“ကောင်းကင်တမန်ကလည်း၊ ကြောက်ရွံ့ခြင်း မရှိကြနှင့်။ လက်ဝါးကပ်တိုင်မှာသတ်သော ယေရှုကို သင်တို့ရှာကြသည်ကို ငါသိ၏။- ဤအရပ်၌ မရှိ။ မိန့်တော်မူသည်အတိုင်း ထမြောက်တော်မူပြီ။ လာကြ၊ သခင်လျောင်းတော်မူရာအရပ်ကို ကြည့်ကြလော့။-”
ရှင်မဿဲခရစ်ဝင် ၂၈:၅-၆
မင်္ဂလာရှိသော ရှင်ပြန်ထမြောက်တော်မူရာ အီစတာတနင်္ဂနွေနေ့လေးဖြစ်ပါစေကြောင်း ကျွန်တော်တို့ Thy Logos အဖွဲ့သားများမှ ဆုမွန်ကောင်းတောင်းပေးအပ်ပါတယ်။ မင်္ဂလာပါလို့ နှုတ်ဆက်သော်လည်း ယနေ့မှာ မြန်မာနိုင်ငံ၌ အမှန်တကယ်ရော မင်္ဂလာရှိတဲ့နေ့လေး ဖြစ်နိုင်ပါ့မလား ခင်ဗျာ။ ယနေ့ အီစတာရက်မြတ်မှာလည်း မြန်မာပြည်သူတွေ ဘယ်နှယောက်လောက် အသက်ထပ်ပြီး စတေးရဦးမလဲ? 😔
လက်ရှိမြန်မာနိုင်ငံမှာ ဖြစ်ပျက်နေသော အနိဌာရုံများကြောင့် ကျွန်တော်တို့ ယုံကြည်ခြင်းများသိပ်အားနည်းသွားပြီလား?😔
မိတ်ဆွေတို့ကို သမိုင်းဖြစ်ရပ်မှန်လေးတခုအကြောင်း ဝေမျှချင်ပါတယ်။ ဒီဖြစ်ရပ်မှာ သဘာဝလွန်ဖြစ်ရပ်တခု ပါဝင်နေလို့ လူအချို့ကတော့ ဒါကို သမိုင်းမှတ်တမ်းလို့တောင် မသတ်မှတ်ဘဲ ဒဏ္ဍာရီပဲဖြစ်မှာပါလို့ ထင်မှတ်ပြောဆိုကြတယ်။ ဒါပေမယ့်လည်း သဘာဝလွန်ဖြစ်ရပ်ပါဝင်တိုင်း သမိုင်းဖြစ်ရပ်မှန်မဟုတ်ဘူးလို့ ကောက်ချက်ချတာကတော့ ကျိုးကြောင်းညီညွတ်မယ် မထင်ပါ။ ယခုဆောင်းပါးက သခင်ဘုရားရဲ့ ရှင်ပြန်ထမြောက်ခြင်းသည် သမိုင်းဖြစ်ရပ်မှန် ဟုတ်၊ မဟုတ် သက်သေပြလျက်ရှင်းပြပေးမည့် စာတမ်းမျိုး မဟုတ်တဲ့အတွက် ဒီနေရာမှာ သမိုင်းအထောက်အထားအချက်အလက်များ ပါဝင်မည် မဟုတ်ပါ။ ဒါပေမယ့် လူသားတိုင်းအတွက် အရေးကြီးတဲ့ သတင်းစကားလေးတွေတော့ ပါဝင်မှာဖြစ်ပါတယ်။
လွန်ခဲ့တဲ့ နှစ်ပေါင်း ၂၀၀၀ က သခင်ယေရှုခရစ်တော်ဘုရားဟာ သင်နဲ့ ကျွန်ုပ်ရဲ့ အပြစ်အတွက် ကားတိုင်ထက်တွင် သက်စွန့်အသေခံတော်မူခဲ့ရှာပါတယ်။ အဲ့ဒီနောက်မှာတော့ သင်္ဂြိုလ်ခြင်းခံရကာ ၃ ရက်မြောက်သောနေ့၌ သေခြင်းကနေ ရှင်ပြန်ထမြောက်ခဲ့ပါတယ်။ အဲ့ဒီရှင်ပြန်ထမြောက်တော်မူရာနေ့လေးကို “ရှင်ပြန်ထမြောက်တော်မူရာ တနင်္ဂနွေနေ့” (Easter Sunday) ဆိုပြီး အောက်မေ့သတိရလျက် ခေါ်ဝေါ်သမုတ်ခဲ့ကြပြီး ယနေ့လို သန့်ရှင်းသော ပွဲတော်ရက်မြတ်အဖြစ် ဆင်ယင်ကျင်းပကြတာဖြစ်ပါတယ်။ သခင်ယေရှုရဲ့ သေခြင်းမှရှင်ပြန်ထမြောက်ခြင်းသမိုင်းဖြစ်ရပ်မှန်အတွက် မျက်မြင်သက်သေများစွာရှိခဲ့ပါတယ်။ အဲ့ဒီထဲမှာ သခင်ယေရှုရဲ့ တပည့်တော်ရင်းခြာတွေပါဝင်သလို အခြားသော တပည့်တော် ငါးရာမက တပြိုင်နက်တည်း မြင်တွေ့ခဲ့ရတယ်လို့ မှတ်တမ်းတင်ထားခဲ့ပါတယ်( ၁ ကော ၁၅ : ၆)
နောက်ထူးဆန်းတာက တချိန်တုန်းက ခရစ်ယာန်တွေကို ဖမ်းဆီးညှင်းပန်းနှိပ်ဆက်ခဲ့ဖူးတဲ့ ဖာရိရှဲတဖြစ်လဲ ခရစ်တော်ဘုရားကို ယုံကြည်သက်ဝင်သူဖြစ်လာခဲ့တဲ့ တမန်တော်ရှင်ပေါလုပင်လျှင် ဒီဖြစ်ရပ်ရဲ့ မျက်မြင်သက်သေတပါးပဲဖြစ်ပါတယ်။ အဲ့ထက်ပိုတာက သူ ရုတ်တရက်ခရစ်ယာန်ဖြစ်လာခဲ့ရတဲ့ အဓိကအကြောင်းရင်းက ရှင်ပြန်ထမြောက်တော်မူတဲ့ သခင်ယေရှုကို ဖူးတွေ့ခဲ့ရလို့ဆိုတဲ့ အချက်ပါပဲ။ နောက်ပြီး ယနေ့ခရစ်ယာန်ဘာသာရယ်လို့ ဖြစ်တည်လာရခြင်းရဲ့ အဓိက အကြောင်းပြချက်ကလည်း ရှင်ပြန်ထမြောက်ခြင်းနေ့ကြောင့်ပါပဲ။��သခင်ယေရှုသာ သေခြင်းမှ အမှန်တကယ်ရှင်ပြန်ထမြောက်တော်မမူခဲ့ဘူးဆိုရင် ခရစ်ယာန်အသင်းတော်မွေးဖွားလာနိုင်စရာအကြောင်းမရှိသလို ယနေ့ခေတ်ထိတိုင်လည်း တည်တံ့နေနိုင်မှာမဟုတ်ပါဘူး။
“ယခုမှာ၊ ခရစ်တော်သည် သေခြင်းမှ ထမြောက်တော်မူကြောင်းကို ဟောပြောရသည်ဖြစ်၍၊ သေသောသူတို့သည် ထမြောက်ခြင်းမရှိဟု သင်တို့တွင် အချို့သောသူတို့သည် အဘယ်ကြောင့် ဆိုရကြသနည်း။- သေသောသူတို့သည် ထမြောက်ခြင်းမရှိလျှင်၊ ခရစ်တော်သည် ထမြောက်တော်မမူ။- ခရစ်တော်သည် ထမြောက်တော်မမူလျှင်၊ ငါတို့ ဟောပြောခြင်း၌ အကျိုးမရှိ။ သင်တို့ယုံကြည်ခြင်း၌လည်း အကျိုးမရှိ။- ထိုမျှမက၊ ငါတို့သည် ဘုရားသခင်၏အမှုမှာ မမှန်သော သက်သေခံဖြစ်ကြ၏။- အကြောင်းမူကား၊ သေလွန်သောသူတို့သည် ထမြောက်ခြင်းမရှိလျှင်၊ ဘုရားသခင်သည် ခရစ်တော်ကို ထမြောက်စေတော်မမူ၊ ယခုမှာ၊ ခရစ်တော်ကို ထမြောက်စေတော်မူပြီဟု ငါတို့သည် ဘုရားသခင်၏အကြောင်းကို သက်သေခံကြ၏။ သေလွန်သောသူတို့သည် ထမြောက်ခြင်းမရှိလျှင်၊ ခရစ်တော်သည် ထမြောက်တော်မမူ။- ခရစ်တော်သည် ထမြောက်တော်မမူလျှင်၊ သင်တို့သည် ယုံကြည်သော်လည်း အကျိုးမရှိ၊ ဒုစရိုက်အပြစ်အောက်၌ ရှိကြသေး၏။-
ငါတို့သည် ခရစ်တော်ကို အမှီပြု၍ ယခုဘဝ၌သာ မျှော်လင့်စရာရှိလျှင်၊ အခြားသော သူအပေါင်းတို့ထက် သာ၍ ဆင်းရဲသောသူ ဖြစ်ကြ၏။ ယခုမူကား၊ ခရစ်တော်သည် သေခြင်းမှ ထမြောက်တော်မူ၍၊ အိပ်ပျော်သောသူတို့တွင် အဦးသီးသောအသီး ဖြစ်တော်မူပြီ။- သို့ဖြစ်၍ လူအားဖြင့် သေခြင်းတရားသည် တည်သကဲ့သို့၊ သေသောသူတို့၏ ထမြောက်ခြင်းတရားသည် လူအားဖြင့် တည်လျက်ရှိ၏။- လူအပေါင်းတို့သည် အာဒံအားဖြင့် သေခြင်းသို့ ရောက်သည်နည်းတူ၊ လူအပေါင်းတို့သည် ခရစ်တော်အားဖြင့် အသက်ရှင်ခြင်းသို့ ရောက်ရကြလတ္တံ့။-”
ကော ရိ န္သု ဩ ဝါ ဒ စာ ပ ထ မ စောင်။ 15:12-17, 19-22 JBMLE
လွန်ခဲ့တဲ့ နှစ်ထောင်ပေါင်းများစွာက ခရစ်တော်ကို ယုံကြည်သက်ဝင်ကြသည့် ရှေးဘိုးဘေးခရစ်ယာန်များဟာ ယနေ့မြန်မာပြည်က ပြည်သူတွေလိုပဲ ဖိနှိပ်ခြင်း အမျိုးမျိုး၊ ခွဲခြားဆက်ဆံခံရခြင်းအမျိုးမျိုး၊ ညှင်းဆဲသတ်ဖြတ်ခံရခြင်းအမျိုးမျိုး၊ လွှနဲ့ အပိုင်းပိုင်းဖြတ်သတ်ခံရခြင်း၊ ကားစင်တင်သတ်ခံရခြင်း၊ အရှင်လတ်လတ်မီးရှို့ခံရခြင်း၊ ခြင်္သေ့စာ အကျွေးခံရခြင်းစသည်တို့ကို ရင်ဆိုင်ကြုံတွေ့၊ ခံစားခဲ့ရဖူးပါတယ်။ သူတို့ အဲ့လို ရက်ရက်စက်စက် ညှင်းဆဲသတ်ဖြတ်ခံရခြင်းရဲ့ တခုတည်းသော အကြောင်းရင်းက ခရစ်တော်ဘုရားကို ယုံကြည်သက်ဝင်မှုတခုတည်းကြောင့်ပါ။ ခိုးလို့လည်း မဟုတ်ဘူး၊ လူသတ်လို့လည်း မဟုတ်ဘူး၊ ဒုစရိုက်ကို ပြုမိလို့လည်း မဟုတ်ဘူး။ အလကားသက်သက် အပြစ်မဲ့တဲ့ ယုံကြည်သူတွေ သတ်ဖြတ်ခံခဲ့ရတာဟာ ခရစ်တော်ကို ယုံကြည်သက်ဝင်မှုတခုတည်းကြောင့်ပါ။ ဒါကြောင့်ပဲ တမန်တော်ကြီးရှင်ပေတရုက ယုံကြည်သူတွေကို ခုလိုပဲ တိုက်တွန်းနှိုးဆော်ခွန်အားပေးခဲ့ရပါတယ်။
“ချစ်သူတို့၊ သင်တို့ကို စုံစမ်းစရာဖို့ ယခုခံရသော မီးစစ်ခြင်းအရာကိုကား၊ သင်တို့၌ အံ့ဩဖွယ်သောအရာ ဖြစ်သည်ဟု ထင်မှတ်၍၊ အံ့ဩခြင်း မရှိကြနှင့်။- သင်တို့သည် ခရစ်တော်၏ဆင်းရဲကို ဆက်ဆံကြသည်ဖြစ်၍၊ ဘုန်းတော်ပေါ်ထွန်းသောအခါ အလွန်ဝမ်းမြောက်ရွှင်လန်းမည်အကြောင်း၊ ယခုပင် ဝမ်းမြောက်ကြလော့။- ခရစ်တော်၏ နာမကြောင့် ကဲ့ရဲ့ခြင်းကိုခံရလျှင် မင်္ဂလာရှိကြ၏။ အကြောင်းမူကား၊ ဘုရားသခင်၏ ဘုန်းကြီးသော ဝိညာဉ်တော်သည် သင်တို့အပေါ်မှာ ကျိန်းဝပ်တော်မူ၏။ သူတို့၌ကား ကဲ့ရဲ့ခြင်း၊ သင်တို့၌ကား ချီးမွမ်းခြင်းရှိတော်မူ၏။- လူအသက်ကိုသတ်သော အပြစ်၊ သူ့ဥစ္စာကိုခိုးသော အပြစ်၊ ဒုစရိုက်ကိုပြုသော အပြစ်၊ သူတစ်ပါးအမှု၌ ရောနှောသောအပြစ် ရှိ၍၊ သင်တို့တွင် အဘယ်သူမျှ မခံစေနှင့်။- ခရစ်ယာန်ဖြစ်သောကြောင့် ခံရလျှင်မူကား၊ ရှက်ကြောက်ခြင်း မရှိစေနှင့်။ ထိုအမှုကြောင့်ခံရလျှင် ဘုရားသခင်၏ ဂုဏ်တော်ကိုချီးမွမ်းစေ။- ဘုရားသခင်၏အိမ်တော်သားတို့ကို ရှေ့ဦးစွာ စစ်ကြောစီရင်ရသော အချိန်ရှိပြီ။ ငါတို့ကို ရှေ့ဦးစွာ စစ်ကြောစီရင်လျှင်၊ ဘုရားသခင်၏ ဧဝံဂလိတရားစကားကို နားမထောင်သောသူတို့၏ အမှုသည် အဘယ်သို့ ပြီးလိမ့်မည်နည်း။- ဖြောင့်မတ်သောသူသည် ကယ်တင်ခြင်းသို့ ရောက်နိုင်ခဲသည်မှန်လျှင်၊ ဘုရားသခင်ကို မကိုးကွယ်သောသူ၊ အပြစ်ထင်ရှားသောသူသည် အဘယ်မှာ ပေါ်လိမ့်မည်နည်း။- ထိုကြောင့်၊ ဘုရားသခင်၏အလိုတော်အတိုင်း ဆင်းရဲခံရသောသူတို့သည်၊ ဘုရားသခင်ကို သစ္စာရှိသော အသက်သခင်ကဲ့သို့ မှတ်လျက်၊ ကောင်းသောအကျင့်ကို ကျင့်နေ၍၊ ကိုယ်တော်၌ မိမိတို့ အသက်ဝိညာဉ်ကို အပ်နှံကြစေ။”
ရှင် ပေ တ ရု သြ ဝါ ဒ စာ ပ ထ မ စောင်။ 4:12-19 JBMLE
ယနေ့ မြန်မာပြည်သူလူထုတွေ ကြုံတွေ့နေရတဲ့ ဆင်းရဲဒုက္ခကို ကိုယ်တော် သိတော်မူပါတယ်။ ဘုရားသခင်က ကျွန်ုပ်တို့ကို ဘယ်တော့မှ မစွန့်ဘူးလို့ ကတိတော်ရှိပါတယ်။ ဘုရားရှင်ဟာ မစာနာနိုင်တဲ့ ဘုရားသခင်မဟုတ်ပါ။ တခါတလေ ကျွန်တော်တို့ လူသားတွေက ဘုရားသခင်က တရားစီရင်တာ ကြာလိုက်တာလို့ ထင်တတ်ကြပါတယ်။ ဒါပေမယ့် ဘုရားသခင်ကို ကျွန်တော်တို့ရဲ့ အချိန်နဲ့ ဘောင်ခတ်လို့မရပါဘူး။ ကျွန်တော်တို့က ကိုယ်တော်ဖန်ဆင်းမှ လူဖြစ်လာရတာပါ။ ဘုရားရှင်က ကျွန်တော်တို့ထက် ပိုသိပါတယ်။
“ယခုမူကား၊ ကောင်းကင်ဘုံထဲသို့ ကြွဝင်တော်မူသော ယဇ်ပုရောဟိတ်မင်းအကြီးတည်းဟူသော ဘုရားသခင်၏ သားတော်ယေရှုသည် ငါတို့၌ ယဇ်ပုရောဟိတ်မင်း ဖြစ်တော်မူသောကြောင့်၊ ငါတို့သည် ဝန်ခံခဲ့ပြီးသောအရာ၌ တည်ကြည်ကြကုန်အံ့၊- ငါတို့ယဇ်ပုရောဟိတ်မင်းသည် ငါတို့ခံရသော ဆင်းရဲဒုက္ခများကြောင့် မကြင်နာနိုင်သောသူမဟုတ်။ ငါတို့ခံရသည်နည်းတူ၊ အမျိုးမျိုးသော စုံစမ်းနှောင့်ယှက်ခြင်းတို့ကို ခံဖူးသောသူဖြစ်တော်မူ၏။ သို့ရာတွင်၊ ဒုစရိုက်အပြစ်နှင့် ကင်းလွတ်တော်မူ၏။- ထိုကြောင့်၊ ငါတို့သည် သနားခြင်း ကရုဏာကိုလည်းကောင်း၊ တော်လျော်သောမစခြင်း ကျေးဇူးတော်ကိုလည်းကောင်း ခံရမည်အကြောင်း၊ ရဲရင့်သောစိတ်နှင့် ကျေးဇူးပလ္လင်တော်သို့ တိုးဝင် ချည်းကပ်ကြကုန်အံ့။”
ဟေ ဗြဲ ဩ ဝါ ဒ စာ။ 4:14-16 JBMLE
ယနေ့ မြန်မာပြည်မှာ ပြည်သူတွေက လွတ်လပ်မှု၊ တန်းတူအခွင့်အရေး၊ တရားမျှတမှုနဲ့ ထာဝရငြိမ်းချမ်းရေးရဖို့အတွက် တောင်းဆိုနေကြပါတယ်။ ဒီအရာအားလုံးဟာ ဘုရားသခင်အလိုတော်ရှိတဲ့အရာတွေပဲဖြစ်သလို ကောင်းမွန်တဲ့အရာတွေလည်း ဖြစ်ပါတယ်။ ဒါကြောင့်ပဲ သခင်က “အလိုတော်သည် ကောင်းကင်ဘုံ၌ ပြည့်စုံသကဲ့သို့ မြေကြီးပေါ်၌လည်း ပြည့်စုံပါစေသော” လို့ ဆုတောင်းခိုင်းတာ မဟုတ်ပါလား။
ဘုရားသခင်က လူသားတွေကို ချစ်လွန်းလို့ ကျွန်တော်တို့အတွက် ကားတိုင်ထက်မှာသက်စွန့်အသေခံပြီး အပြစ်တရားရဲ့ စီရင်ခြင်းခံရခြင်းမှ လွတ်လပ်မှုကို ပေးခဲ့ပြီးဖြစ်ပါတယ်။ ထိုအရာကို ယုံကြည်လက်ခံဖို့ပါ။�ဘုရားရှင်က တန်းတူအခွင့်အရေးပေးပါတယ်။ “ယေရှုခရစ်၌ ယုဒလူမရှိ၊ ဟေလသလူမရှိ၊ ကျွန်မရှိ။ လူလွတ်မရှိ၊ ယောက်ျားမရှိ၊ မိန်းမမရှိ၊ ထိုသခင်၌ သင်တို့အပေါင်းသည် တစ်လုံးတစ်ဝတည်း ဖြစ်ကြ၏။- ခရစ်တော်နှင့်စပ်ဆိုင်လျှင်အာဗြဟံ၏ အမျိုးအနွယ်ပင်ဖြစ်၍၊ ကတိတော်အတိုင်း အမွေခံ၏အရာ၌ တည်ကြ၏။”
ဂ လာ တိ ဩ ဝါ ဒ စာ။ 3:28-29 JBMLE
ဘုရားရှင်က တရားစီရင်ရာ ထာဝရဘုရား၏နေ့ရက်ရောက်လို့ရှိရင် အားလုံးကို တရားမျှတစွာ၊ ဖြောင့်မတ်စွာ တရားစီရင်တော်မူမယ့် ဘုရားရှင်ဖြစ်ပါတယ်။ အဆုံးမှာတော့ သခင်ယေရှုဘုရားကို မိမိအသက်တာရဲ့ ကယ်တင်ပိုင်ရှင်ဘုရားအဖြစ် ယုံကြည်သက်ဝင်သူတွေဟာ ဘုရားသခင်နဲ့အတူ ထာဝရငြိမ်းချမ်းစွာကောင်းကင်နိုင်ငံတော်မှာနေထိုင်သက်ရှင်ခွင့်ရမှာဖြစ်သလို မတရားသော အမှုကို ပြုတဲ့ အဓမ္မလူတွေသည် ထာဝရအပြစ်ဒဏ်ကို ဆိုးရွားစွာ ခံယူရမှာပဲ ဖြစ်ပါတယ်။
“သို့ဖြစ်၍၊ ဤအရာအလုံးစုံတို့သည် ကုန်စင်မည်မှန်သောကြောင့်၊ မိုးကောင်းကင်သည် မီးနှင့် ပျက်၍ လောကဓာတ်တို့သည် ပူအားကြီးလျက်၊ အရည်ကျိုခြင်းကို ခံရသော နေ့တည်းဟူသော၊ ဘုရားသခင်၏နေ့ ရောက်လိမ့်မည်ဟု သင်တို့သည် မျှော်လင့်တောင့်တလျက်၊ သန့်ရှင်းသောအကျင့်ကိုကျင့်ခြင်း၊ ဘုရားဝတ်၌ မွေ့လျော်ခြင်းအားဖြင့်၊ အဘယ်သို့သောသူ ဖြစ်အပ်ကြသနည်း။- ယခုရှိသော မိုးကောင်းကင်နှင့် မြေကြီးမူကား၊ တရားဆုံးဖြတ်၍ အဓမ္မလူတို့ကို ဖျက်ဆီးသော နေ့ရက်တိုင်အောင်၊ ထိုနှုတ်ကပတ် တော်အားဖြင့် သိုထားလျက်ရှိ၍၊ မီးရှို့ခြင်းအဖို့အလိုငှာ နေရစ်သတည်း။ ချစ်သူတို့၊ ထာဝရဘုရားမှာ ကာလတစ်ရက်သည်၊ အနှစ်တစ်ထောင်ကဲ့သို့လည်းကောင်း၊ အနှစ်တစ်ထောင်သည် တစ်ရက်ကဲ့သို့ လည်းကောင်းဖြစ်သည် အရာတစ်ခုကို မမေ့လျော့ကြနှင့်။- လူအချို့တို့သည်၊ နှေးခြင်းကိုမှတ်သည်အတိုင်း၊ ထာဝရဘုရားသည် ကတိတော်အရာမှာ နှေးတော်မမူ။ ငါတို့တွင် အဘယ်သူမျှ မပျက်စီးဘဲ၊ ရှိသမျှတို့သည် နောင်တရစေခြင်းငှာ အလိုတော်ရှိ၍၊ ငါတို့ကို သည်းခံတော်မူ၏။- သူခိုးသည် ညအခါလာသကဲ့သို့၊ ထာဝရဘုရား၏ နေ့ရက်သည် လာလိမ့်မည်။ ထိုနေ့၌ မိုးကောင်းကင်သည် ကြီးစွာသော အသံနှင့်တကွ ပျောက်သွားလိမ့်မည်။ လောကဓာတ်တို့သည် ပူအားကြီး၍ ပျက်ကြလိမ့်မည်။ မြေကြီးကိုယ်မှစ၍၊ မြေကြီးပေါ်မှာ ပြုလုပ်သမျှသောအရာတို့သည် ကျွမ်းလောင်ကြလိမ့်မည်။
ယခုရှိသမျှသောအရာတို့သည် ပျက်ရသော်လည်း၊ ဖြောင့်မတ်ခြင်းတရားတည်နေရာ မိုးကောင်းကင်သစ်နှင့် မြေကြီးသစ်ကို ငါတို့သည် ကတိတော်နှင့်အညီ မျှော်လင့်ကြ၏။ ထိုသို့ မျှော်လင့်ခြင်းရှိသောကြောင့်၊ ချစ်သူတို့၊ သင်တို့သည် အညစ်အကြေးနှင့် ကင်းစင်၍ အဘယ်အပြစ်မျှမပါဘဲ၊ ရှေ့တော်သို့ ငြိမ်ဝပ်စွာ ရောက်မည်အကြောင်း ကြိုးစားအားထုတ်ကြလော့။-”
ရှင် ပေ တ ရု ဩ ဝါ ဒ စာ ဒု တိ ယ စောင်။ 3:7-14 JBMLE
ဒါဆိုရင် ကျွန်ုပ်တို့ ဘာလုပ်ရမည်နည်း?
“ဘုရားသခင်၏သားတော်ကို ယုံကြည်သောသူအပေါင်းတို့သည်၊ ပျက်စီးခြင်းသို့မရောက်၊ ထာဝရအသက်ကို ရစေခြင်းငှာ၊ ဘုရားသခင်သည် မိမိ၌ တစ်ပါးတည်းသော သားတော်ကို စွန့်တော်မူသည်တိုင်အောင် လောကီသားတို့ကို ချစ်တော်မူ၏။-”
ရှင် ယော ဟန် ခ ရစ် ဝင်။ 3:16 JBMLE
“သက်သေခံတော်မူချက် ဟူမူကား၊ ဘုရားသခင်သည် ငါတို့အား ထာဝရအသက်ကို ပေးတော်မူ၍၊ ထိုအသက်သည်လည်း သားတော်၌ပါ၏။- သားတော်ကိုရသောသူသည် အသက်ကိုရ၏။ ဘုရားသခင်၏သားတော်ကို မရသောသူမူကား အသက်ကိုမရ။”
ရှင် ယော ဟန် ဩ ဝါ ဒ စာ ပ ထ မ စောင်။ 5:11-12 JBMLE
အီစတာက သင်နှင့် ကျွန်ုပ်အတွက်ပါ မိတ်ဆွေ။ အီစတာက မြန်မာပြည်သူတွေ အတွက်ပါ။ အီစတာက ကမ္ဘာသူ၊ ကမ္ဘာသားတွေ အတွက်ပါ။
လွတ်လပ်ခြင်း၊ တရားမျှတခြင်း၊ တန်းတူအခွင့်အရေး၊ ထာဝရငြိမ်းချမ်းခြင်းနှင့် ထာဝရအသက်ရှင်ခွင့်ရရှိခြင်းတို့ရဲ့ အလုံးစုံဖြစ်တော်မူသော အီစတာ တနင်္ဂနွေရဲ့ အရှင်သခင် ယေရှုရှင်ကို အချိန်မလွန်ခင်လေး ယုံကြည်လက်ခံ၊ ကိုးကွယ်ကြစို့လား။
“အလိုတော်သည် ကောင်းကင်ဘုံ၌ပြည့်စုံသကဲ့သို့ မြန်မာနိုင်ငံ၌လည်း ပြည့်စုံပါစေသော”
အာမင် 🙏🏻
#λόγος #ThyLogos #EasterSunday2021