ဘူး။ ဘုရားသခင်တဆူတည်းကိုပဲ ကိုးကွယ်ပါတယ်။  ဒါပေမယ့် ဒီဘုရားတဆူတည်းဟာ “ပုဂ္ဂိုလ်တော် သုံးပါး” (Three Persons) အနေနဲ့ နိစ္စထာဝရတည်ရှိတည်နေတော်မူပါတယ်။ ဒါက ဘာလဲ၊ ဘယ်လို ယုတ္တိကျနိုင်တာလဲ၊ သမ္မာကျမ်းစာနဲ့ သမိုင်းက ဘယ်လို သက်သေခံလဲဆိုတာကို ရှင်းလင်းပြတ်သားအောင် ရှင်းပြပါမယ်။

ပထမအပိုင်းအနေနဲ့ အခြေခံအယူအဆကို နားလည်အောင် ကြိုးစားကြည့်ရအောင်။

ခရစ်ယာန်တွေ ဘာပြောနေလဲ။ ခရစ်ယာန်အယူအဆက ရိုးရှင်းပါတယ်။

ဘုရားသခင်က တဆူတည်း ဖြစ်တော်မူတယ် (One God)
ဒါပေမယ့် ဒီတဆူတည်းသော ထာဝရဘုရားသခင်ဟာ ပုဂ္ဂိုလ်တော် သုံးပါး (Three Persons) အနေနဲ့ ထာဝရတည်ရှိတော်မူတယ်
ဒီပုဂ္ဂိုလ်တော်မြတ်သုံးပါးက “ခမည်းတော်၊ သားတော်နဲ့ သန့်ရှင်းသော ဝိညာဉ်တော်” အနေနဲ့ ထင်ရှားတော်မူတယ်
ဒီပုဂ္ဂိုလ်တော်မြတ်သုံးပါးက ဘုရားတဆူတည်းရဲ့ သုံးပုံခွဲ မဟုတ်ဘူး၊ သုံးဘုရား မဟုတ်ဘူး
ဒီပုဂ္ဂိုလ်တော်မြတ်သုံးပါးက ဘုရားသခင့်ဇာတိတော်တစ်ခုတည်းကို မျှဝေဆောင်ယူပြီး၊ ထာဝရစဉ် အတူတကွ တည်ရှိကြတယ်။ အဓိကက “ဘုရား” နဲ့ “ပုဂ္ဂိုလ်” ဆိုတဲ့ စကားလုံးကို အာရုံစိုက်ထားပေးပါ။
အများအားဖြင့် သုံးပါးတဆူ ထာဝရဘုရားနဲ့ပတ်သက်ပြီး လူတော်တော်များများ နားလည်မှုလွဲတတ်တာလေးတွေက

အထင်လွဲမှု (၁) အချက် – “ခရစ်ယာန်တွေက ဘုရားသုံးဆူ ကိုးကွယ်တယ်”

အမှန်က – ဘုရားတဆူတည်းကိုပဲ ကိုးကွယ်တယ်။ ဒါပေမယ့် ဒီတဆူတည်းသောဘုရားသခင်က ပုဂ္ဂိုလ်တော် သုံးပါးအနေနဲ့ ထာဝရတည်ရှိတော်မူတယ်။
အထင်လွဲမှု (၂) အချက် – “ဘုရားတပါးတည်းက သုံးပုံခွဲဖြစ်နေတာပေါ့”

အမှန်က – အဲ့လို မဟုတ်ပါဘူး။ သုံးပုံခွဲဆိုတာက တပိုင်းကို ယူလိုက်ရင် အပြည့်အစုံ မရနိုင်ဘူး။ ဒါပေမယ့် ပုဂ္ဂိုလ်တော် ၃ ပါးစလုံးက ဘုရားသခင့် ဇာတိတော် (Divine Nature) အပြည့်အစုံ ရှိကြတယ်။
အထင်လွဲမှု (၃) အချက် – “3 = 1 ဆိုတာ သင်္ချာအရ မဖြစ်နိုင်ဘူး၊ ကျိုးကြောင်းညီညွတ်မှုမရှိ၊ contradiction ဖြစ်တယ်”

အမှန်က – ခရစ်ယာန်တွေက 3 = 1 လို့ မပြောဘူး။ ပုဂ္ဂိုလ်တော်သုံးပါး (Three Persons) = တဆူတည်းသော ဘုရားသခင့်ဇာတိတော် (One Divine Nature) လို့ ပြောတာ။ ဒါက ကွဲပြားတဲ့ အမျိုးအစားနှစ်ခု (Different Categories) ဖြစ်လို့ contradiction မဟုတ်ဘူး။
ဒုတိယအပိုင်းအနေနဲ့ သင်္ချာ၊ သဘာဝတရားနဲ့ နားလည်အောင် ကြိုးစားကြည့်ရအောင်။

“How can 3 be 1?” ဆိုတဲ့ “ဘယ်လိုလုပ် ၃ က ၁ ဖြစ်နိုင်မှာလဲ” စတဲ့ မေးခွန်းဟာ တကယ်တော့ oversimplification လုပ်လွန်းတဲ့ မေးခွန်းမျိုးပါ။ မေးခွန်းမေးသူက ၁ တို့ ၃ တို့ ဆိုတာ သာမန်သင်္ချာနံပါတ်တွေသာ ဖြစ်တယ်လို့ ယူဆထားပုံရပါတယ်။ ဒါကြောင့် “How can 3 be 1?” လို မေးခွန်းမျိုးတွေမှာ ယုတ္တိပိုင်းအရ အားနည်းချက်လေးတွေရှိပါတယ်။ တကယ်တော့လေ သင်္ချာကိန်းဂဏန်းတစ်ခုရဲ့ အဓိပ္ပာယ်က ဂဏန်းနောက်က category (နောက်လိုက်နာမ်) အပေါ် မူတည်ပြီး လုံးလုံးကွဲပြားသွားပါလိမ့်မယ်။ ဒါကို သေချာနားလည်ဖို့ အရေးကြီးပါတယ်။ ဥပမာတချို့နဲ့ သိသာမြင်သာ နားလည်ရလွယ်အောင်နဲ့ ငြင်းမရနိုင်လောက်အောင် ယုတ္တိကျကြောင်း ကျွန်တော် ဥပမာ ၈ မျိုးလောက်နဲ့ ရှင်းပြချင်ပါတယ်။ 

ဥပမာ (၁) – “တစ်နိုင်ငံ” ဆိုပါစို့။

“၁ နိုင်ငံ” လို့ ပြောလိုက်ရင် “နိုင်ငံ” ဆိုတဲ့ category အရတော့ ၁ ပဲ
ဒါပေမယ့် ဒီ ၁ နိုင်ငံထဲမှာ လူသန်းပေါင်းများစွာ ရှိတယ်
နိုင်ငံ category မှာ ၁၊ လူပုဂ္ဂိုလ် category မှာ သန်းပေါင်းများစွာ
ဒါက contradiction မဟုတ်ဘူး၊ နိုင်ငံနဲ့ လူပုဂ္ဂိုလ်ဆိုတဲ့ category ကွဲလို့ပါ

ဥပမာ (၂) – “တစ်မိသားစု” ဆိုပါစို့။

“မိသားစု ၁ စု” ဆိုရင် မိသားစုဆိုတဲ့ category အရ ၁ စုပဲ
ဒါပေမယ့် မိသားစုဆိုတာ အနည်းဆုံး လူပုဂ္ဂိုလ် ၂ ယောက် (သို့) ပိုပြီး ရှိရတယ်
မိသားစု category မှာ ၁ ၊ ပုဂ္ဂိုလ် category မှာ ၁ မဟုတ်တော့ဘူး
ဒါက ပုံမှန်ပဲ၊ သဘာဝကျတယ်။

ဥပမာ (၃) – “တစ်ကုမ္ပဏီ” ဆိုပါစို့။

“ကုမ္ပဏီ ၁ ခု” က စီးပွားရေးလုပ်ငန်းအရ ၁ ခုပဲ
ဒါပေမယ့် အဲဒီကုမ္ပဏီမှာ ဒါရိုက်တာ၊ မန်နေဂျာ၊ ဝန်ထမ်း ရာချီ၊ ထောင်ချီ ရှိနိုင်တယ်
လုပ်ငန်းအဖွဲ့ category မှာ ၁၊ လူပုဂ္ဂိုလ် category မှာ ထောင်ချီ
ဂျီဩမေတြီ ဥပမာတချို့ ကြည့်ရအောင်။

ဥပမာ (၄) – တြိဂံ (Triangle)

တြိဂံတစ်ခုမှာ အနားသုံးနား မဖြစ်မနေ လိုအပ်တယ်
အနားနှစ်နားနဲ့ပဲ ရှိရင် တြိဂံ မဖြစ်နိုင်ဘူး၊ တြိဂံလို့ကို ခေါ်လို့ မရဘူး။
သုံးနားရှိမှ တြိဂံတစ်ခု ပြီးပြည့်စုံတယ်
ဒါက contradiction မဟုတ်ဘူး၊ ဒါက တြိဂံရဲ့ သဘောသဘာဝပဲ

ဥပမာ (၅) – ကုဗ (Cube)

အံစာတုံး နဲ့ကစားဖူးကြတယ်မလား။ အားလုံး ကလေးဘဝကနေပဲ ကြီးပြင်းလာကြတာပဲ
ကုဗတုံးဟာ သုံးဖက်မြင် ဂျီဩမေတြီပုံစံတစ်ခုဖြစ်ပြီး သူ့မှာ အလျား၊ အနံ၊ အမြင့် ရှိတယ်
မျက်နှာပြင် (Faces)  ၆ ခု ရှိပါတယ်။
အနား (Edges) ၁၂ ခု ရှိပါတယ်။ နှစ်ခုထိစပ်နေတဲ့မျက်နှာပြင်တွေရဲ့ ဘေးနားစပ်တွေပါ
ထောင့် (Vertices)  ၈ ခု ရှိပါတယ်။ သုံးခုထိစပ်နေတဲ့အနားတွေရဲ့ ထောင့်စပ်တွေပါ
ဒီလိုဝိသေသလက္ခဏာ ကွဲပြားပေမယ့် ကုဗ တစ်တုံးတည်းပဲ ဖြစ်တယ်
ဒီဂုဏ်သတ္တိတွေ မရှိရင် ကုဗတုံး မဖြစ်နိုင်ဘူး

ဥပမာ (၆) – အချိန်

အချိန်မှာ အတိတ်၊ ပစ္စုပ္ပန်၊ အနာဂတ် သုံးမျိုး ရှိတယ်
ဒါပေမယ့် အချိန်က တစ်ခုတည်းပဲ
အချိန် ဆိုတဲ့ အရာ တခုတည်းမှာပဲ သုံးမျိုးကို ခွဲခြားမရဘူး၊ ဒါပေမယ့် တူလားဆို မတူညီကြဘူး

ဥပမာ (၇) – ရေ (Water)

H₂O က ရေ၊ ရေခဲ၊ ရေငွေ့ ဖြစ်နိုင်တယ်
အဲ့ ၃ မျိုးစလုံးက H₂O ဆိုတဲ့ ရေ တမျိုးတည်းပဲ
ဒီဥပမာတွေက ထာဝရဘုရားရဲ့ အဖြစ်တော်ကို ရှင်းပြဖို့ ပြီးပြည့်စုံတဲ့ သက်သေခံချက် မဟုတ်ပေမယ့် အခြေခံအယူအဆကို နားလည်ဖို့ အထောက်အကူဖြစ်နိုင်လို့ လူနားလည်လွယ်မယ့် ဥပမာအနေနဲ့ ပေးထားတာပါ။ ထာဝရဘုရားက ဒီလိုပုံစံအတိုင်းဖြစ်တယ်လို့ မဆိုလိုဘူး။

ဥပမာ (၈) – သင်္ချာကိန်းဂဏန်း ၁ သုံးလုံး၏ အခြေအနေ၊ ဒါ အရေးကြီးတယ်။

၁ + ၁ + ၁ = ၃ (ပေါင်းလဒ်အရ ၃ ဖြစ်ပါတယ်) ဒါကိုပဲ တချို့က “တွေ့လား၊ ၁ သုံးလုံးပေါင်းရင် ၁ ဖြစ်သလား .. ဟားဟားဟား” ငေါ့လေ့ရှိပါတယ်။ ဟုတ်ကဲ့ .. ဆန္ဒမစောပါနဲ့ဦး။ ဆက်ကြည့်ရအောင်။

၁ × ၁ × ၁ = ၁ (၁ သုံးလုံးက မြှောက်လဒ်အရ ၁ ဖြစ်နေတုန်းပဲ)
၁ ÷ ၁ ÷ ၁ = ၁ (၁ သုံးလုံးက စားလဒ်အရ ၁ ဖြစ်နေတုန်းပဲ)
၁ ^ ၃ = ၁ ( ၁ ကို ၃ ထပ်တင်ရင်တောင်မှ ၁ ဖြစ်နေတုန်းပဲ)

“How can 3 be 1? ဖြစ်နိုင်မှာလဲ၊ ၁ သုံးလုံးပေါင်းရင် ၁ ဖြစ်လို့လားကွ” ဆိုတဲ့သူတွေကို ဒီမှာ ကျွန်တော် ဘာကို ပြချင်တာလဲ။ နံပါတ် ၁ ဆိုတဲ့ ရိုးရှင်းတဲ့ သင်္ချာကိန်းဂဏန်းလေး ၁ လုံးတောင်မှ အခြေအနေတမျိုးမှာ ၃ ဖြစ်နိုင်ပြီး အခြေအနေနောက်တမျိုးမှာ ၁ အနေနဲ့ ယုတ္တိကျစွာ ဆက်ရှိနေနိုင်သေးတာပဲ။ သင်နဲ့ကျွန်ုပ်ကိုးကွယ်တဲ့ ကြီးမြတ်တော်မူတဲ့ထာဝရဘုရားက ဘာလို့ ပုဂ္ဂိုလ်သုံးပါး ဘုရားတဆူ အနေနဲ့ မဖြစ်နိုင်ရမှာလဲ။ ဘုရားသခင်က သင့်ရဲ့ သင်္ချာကိန်းဂဏန်းထက်နိမ့်ကျလို့လား။ ထိုဘုရားရဲ့ဖြစ်အင်က ဂဏန်းသင်္ချာလောက် မစွမ်းလို့လား။ ဒါလေးကို စဉ်းစားစေချင်တာပါ။ ဒီဥပမာတွေက သုံးပါးတဆူထာဝရဘုရားရဲ့ နက်နဲဆန်းကြယ်မှု (The Mystery of the Holy Trinity) ကို အပြည့်အဝ ရှင်းပြနိုင်တာ မဟုတ်ဘူး။ ဘုရားသခင်ဟာ ကျွန်တော်တို့လို ဖန်ဆင်းခံ သတ္တဝါတွေထက် အတိုင်းအဆမရှိ သာ၍ ကြီးမြတ်သလို၊ ထိုအရှင်ရဲ့ သဘောသဘာဝတော်ကလည်း ကျွန်တော်တို့ရဲ့ ခံစားသိရှိမှု အတွေ့အကြုံတွေထက် ကျော်လွန်ပါတယ်။ ဒါပေမယ့် ဒီဥပမာတွေက “သုံးနဲ့တစ်” ဆိုတာ logic အရ ဆန့်ကျင်ဘက်မဟုတ်ဘူးဆိုတာ ပြသနိုင်ပါတယ်။ How can 3 be 1? ရဲ့ အဖြေကို ရပြီ ဟုတ်?

ကဲ ဒါဆို ဒီအတွေးအခေါ်၊ အယူအဆ၊​ ယုတ္တိတွေကို သုံးပါးတဆူဘုရားဇာတိတော်ကို လေ့လာဆည်ပူးတဲ့နေရာမှာ အသုံးချကြည့်လို်က်ရင် …

“Persons” (ပုဂ္ဂိုလ်တော်) category အရ ၃ ပါး
ခမည်းတော် ၁ ပါး
သားတော် ၁ ပါး
သန့်ရှင်းသောဝိညာဉ်တော် ၁ ပါး
“Divine Nature” (ဘုရားသခင့်ဇာတိတော်) category အရ ၁ ဆူတည်းပဲ
ဘုရားသခင့်ဇာတိတော် ၁ မျိုးတည်းကို ပုဂ္ဂိုလ်တော်သုံးပါးစလုံးက ထာဝရမျှဝေဆောင်ယူကြတယ်
အာဏာတန်ခိုးတော်၊ ဉာဏ်ပညာတော်၊ နိစ္စထာဝရတည်ရှိတည်နေမှု အားလုံးကို ထိုအရှင် သုံးပါးစလုံးက တူညီစွာ ပိုင်ဆိုင်ကြပါတယ်၊ ပုဂ္ဂိုလ်တပါးရဲ့ ဇာတိတော်က နောက်တပါးထက် မြတ်တယ်၊ ယုတ်တယ် ဆိုပြီး ထာဝရဘုရားမှာ မရှိဘူး။ ဥပမာဗျာ လူ့ဇာတိ (Human nature) မှာတောင်မှဗျာ … သင့်ရဲ့ အဖေက အိမ်မှာ သင့်ထက် ဝါကြီးပေမယ့် သင်ဟာ သင့်အဖေထက် rank နိမ့်လို့၊ ဝါနုလို့ဆိုပြီး လူ့ဇာတိကနေ တိရိစ္ဆာန်ဇာတိတမျိုးမျိုးကို ပြောင်းမသွားဘူး။ ထိုနည်း၎င်းပဲ သမ္မာကျမ်းစာထဲမှာ သားတော်က ခမည်းတော်ရဲ့ အလိုတော်ကို ဝန်ခံတာရှိမယ်၊ ဒါပေမယ့် အဲ့လို ဝန်ခံလို့ သားတော်ရဲ့ (Divine Nature) က ခမည်းတော်ရဲ့ (Divine Nature) ထက် နိမ့်မသွားဘူး။ Still same Nature ပဲ။
ဒါကြောင့်

ခရစ်ယာန်တွေက “၃ = ၁” လို့ မပြောဘူး
“ပုဂ္ဂိုလ်တော် ၃ ပါး = ဘုရားသခင့်ဇာတိတော် ၁ ဆူတည်း” (သုံးပါးတဆူ) Tri + Unity (Trinity) လို့ ပြောတာဖြစ်ပါတယ်ဗျ။
Category ကွဲလို့ contradiction မဖြစ်ဘူး အိုကေ?
ဒါကြောင့် “How can 3 be 1?” ဆိုတဲ့ မေးခွန်းက အဓိကအားနည်းချက်က category ကို မခွဲခြားတတ်တာပါ။ တကယ်တော့ နေ့စဉ်ဘဝမှာပင် ကျွန်တော်တို့က “၁” ဆိုတာကို အမျိုးမျိုးသော category တွေမှာ အဓိပ္ပာယ်ကွဲပြားစွာ သုံးနေကြပါတယ်။ မိသားစုတစုမှာ၊ အစုအဖွဲ့အနေနဲ့ ၁ ဖြစ်နေပေမယ့် ပုဂ္ဂိုလ်အနေနဲ့ များစွာရှိသလို၊ ထာဝရဘုရားသခင်လည်း ဘုရားသခင့်ဇာတိတော် ၁ ခုတည်းဖြစ်နေပေမယ့် ပုဂ္ဂိုလ်တော်အရ ၃ ပါး ရှိတယ်ဆိုတာ logic အပြည့်အဝ ကျပါတယ်ဗျာ။ ဟုတ်ပြီ .. ကျွန်တော်တို့ အခြေခံအယူအဆကို နားလည်လာပြီ။ How can 3 be 1 in what sense? ဆိုတာကိုလည်း သဘောပေါက်သွားပြီ။ ဒါဆို မပါမဖြစ် နောက်ထပ်သက်သေအထောက်အထားတခုကို တင်ပြဖို့အချိန်တန်ပြီ မဟုတ်လား။ တတိယပိုင်းကို ဆက်သွားရအောင်။

တတိယအပိုင်းအနေနဲ့ “သုံးပါးတဆူ” ထာဝရဘုရားနဲ့ ပတ်သက်လို့ ကျွန်တော်တို့မှာ သမ္မာကျမ်းစာ၊ ကျမ်းဂန်စာပေများအရ သက်သေခံချက် အထောက်အထား များစွာရှိထားနှင့်ပြီးဖြစ်ပါတယ်။

အရင်ဆုံး ရှေးပရောဖက်ပေါင်းများစွာကတဆင့် ထာဝရဘုရားသခင် ပေးသနားတော်မူတဲ့ ဓမ္မဟောင်းကျမ်းများက အရိပ်အမြွက်တွေကို ဆင်ခြင်ကြည့်ကြရအောင်။ ကျွန်တော် သုံးပါးတဆူ ငြင်းပယ်တဲ့သူကနေ သုံးပါးတဆူယုံကြည်တဲ့ ခရစ်ယာန် (Trinitarian) ဖြစ်သွားတာက ဓမ္မသစ်ကြောင့်ထက် ဓမ္မဟောင်းကျမ်းကြောင့်ဆိုရင် မအံ့ဩလိုက်ပါနဲ့။ 

ဓမ္မဟောင်းကျမ်းစာများ၌ တဆူတည်းသော ဘုရားသခင်ကို အလေးပေးပြောဆိုခြင်း

တရားဟောရာကျမ်း ၆:၄ – ၇ မှာ “အို​ဣ​သ​ရေ​လ​အ​မျိုး၊ နား​ထောင်​လော့။ ငါ​တို့၏ ဘု​ရား​သ​ခင်​ထာ​ဝ​ရ​ဘု​ရား​သည် တစ်​ဆူ​တည်း​သော ထာ​ဝ​ရ​ဘု​ရား​ဖြစ်​တော်​မူ၏။ သင်၏ ဘု​ရား​သ​ခင်​ထာ​ဝ​ရ​ဘု​ရား​ကို စိတ်၊ နှ​လုံး​အ​ကြွင်း​မဲ့၊ အ​စွမ်း​သ​တ္တိ​ရှိ​သ​မျှ​နှင့် ချစ်​လော့။ ယ​နေ့ ငါ​မှာ​ထား​သော​စ​ကား​ကို နှ​လုံး​သွင်း​ရ​မည်။ ထို​စ​ကား​ကို သင်၏​သား​သ​မီး​တို့​အား ကြိုး​စား၍​သွန်​သင်​ရ​မည်။ အိမ်၌​ထိုင်​လျက် နေ​သည်​ဖြစ်​စေ၊ ခ​ရီး၌​သွား​သည်​ဖြစ်​စေ၊ အိပ်​လျက်၊ ထ​လျက်​ရှိ​သည်​ဖြစ်​စေ၊ ထို​စ​ကား​ကို​ပြော​ရ​မည်”
ဒါက ခရစ်ယာန်တွေ ခြွင်းချက်မရှိ၊ အပြည့်အဝ ယုံကြည်သဘောတူ၊ အာမင်ထူးပါတယ် – ဘုရားသခင်က တဆူတည်းပါ။ အဲ့မှာ သုံးထားတဲ့ “တစ်ဆူတည်းသော” ဆိုတဲ့ စကားလုံးကို မူရင်း ဟီဘရူးစာလုံးမှာ “Echad” (אחד) လို့သုံးထားပါတယ်။ אחד ဆိုတာက စုစည်းထားတဲ့ တစ်ခုတည်း (composite unity) ဆိုတဲ့ အဓိပ္ပါယ်ရှိတဲ့စကားလုံးပါ၊ ပကတိ တစ်ခုတည်း (absolute unity – yachid) မဟုတ်ဘူး။ နောက်ပြီး ဘုရားသခင်က အာဒံနဲ့ဧဝကို ဖန်ဆင်းပြီးတဲ့နောက်မှာ “ထိုသူနှစ်ယောက်တို့သည် တသားတကိုယ်တည်း ဖြစ်ရလိမ့်မည်” မိန့်ထားတဲ့နေရာလေး မှတ်မိကြတယ်မလား။ အဲ့မှာ သုံးထားတဲ့ တသားတကိုယ်တည်း (one flesh) ဆိုတဲ့စကားလုံးက one က မူရင်းဟီဘရူးမှာလည်း “Echad” ဆိုတဲ့ אחד စကားလုံးကို သုံးထားတာ။ လူနှစ်ယောက်က one flesh ဖြစ်ရလိမ့်မယ်ဆိုတာကို ထာဝရဘုရားဟာ တဆူတည်းဖြစ်တော်မူတယ်ဆိုတဲ့ တရားဟောရာကျမ်း ၆ : ၄ אחד နဲ့ တူညီတဲ့ composite unity ONE ကိုပဲ​ သုံးထားတာ အံ့ဩဖို့မကောင်းဘူးလား။
ကိုယ်တိုင် ဒီ Bible Interlinear မှာ မူရင်းဟီဘရူးကို ကျမ်းညွှန်းအတိကျနဲ့ သွားတိုက်စစ်ကြည့်ပါ။ ကျွန်တော် မှားရင် မှားကြောင်း သက်သေပြနိုင်ပါတယ်။

Genesis 2 : 24 – [https://biblehub.com/interlinear/genesis/2.htm]

Deuteronomy 6 : 4 – [https://biblehub.com/interlinear/deuteronomy/6.htm]

 ဒီ ဟီဘရူး ( אחד ) စာလုံး ဟုတ်မဟုတ်  ကိုယ်တိုင်ရှာဖွေစစ်ဆေးကြည့်ပါ။

နောက်ပြီး ဓမ္မဟောင်းကျမ်းရဲ့ ပရောဖက်ကြီး မောရှေနဲ့ ဟေရှာယတို့ရဲ့တခြားကျမ်းဂန်တွေမှာ ဘုရားသခင်ရဲ့ အများကိန်းသဘောသဘာဝဆန်ဆန် (Plural) ပုံစံလေးတွေလည်း ပေါ်လာခြင်းဖြစ်ပါတယ်။ ဒါက ခုနက אחד (Echad) ရဲ့ Composite Unity သဘောသဘာဝရှိတဲ့ ONE နဲ့ ဘာမှ ဆန့်ကျင်မနေဘူး။

ကမ္ဘာဦး ၁:၂၆ – “‘ တစ်​ဖန်​ဘု​ရား​သ​ခင်​က၊ ငါ​တို့​ပုံ​သ​ဏ္ဌာန်​နှင့် တ​ညီတ​သ​ဏ္ဌာန်​တည်း လူ​ကို ဖန်​ဆင်း​ကြ​စို့။ …” (ဘုရားသခင်က မိမိကိုယ်ကို “ငါတို့” plural ပုံစံ သုံးထားတာကို တွေ့ရပါတယ်)
ကမ္ဘာဦး ၁:၁-၂ – “အ​စ​အ​ဦး​၌ ဘု​ရား​သ​ခင်​သည် ကောင်း​ကင်နှင့် မြေ​ကြီး​ကို​ဖန်​ဆင်း​တော်​မူ​၏။ မြေ​ကြီး​သည် အ​ဆင်း​သ​ဏ္ဌာန်​မ​ရှိ၊ လွတ်​လပ်​လ​ဟာ​ဖြစ်​၏။ နက်​နဲ​ရာ​အ​ရပ်​ကို မှောင်​မိုက်​ဖုံး​လွှမ်း​၍ ဘု​ရား​သ​ခင်​၏ ဝိ​ညာဉ်​တော်​သည် ရေ​မျက်​နှာ​ပြင်​ပေါ်​မှာ​လှုပ်​ရှား​တော်​မူ​၏”
ဟေရှာယ ၄၈:၁၆ – “ငါ့​ထံ​သို့ ချဉ်း​ကပ်၍ ဤ​စ​ကား​ကို နား​ထောင်​ကြ​လော့။ ရှေ့​ဦး​စွာ​မှ​စ၍ တိတ်​ဆိတ်​စွာ မ​ဟော။ အ​မှု​ဖြစ်​စ​ကာ​လ၌ ငါ​ရှိ၏။ ယ​ခု​တွင် အ​ရှင်​ထာ​ဝ​ရ​ဘု​ရား​နှင့် ဝိ​ညာဉ်​တော်​သည် ငါ့​ကို​စေ​လွှတ်​တော်​မူ၏”
ဓမ္မဟောင်းကျမ်းမှာ တွေ့ရတဲ့ တခြားကောင်းကင်တမန်တွေနဲ့ လုံးဝမတူတဲ့ ထာဝရဘုရား၏ ကောင်းကင်တမန် (Angel of the Lord) ဆိုတဲ့ Unique Character ရှိတဲ့ တမန်ကလည်း အတော်လေးကို စိတ်ဝင်စားဖို့ကောင်းပါတယ်။

ကမ္ဘာဦး ၁၆:၇-၁၃ – ထာဝရဘုရား၏ကောင်းကင်တမန် ပေါ်လာပြီး ထိုသူကို ဟာဂရက “ကိုယ်တော်သည် ငါ့ကို မြင်တော်မူသော ဘုရားသခင်” လို့ ခေါ်ခဲ့ပါတယ် (အခန်းငယ် ၇ ကနေ ၁၃ ပြန်လည် ဖတ်ရှုစေချင်ပါတယ်၊ စာရှည်မှာစိုးလို့ paraphrase လုပ်ပြီးပဲအတိုချုပ် ဖော်ပြထားပါတယ်။
တရားသူကြီးမှတ်စာမှာလည်း ၁၃:၂၁-၂၂  မာနော်က ‘ထာ​ဝ​ရ​ဘု​ရား၏​ကောင်း​ကင်​တ​မန်​သည်၊ မာ​နော်​လင်​မ​ယား​တို့​အား တစ်​ဖန်​မ​ပေါ်​လာ။ ထို​အ​ခါ မာ​နော်​သည် ထာ​ဝ​ရ​ဘု​ရား၏ ကောင်း​ကင်​တ​မန်​ဖြစ်​သည်​ကို သိ၏။ မာ​နော်​က​လည်း၊ ငါ​တို့​သည် ဘု​ရား​သ​ခင်​ကို မြင်​ပြီ”လို့ ပြောခဲ့ပါတယ်
ဒီအရာက ဘုရားသခင်ကိုယ်တော်တိုင်ရဲ့ သီးခြားပေါ်ထွန်းမှုကို ညွှန်ပြတယ်
ဆက်လက်ပြီး ဓမ္မသစ်ကျမ်းစာစောင်တွေကို လေ့လာရင် ခရစ်ဝင်ကျမ်းစာစောင်တွေမှာဆိုလည်း သခင်ယေရှု၏ ဗတ္တိဇံခံခြင်းအဖြစ်အပျက်မှာ သုံးပါးတဆူ ထင်ရှားပေါ်ထွန်းတော်မူခြင်းကို မှတ်တမ်းတင်ထားပါတယ်။ ရှင်မဿဲ ၃:၁၆-၁၇ မှာ “(သခင်)ယေ​ရှု​သည် ဗ​တ္တိ​ဇံ​ကို​ခံ​တော်​မူ​ပြီး​လျှင် ရေ​မှ​ပေါ်​ထ​စဉ်​တွင်၊ ကောင်း​ကင်​ဖွင့်​လှစ်​သ​ဖြင့်၊ ဘု​ရား​သ​ခင်၏ ဝိ​ညာဉ်​တော်​သည် ချိုး​ငှက်​ကဲ့​သို့ ဆင်း​သက်၍ ကိုယ်​တော်​အ​ပေါ်၌ နား​တော်​မူ​သည်​ကို မြင်​ရ၍၊ ဤ​သူ​ကား ငါ​နှစ်​သက်​မြတ်​နိုး​ရာ၊ ငါ၏​ချစ်​သား​ပေ​တည်း​ဟု ကောင်း​ကင်​က အ​သံ​တော်​ဖြစ်​လေ၏”

ဒီကျမ်းပိုဒ်မှာ

သားတော် ယေရှုသည် ဗတ္တိဇံခံယူနေတယ်
သန့်ရှင်းသောဝိညာဉ်တော် သည် ချိုးငှက်ကဲ့သို့ ဆင်းသက်နေတယ်
ခမည်းတော် သည် ကောင်းကင်က မိန့်မြွက်နေတယ်
ပုဂ္ဂိုလ်တော် ၃ ပါး တပြိုင်နက်တည်း ထင်ရှားပြတော်မူတယ်။ နောက်ပြီး သခင်ယေရှုဘုရားရဲ့ သွန်သင်ချက်တွေကို လေ့လာကြည့်ရင်လည်း ရှင်ယောဟန် ၁:၁-၃, ၁၄ မှာ “အ​စ​အ​ဦး​၌ နှုတ်​က​ပတ်​တော်​ရှိ၏။ နှုတ်​က​ပတ်​တော်​သည် ဘု​ရား​သ​ခင်​နှင့်​အ​တူ ရှိ၏။ နှုတ်​က​ပတ်​တော်​သည်​လည်း ဘု​ရား​သ​ခင်​ဖြစ်​တော်​မူ၏။- ထို​နှုတ်​က​ပတ်​တော်​သည် အ​စ​အ​ဦး၌ ဘု​ရား​သ​ခင်​နှင့်​အ​တူ ရှိ၏။- နှုတ်​က​ပတ်​တော်​သည် ခပ်​သိမ်း​သော​အ​ရာ​တို့​ကို ဖန်​ဆင်း​တော်​မူ၏။ ဖန်​ဆင်း​တော်​မူ​ခြင်း​နှင့် ကင်း​လွတ်​လျက်​ဖြစ်​သော​အ​ရာ တစ်​စုံ​တစ်​ခု​မျှ​မ​ရှိ။ … ‘နှုတ်​က​ပတ်​တော်​သည်​လည်း လူ​ဇာ​တိ​အ​ဖြစ်​ကို​ခံ​ယူ၍၊ ကျေး​ဇူး​တော်​နှင့်​လည်း​ကောင်း၊ သ​စ္စာ​တော်​နှင့်​လည်း​ကောင်း ပြည့်​စုံ​လျက် ငါ​တို့​တွင် တည်​နေ​တော်​မူ​သည်​ဖြစ်၍၊ ခ​မည်း​တော်၌ တစ်​ပါး​တည်း​သော​သား​တော်၏ ဘုန်း​ကဲ့​သို့ သူ၏​ဘုန်း​တော်​ကို ငါ​တို့​သည် မြင်​ရ​ကြ​ပြီ” ။

ရှင်ယောဟန် ၁၀:၃၀ မှာ သခင်ယေရှု မိန့်တော်မူခဲ့ရာမှာလည်း “ငါ​သည် ငါ့​ခ​မည်း​တော်​နှင့် တစ်​လုံး​တစ်​ဝ​တည်း​ဖြစ်​သည်” ဟူ၍ဖြစ်ပါတယ်။

ရှင်ယောဟန် ၁၄:၉-၁၀ မှာလည်း “(သခင်)ယေ​ရှု​က၊ ဖိ​လိ​ပ္ပု၊ ဤ​မျှ​ကာ​လ​ပတ်​လုံး ငါ​သည်​သင်​တို့​နှင့်​အ​တူ​ရှိ​ပြီး​မှ သင်​သည် ငါ့​ကို မ​သိ​သေး​သ​လော။ ငါ့​ကို​မြင်​သော​သူ​သည် ခ​မည်း​တော်​ကို​မြင်၏။ သို့​ဖြစ်​လျှင်၊ ခ​မည်း​တော်​ကို အ​ကျွန်ုပ်​တို့​အား ပြ​တော်​မူ​ပါ​ဟု သင်​သည်​အ​ဘယ်​သို့ ဆို​ရ​သ​နည်း … ငါ​သည် ခ​မည်း​တော်၌ ရှိ​သည်​ကို​လည်း​ကောင်း၊ ခ​မည်း​တော်​သည် ငါ၌​ရှိ​တော်​မူ​သည်​ကို​လည်း​ကောင်း မ​ယုံ​သ​လော” ဟု မိန့်ခဲ့ပါတယ်။

ရှင်ယောဟန် ၁၄:၁၆-၁၇, ၂၆ မှာ သန့်ရှင်းသောဝိညာဉ်တော် ကြွဆင်းလာမည့်အကြောင်းကိုလည်း သခင်မိန့်မှာခဲ့ပါတယ်။ “ခ​မည်း​တော်​သည် သ​မ္မာ​တ​ရား​ကို​ပြ​သော ဝိ​ညာဉ်​တော်​တည်း​ဟူ​သော တစ်​ပါး​သော​ဥ​ပ​ဇ္ဈာယ်​ဆ​ရာ​ကို သင်​တို့​နှင့်​အ​တူ အ​စဉ်​မ​ပြတ်​တည်​နေ​စေ​ခြင်း​ငှာ သင်​တို့​အား​ပေး​တော်​မူ​မည်။- ထို​ဝိ​ညာဉ်​တော်​ကို လော​ကီ​သား​တို့​သည် မ​သိ​မ​မြင်​သော​ကြောင့် မ​ခံ​မ​ယူ​နိုင်​ကြ။ ထို​ဝိ​ညာဉ်​တော်​သည် သင်​တို့​နှင့်​အ​တူ​တည်​နေ၍၊ သင်​တို့၌ ရှိ​တော်​မူ​သော​ကြောင့် သင်​တို့​သိ​ရ​ကြ၏။- ခ​မည်း​တော်​သည် ငါ့​အ​တွက်​ကြောင့် စေ​လွှတ်​တော်​မူ​သော ဥ​ပ​ဇ္ဈာယ်​ဆ​ရာ​တည်း​ဟူ​သော သန့်​ရှင်း​သော​ဝိ​ညာဉ်​တော်​သည် သင်​တို့​အား ခပ်​သိမ်း​သော​အ​ရာ​တို့​ကို ပြ​သ​သွန်​သင်​တော်​မူ၍၊ ငါ​ပြော​ခဲ့​သ​မျှ​သော စ​ကား​တို့​ကို မှတ်​မိ​သော​ဉာဏ်​ကို သင်​တို့​အား ပေး​တော်​မူ​မည်”

ရှင်မဿဲ ၂၈:၁၉ မှာ သခင်ယေရှုရဲ့ ထင်ရှားတဲ့ အဆိုအမိန့်တွေထဲက တခုဖြစ်တဲ့ မဟာ စေစားချက်ကြီး (Great Commission) မှာလည်း “သင်​တို့​သွား၍ လူ​မျိုး​တ​ကာ​တို့​ကို ငါ့​တ​ပည့် ဖြစ်​စေ​လျက်၊ ခ​မည်း​တော်၊ သား​တော်၊ သန့်​ရှင်း​သော​ဝိ​ညာဉ်​တော်၏​နာ​မ၌ ဗ​တ္တိ​ဇံ​ကို ပေး​ကြ​လော့” လို့ မိန့်ခဲ့ပါတယ်။  သတိပြုရမှာက နာမတော် (singular – တစ်ပါးတည်းသောနာမတော်)၊ ဒါပေမယ့် ပုဂ္ဂိုလ်တော် ၃ ပါး။ ဘာလို့ သခင်ယေရှုက အဲ့လို မိန့်ခဲ့တာလဲ၊ မထူးဆန်းပါဘူး။ ထာဝရဘုရားက သုံးပါးတဆူ ဖြစ်တော်မူတယ်ဆိုတာကို သခင် အထပ်ထပ် ဖွင့်ပြတော်မူပေးခဲ့ပြီးပြီလေ။

သခင်ယေရှုနောက်ပိုင်း တမန်တော်မြတ်ကြီးတွေခေတ်ကာလမှာလည်း ဩဝါဒစာစောင်တွေမှာဆိုရင်လည်း ဒီလိုတွေ တွေ့ရသေးတာပဲ။ တမန်တော်မြတ်ကြီး ရှင်ပေါလုရဲ့ ၂ ကော ၁၃:၁၄ မှာ ‘သ​ခင်​ယေ​ရှု​ခ​ရစ်၏ ကျေး​ဇူး​တော်​လည်း​ကောင်း၊ ဘု​ရား​သ​ခင်၏ မေ​တ္တာ​တော်​လည်း​ကောင်း၊ သန့်​ရှင်း​သော ဝိ​ညာဉ်​တော်၏ မိတ်​သ​ဟာ​ယ​တော်​လည်း​ကောင်း၊ သင်​တို့​အ​ပေါင်း၌ ရှိ​စေ​သ​တည်း။ အာ​မင်။ ကော​ရိ​န္သု​ဩ​ဝါ​ဒ​စာ​ဒု​တိ​ယ​စောင်​ပြီး၏။’ ဆိုပြီး သုံးပါးတဆူထာဝရဘုရား နာမတော်မြတ်၌ ကောင်းချီးမင်္ဂလာပေးလျက် ဩဝါဒစာစောင်ကို အဆုံးသတ်ထားပါတယ်။

တမန်တော်မြတ်ကြီး ရှင်ပေတရုရဲ့ ၁ ပေတရု ၁:၂ မှာလည်း “ယေ​ရှု​ခ​ရစ်၏​တ​မန်​တော် ငါ​ပေ​တ​ရု​သည်၊ နား​ထောင်​ခြင်း​ကျေး​ဇူး၊ ယေ​ရှု​ခ​ရစ်၏ အ​သွေး​တော်​နှင့် ဖျန်း​ခြင်း​ကျေး​ဇူး​ကို ခံ​ရ​မည်​အ​ကြောင်း၊ ဝိ​ညာဉ်​တော်​အား​ဖြင့် သန့်​ရှင်း​ခြင်း​သို့​ရောက်၍၊ ခ​မည်း​တော် ဘု​ရား​သ​ခင်၏ အ​နာ​ဂ​တံ​သ​ဉာဏ်​တော်​အ​တိုင်း ရွေး​ကောက်​တော်​မူ​သော သူ​တည်း​ဟူ​သော၊ ပု​န္တု​ပြည်၊ ဂ​လာ​တိ​ပြည်၊ က​ပ္ပ​ဒေါ​ကိ​ပြည်၊ အာ​ရှိ​ပြည်၊ ဗိ​သု​နိ​ပြည်၊ အ​ရပ်​ရပ်​တို့၌ ကွဲ​ပြား​သော ဧည့်​သည်​အာ​ဂ​န္တု​တို့​ကို ကြား​လိုက်​ပါ၏။ ကျေး​ဇူး​တော်​နှင့် ငြိမ်​သက်​ခြင်း​သည် သင်​တို့၌​များ​ပြား​ပါ​စေ​သော” ဆိုပြီး သုံးပါးတဆူ ထာဝရဘုရားနာမတော်၌ ဆုတောင်းမေတ္တာပို့သလျက် ကောင်းချီးမင်္ဂလာပေးခြင်းနဲ့ ဩဝါဒစာစောင်ကို အစချီထားတာကို တွေ့ရပါတယ်။ ဒါဆို သခင်ယေရှုဘုရားက ချစ်၍ ဘုရားရှင်ကိုယ်တိုင်က အသင်းတော်အာဏာတော်ကို အပ်နှင်းပေးခဲ့တဲ့ တမန်တော်ခေါင်းဆောင်ကြီး ရှင်ပေတရုရော၊ နောက်မှ တမန်တော်ဖြစ်လာပြီး ဓမ္မသစ်ကျမ်းစာစောင်ရဲ့ ဩဝါဒစာစောင်အများစုကို ရေးသားပြုစုခဲ့တဲ့ တမန်တော်မြတ်ကြီး ရှင်ပေါလုရော က တသမတ်တည်းသော ယုံကြည်ချက်တူကို ဝန်ခံသွန်သင်ခဲ့တာကို တွေ့ရပါတယ်။