အနန္တတန်ခိုးရှင် ယေရှုသခင်

ယေဟောဝါသက်သေခံအဖွဲ့ဝင်တွေကို “အာလဖ နဲ့ ဩမေဃ” ဖြစ်တော်မူတဲ့ပုဂ္ဂိုလ်ဟာ ဘယ်သူလဲလို့ မေးလိုက်လို့ရှိရင် “ယေဟောဝါ” ဖြစ်တယ်လို့ပဲ သူတို့ဖြေပါလိမ့်မယ် .. သူတို့ပြောတဲ့ယေဟောဝါဆိုတာ သခင်ယေရှုရဲ့ ဖခမည်းတော်ဘုရားသခင်ကို ပြောနေတာပါ။ “အာလဖ နဲ့ ဩမေဃ”၊ “ယေဟောဝါ”၊ “အနန္တတန်ခိုးရှင်” စတဲ့ ဝေါဟာရအမည်နာမတွေကို ၎င်းတို့က သခင်ယေရှုရဲ့ ဖခမည်းတော်အတွက်ပဲ အမြဲသီးသန့်ထားပြီးသုံးပါတယ် .. ဘာလို့လဲဆိုတော့ ၎င်းတို့အဖွဲ့ဝင်တွေဟာ သခင်ယေရှုကို ပြပ်ဝပ်ကိုးကွယ်ထိုက်တော်မူသော “ထာဝရဘုရားသခင်” ဖြစ်တယ်လို့ မယုံကြည်ကြလို့ပါ။ သူတို့က သခင်ယေရှုကို ခမည်းတော်ဘုရားက ပထမဦးဆုံးဖန်ဆင်းခဲ့တာလို့ ယွင်းမှားစွာယုံကြည်ကြတာဖြစ်ပါတယ်။ ဒါကြောင့် JW ရဲ့ ဓမ္မအတွေးအခေါ်မှာ ယေရှုဟာ ဖန်ဆင်းခံဖြစ်တယ််။ ဒါကြောင့် “အာလဖ နဲ့ ဩမေဃ”၊ “ယေဟောဝါ”၊ “အနန္တတန်ခိုးရှင်” ဆိုတဲ့ နာမတော်တွေဟာ သခင်ယေရှုနဲ့ မထိုက်တန်ဘူးလို့ ခံယူကြပါတယ်။ ဖန်ဆင်းခံ မဟုတ်တဲ့ ယေရှုရဲ့ ခမည်းတော်တပါးတည်းအတွက်ပဲ ထိုက်တန်တဲ့နာမတော်တွေဖြစ်တယ်လို့ သူတို့ ခံယူကြလို့ဖြစ်ပါတယ်။

ဟုတ်ပြီ .. ဒါဆို ဗျာဒိတ်ကျမ်း ၂၁:၆-၇ ကို ကြည့်ရအောင်။

“အဲဒီနောက် ဘုရားသခင်က ကျွန်တော့်ကို ပြောတယ်– “အဲဒီစကားအတိုင်း ဖြစ်နေပြီ။ ငါဟာ အာလဖနဲ့ သြမေဃဖြစ်တယ်၊ အစနဲ့ အဆုံးဖြစ်တယ်။ ငါက ရေငတ်သူမှန်သမျှကို အသက်စမ်းရေ အခမဲ့ ပေးမယ်။ အောင်မြင်သူဟာ ဒါတွေကို အမွေရလိမ့်မယ်။ ငါဟာ သူ့ဘုရားသခင် ဖြစ်မယ်။ သူကလည်း ငါ့သား ဖြစ်လိမ့်မယ်။” (ကမ္ဘာသစ်ဘာသာပြန်ကျမ်းမှ)

“And he said to me: “They have come to pass! I am the Alʹpha and the O·meʹga, the beginning and the end. To anyone thirsting I will give from the spring of the water of life free. 7 Anyone conquering will inherit these things, and I will be his God and he will be my son.” (New World Translation)

ဒီမှာ စကားပြောနေတဲ့ပုဂ္ဂိုလ်တော်က ဘယ်သူလဲလို့ ယေဟောဝါသက်သေခံတွေကို မေးရင် ၎င်းတို့က “ယေဟောဝါ” (သို့မဟုတ်) “ယေရှုရဲ့ခမည်းတော်” ပေါ့လို့ သေချာပေါက်ဖြေပါလိမ့်မယ်။ “အာလဖ နဲ့ ဩမေဃ” ဆိုတာကို ၎င်းတို့သက်သေခံတွေကြားလိုက်တာနဲ့ ဒါက “ယေရှုရဲ့ခမည်းတော်” သို့မဟုတ် “ယေဟောဝါ” တပါးတည်းပဲ ဖြစ်တယ်ဆိုပြီးတော့ အသေမှတ်ယူထားတာဖြစ်ပါတယ်။ သူတို့ရဲ့အဖွဲ့အစည်းက အဲ့လို မှတ်ယူအောင်ကို ပုံသွင်းထားတာဖြစ်ပါတယ်။

ဒါဆို ဆက်လက်ပြီး ရှင်ယောဟန် ၅:၂၂ ကို ကြည့်ရအောင်။

“အဖဘုရားက ဘယ်သူ့ကိုမှ တရားမစီရင်ဘူး။ တရားစီရင်ပိုင်ခွင့်ကို သားတော်လက်ထဲ အပ်ထားတယ်။” (ကမ္ဘာသစ်ဘာသာပြန်ကျမ်းမှ)

“For the Father judges no one at all, but he has entrusted all the judging to the Son,” (New World Translation)

ဒီကျမ်းချက်ကို သေချာအာရုံပြုပါ။

တရားစီရင်ပိုင်တာ ဘယ်သူလဲ။ သခင်ယေရှု ဟုတ်တယ်ဟုတ်? 
“ယေဟောဝါ” က တရားစီရင်မလား။ “ဘယ်သူ့ကိုမှ တရားမစီရင်ဘူး” (For the Father judges no one at all) လို့ ရေးထားတယ် ဟုတ်? ဒီအချက်ကို သေချာမှတ်ထားပါ။

ဟုတ်ပြီ .. စာရေးသူတို့ ဗျာဒိတ်ကျမ်း ၂၂:၁၂-၁၃ ကို ပြန်ကြည့်ရအောင်။

“‘ငါ အမြန်ဆုံး လာမယ်။ လူတိုင်းကို သူတို့ရဲ့အကျင့်အတိုင်း အကျိုးအပြစ်ကို ပြန်ဆပ်ပေးမယ်။ ငါဟာ အာလဖနဲ့ သြမေဃ ဖြစ်တယ်။ ဦးဆုံးနဲ့ နောက်ဆုံး၊ အစနဲ့ အဆုံး ဖြစ်တယ်။” (ကမ္ဘာသစ်ဘာသာပြန်ကျမ်းမှ)

“‘Look! I am coming quickly, and the reward I give is with me, to repay each one according to his work. I am the Alʹpha and the O·meʹga, the first and the last, the beginning and the end.” (New World Translation)

စာဖတ်သူတို့ကို ပြန်မေးပါမယ် ..

– တရားစီရင်ပိုင်တာ ဘယ်သူလဲ။ (သခင်ယေရှု ~ ယော ၅:၂၂)

– “ယေဟောဝါ” က တရားစီရင်မလား။ (ဘယ်သူ့ကိုမှ တရားမစီရင်ဘူး ~ ယော ၅:၂၂)

– တရားစီရင်ဖို့ ဒုတိယအကြမ် အမြန်ဆုံးပြန်လာမှာ ဘယ်သူလဲ။ (သခင်ယေရှု ~ ဗျာဒိတ်ကျမ်း ၂၂:၁၂)

– လူတိုင်းရဲ့ အကျင့်အတိုင်း အကျိုးအပြစ်ကို ပြန်ဆပ်ပေးမယ့်သူ တနည်းအားဖြင့် တရားစီရင်မယ့်သူက ဘယ်သူလဲ။ (သခင်ယေရှု ~ ဗျာဒိတ်ကျမ်း ၂၂:၁၂)

ဒါဆို ဗျာဒိတ်ကျမ်း ၂၂:၁၂-၁၃ မှာ “ငါဟာ အာလဖနဲ့ သြမေဃ ဖြစ်တယ်။ ဦးဆုံးနဲ့ နောက်ဆုံး၊ အစနဲ့ အဆုံး ဖြစ်တယ်” ဆိုပြီး ပြောနေတာ ဘယ်သူလဲ။ (သခင်ယေရှုပေါ့ဗျာ)

အဖဘုရားက တရားစီရင်မလား။ (ဘယ်သူ့ကိုမှ တရားမစီရင်ဘူး။ တရားစီရင်ပိုင်ခွင့်ကို သားတော်လက်ထဲ အပ်ထားတယ်။)
ဒါကြောင့် ဗျာဒိတ်ကျမ်း ၂၂:၁၂-၁၃ မှာပါတဲ့ “အာလဖနဲ့ ဩမေဃ” ဟာ “ယေဟောဝါ” သို့မဟုတ် သခင်ယေရှုရဲ့ ဖခမည်းတော်ဖြစ်တယ်လို့ ဆင်ခြေပေးနိုင်စရာအကြောင်း စိုးစဉ်းမျှ မရှိပါ။ အဲ့လိုဆင်ခြေပေးရင် ပေးတဲ့သူဟာ ဗြောင်လိမ်တဲ့သူသာဖြစ်ပါလိမ့်မယ်။

ဒါဆို ဘာလို့ သခင်ယေရှုက “ငါဟာ အာလဖနဲ့ သြမေဃ ဖြစ်တယ်။ ဦးဆုံးနဲ့ နောက်ဆုံး၊ အစနဲ့ အဆုံး ဖြစ်တယ်” လို့ မိန့်တော်မူတာလဲ။ အထူးသတိပြုပါ ..

သခင်ယေရှုက အနန္တတန်ခိုးရှင်ဘုရားသခင် မဟုတ်ဘူးဆိုရင် ခုနကကျမ်းပိုဒ်မှာ “ငါဟာ ဦးဆုံးနဲ့ နောက်ဆုံး၊ အစနဲ့ အဆုံးဖြစ်တယ်” လို့ပြောရုံသာမက “ယေဟောဝါ” ကိုပဲ အသုံးပြုတဲ့ “အာလဖ နဲ့ ဩမေဃ” လည်းဖြစ်တယ်လို့ ဘာလို့မိန့်တော်မူတာလဲ။

ဘာလို့လဲ သိရအောင် ဗျာဒိတ်ကျမ်း ၂၂:၁၂-၁၃၊ ၁၆၊ ၂၀ ကို ထပ်ခါထပ်ခါယှဉ်ဖတ်ကြည့်ကြရအောင်။

၁၂-၁၃ “‘ငါ အမြန်ဆုံး လာမယ်။ လူတိုင်းကို သူတို့ရဲ့အကျင့်အတိုင်း အကျိုးအပြစ်ကို ပြန်ဆပ်ပေးမယ်။ ငါဟာ အာလဖနဲ့ သြမေဃ ဖြစ်တယ်။ ဦးဆုံးနဲ့ နောက်ဆုံး၊ အစနဲ့ အဆုံး ဖြစ်တယ်။” (ကမ္ဘာသစ်ဘာသာပြန်ကျမ်းမှ)

၁၆-၂၀ “‘ငါယေရှုက အသင်းတော်တွေရဲ့ အကျိုးအတွက် မင်းကို ဒီအကြောင်းတွေ သက်သေခံဖို့ ငါ့ရဲ့ကောင်းကင်တမန်ကို လွှတ်လိုက်တယ်။ ငါဟာ ဒါဝိဒ်ရဲ့အမြစ်၊ ဒါဝိဒ်ရဲ့မျိုးနွယ်၊ ထွန်းတောက်တဲ့ မိုးသောက်ကြယ်ပဲ။ ဒီအကြောင်းတွေကို ပြောတဲ့သူက ‘သေချာတယ်၊ ငါ အမြန်ဆုံး လာမယ်’ လို့ပြောတယ်။” “အာမင်။ သခင်ယေရှု၊ ကြွလာပါ။””

အထက်ပါကျမ်းစာကို နောက်တဖန်ပြန်ဖတ်ပါ။ ပြီးမှ ဆောင်းပါးကို ဆက်ဖတ်ပါ။
သတိပြုပါ .. ဗျာဒိတ်ကျမ်း ၂၂:၁၂-၂၀ အထိမှာ စကားပြောနေတဲ့ပုဂ္ဂိုလ်တော် မပြောင်းသွားပါဘူး။ ယေရှုတပါးတည်း ဆက်တိုက်ပြောနေတာဖြစ်ပါတယ်။ ဒါကို စာဖတ်တတ်သူတိုင်း နားလည်မှာပါ။

စာရေးသူ ဆက်မသွားခင် ထပ်ပြောပါမယ်။ ခုချိန်ထိ အသုံးပြုသွားတဲ့ကျမ်းပိုဒ်တွေအကုန်လုံးက JW.org ထုတ်ထားတဲ့ “ကမ္ဘာသစ်ဘာသာပြန်ကျမ်း” နဲ့ Kingdom Interlinear ထဲကချည်းဖြစ်ပါတယ်။ စာရေးသူတို့ရဲ့ ခရစ်ယာန်သမ္မာကျမ်းစာကို သုံးပြီး တဖတ်သက်ရေးထားတာ တခုမှ မရှိဘူးဆိုတာ ထပ်ပြီး အသိပေးလိုပါတယ်။ နောက်ပြီး ဒီဆောင်းပါးရဲ့ ခေါင်းစဉ်အတိုင်း သခင်ယေရှုဟာ အနန္တတန်ခိုးရှင် (Almighty God) ဖြစ်တယ်ဆိုတာကို ယေဟောဝါသက်သေခံတွေ အသုံးပြုတဲ့ကျမ်းစာဗားရှင်းကိုပဲ အသုံးပြုပြီး သက်သေထူသွားမှာပါ။

– နောက်ပြီး ၎င်းတို့ပြောသလို သခင်ယေရှုဟာ တန်ခိုးကြီးသောဘုရားသခင် (Mighty God) ဖြစ်တယ်။ (ဟေရှာယ ၉:၆)
– ဒါပေမယ့် ယေရှုဟာ ယေဟောဝါလိုတော့ အနန္တတန်ခိုးရှင်ဘုရားသခင် (Almighty God) မဟုတ်ပါဘူးဆိုတဲ့ အဓိပ္ပါယ်မရှိတဲ့ဆင်ခြင်တွေဟာ မမှန်ကန်ဘူးဆိုတာကို ထပ်မံထောက်ပြလိုပါတယ်။

ဒါကြောင့် သခင်ယေရှုဟာ တန်ခိုးကြီးသောဘုရားသခင်ဖြစ်သလို အနန္တတန်ခိုးရှင်ဘုရားသခင်လည်း ဖြစ်တယ်ဆိုတာကို အမှန်အတိုင်းမြင်တွေဖို့ရန် ရှင်ယောဟန် ၅:၂၂၊ ရှင်မဿဲ ၁၆:၂၇၊ ဗျာဒိတ်ကျမ်း ၂၂:၁၂-၁၃ များကို အတူတကွဖတ်ကြည့်ကြရအောင်။

“အဖဘုရားက ဘယ်သူ့ကိုမှ တရားမစီရင်ဘူး။ တရားစီရင်ပိုင်ခွင့်ကို သားတော်လက်ထဲ အပ်ထားတယ်။” (ယောဟန် ၅:၂၂၊ ကမ္ဘာသစ်ဘာသာပြန်ကျမ်းမှ)

“လူသားဟာ ကောင်းကင်တမန်တွေ ခြံရံပြီး အဖဘုရားရဲ့ ဘုန်းတန်ခိုးနဲ့ လာလိမ့်မယ်။ အဲဒီအခါ လူတိုင်းကို သူတို့လုပ်ရပ်နဲ့အညီ ပြန်ဆပ်ပေးလိမ့်မယ်။” (မဿဲ ၁၆:၂၇၊ ကမ္ဘာသစ်ဘာသာပြန်ကျမ်းမှ)

“‘ငါ အမြန်ဆုံး လာမယ်။ လူတိုင်းကို သူတို့ရဲ့အကျင့်အတိုင်း အကျိုးအပြစ်ကို ပြန်ဆပ်ပေးမယ်။ ငါဟာ အာလဖနဲ့ သြမေဃ ဖြစ်တယ်။ ဦးဆုံးနဲ့ နောက်ဆုံး၊ အစနဲ့ အဆုံး ဖြစ်တယ်။” (ဗျာဒိတ် ၂၂:၁၂-၁၃ ကမ္ဘာသစ်ဘာသာပြန်ကျမ်းမှ)

ကဲ .. ဒါဆို အခု “ယေဟောဝါ” ကိုပဲ အသုံးပြုလို့ရပါတယ်ဆိုတဲ့ “အာလဖ နဲ့ ဩမေဃ” ဆိုတဲ့ နာမတော်ကိုပဲ သခင်ယေရှုက အသုံးပြုနေတာဖြစ်တယ်ဆိုတာကို အဓိကမြင်စေချင်ပါတယ်။ ဒါကြောင့် ယေဟောဝါသက်သေခံအဖွဲ့ဝင်တွေအနေနဲ့  ဒီအချက်ကို လုံးဝငြင်းဆိုနိုင်ဖွယ်ရာမရှိပေ။ အကြောင်းမှာ သူတို့ကျမ်းစာထဲမှာ ထိုအတိုင်းရေးထားတဲ့အတွက်ကြောင့်ဖြစ်ပါတယ်။

ဆက်လက်ပြီး ဟေရှာယ ၄၀:၁၀ နဲ့ ရှင်မဿဲ ၁၆:၂၇ ကို ခေါက်တုပ်ခေါက်ပြန်ဖတ်ကြည့်ကြရအောင်။

“ကြည့်ပါ။ အချုပ်အခြာအာဏာပိုင်ရှင် ယေဟောဝါက တန်ခိုးနဲ့ ကြွလာလိမ့်မယ်။ လက်ရုံးတော်က ဘုရားအတွက် အုပ်စိုးလိမ့်မယ်။ ဆုလာဘ်တော်ဟာ ဘုရားဆီမှာ ရှိနေတယ်။ ဘုရားပေးမယ့် လုပ်ခကလည်း ရှေ့တော်မှာ ရှိနေတယ်။” (ဟေရှာယ ၄၀:၁၀၊ ကမ္ဘာသစ်ဘာသာပြန်ကျမ်းမှ)

“လူသားဟာ ကောင်းကင်တမန်တွေ ခြံရံပြီး အဖဘုရားရဲ့ ဘုန်းတန်ခိုးနဲ့ လာလိမ့်မယ်။ အဲဒီအခါ လူတိုင်းကို သူတို့လုပ်ရပ်နဲ့အညီ ပြန်ဆပ်ပေးလိမ့်မယ်။” (ရှင်မဿဲ ၁၆:၂၇၊ ကမ္ဘာသစ်ဘာသာပြန်ကျမ်းမှ)

အထက်ပါ နှစ်ကျမ်းကို ၎င်းတို့ရဲ့ New World Translation နဲ့ ဖတ်ကြည့်ပါ။ ပိုတောင် သိသာထင်ရှားပါသေးတယ်။

“Look! The Sovereign Lord Jehovah will come with power, And his arm will rule for him. Look! His reward is with him, And the wage he pays is before him.” (Isaiah 40:10, NWT)

“For the Son of man is to come in the glory of his Father with his angels, and then he will repay each one according to his behavior.” (Matthew 16:27, NWT)

စာဖတ်သူတို့ … စာရေးသူ ဘာကိုပြချင်လဲဆိုတာ မြင်လား မသိဘူး။ 
ယေဟောဝါ တနည်းအားဖြင့် အဖဘုရား (The Father) က ဘယ်သူ့ကိုမှ တရားမစီရင်ဘူးလို့ အတိအလင်းပြောထားပါတယ်။ ပြောတဲ့သူကလည်း တခြားလူမဟုတ်ပါဘူး။ သခင်ယေရှုကိုယ်တော်တိုင် ရှင်ယောဟန် ၅:၂၂ မှာ မြွက်တော်မူခဲ့တဲ့ နှုတ်ကပတ်တော် ဖြစ်ပါတယ်။ ဒါကြောင့် ဟေရှာယ ၄၀:၁၀ မှာ တရားစီရင်ဖို့ တန်ခိုးနဲ့ကြွလာမယ့် အချုပ်အခြာအာဏာပိုင်ရှင် ယေဟောဝါက သခင်ယေရှု မဟုတ်ရင် ဘယ်သူလဲ .. ဖြေပါ။

• တရားစီရင်ပိုင်တာ ဘယ်သူလဲ။ (သခင်ယေရှု ~ ယော ၅:၂၂)
• “ယေရှုရဲ့ခမည်းတော် အဖဘုရား” က တရားစီရင်မလား။ (ဘယ်သူ့ကိုမှ တရားမစီရင်ဘူး၊ တရားစီရင်ပိုင်ခွင့်ကို သားတော်လက်ထဲ အပ်ထားတယ်။ ~ ယော ၅:၂၂)
• တရားစီရင်ဖို့ ဒုတိယအကြမ် အမြန်ဆုံးပြန်လာမှာ ဘယ်သူလဲ။ (သခင်ယေရှု ~ ဗျာဒိတ်ကျမ်း ၂၂:၁၂)
• လူတိုင်းရဲ့ အကျင့်အတိုင်း အကျိုးအပြစ်ကို ပြန်ဆပ်ပေးမယ့်သူ အာလဖ နဲ့ ဩမေဃ က ဘယ်သူလဲ။ (သခင်ယေရှု ~ ဗျာဒိတ်ကျမ်း ၂၂:၁၃)
• တရားစီရင်ဖို့ တန်ခိုးနဲ့ကြွလာမယ့် အချုပ်အခြာအာဏာပိုင်ရှင် ယေဟောဝါ က ဘယ်သူလဲ။ (သခင်ယေရှု ~ ဟေရှာယ ၄၀:၁၀)

ဆိုတော့ .. ဆောင်းပါးလည်း ရှည်နေပြီမို့လို့ ဗျာဒိတ်ကျမ်း ၁:၇-၈ (ကမ္ဘာသစ်ဘာသာပြန်ကျမ်း) ကိုပြန်သွားကြည့်ရအောင်။

“ယေရှုက မိုးတိမ်ခြံရံပြီး လာလိမ့်မယ်။ သူ့ကို ထိုးဖောက်ခဲ့သူတွေပါမကျန် လူတိုင်း သူ့ကို မြင်ရလိမ့်မယ်။ ကမ္ဘာမြေပေါ်မှာရှိတဲ့ လူမျိုးအားလုံးဟာ သူ့ကြောင့် ရင်ဘတ်ထုပြီး ငိုကြွေးကြလိမ့်မယ်။ အာမင်။ ယေဟောဝါ ဘုရား က “ငါဟာ အာလဖနဲ့ သြမေဃ ဖြစ်တယ်။ အတိတ်၊ ပစ္စုပ္ပန်၊ အနာဂတ်ကာလ အစဉ်တည်ရှိတဲ့ အနန္တတန်ခိုးရှင်ဖြစ်တယ်” လို့မိန့်ဆိုတယ်။”

ဗျာဒိတ်ကျမ်း ၁:၇ မှာ ” သူ့ကို ထိုးဖောက်ခဲ့သူတွေပါမကျန် လူတိုင်း သူ့ကို မြင်ရလိမ့်မယ်” ဆိုတာ “ယေဟောဝါ” ဒါမှမဟုတ် “ယေရှုရဲ့ ခမည်းတော်” ဖြစ်နိုင်မလား။ ယေရှုရဲ့ ခမည်းတော် (ယေဟောဝါ) က သစ်တိုင်ပေါ်မှာ ထိုးဖောက်ခံခဲ့ရပါသလား။ ဆက်ပြီး အခန်းငယ် ၈ ကို ဆက်ဖတ်တဲ့အခါ စာရေးသူ ဆောင်းပါးအစမှာ JW.org ရဲ့ Kingdom Interlinear နဲ့ စာရေးသူထောက်ပြထားခဲ့သလိုပဲ အခန်းငယ် ၈ က “ယေဟောဝါ” ဆိုတဲ့ နာမတော်ဟာ မူရင်းဂရိကျမ်းမှာတောင် မပါပါဘူး။ ဗျာဒိတ်ကျမ်း ၁:၇-၈ ကို တွဲဖတ်လိုက်ရင် “ငါဟာ အာလဖနဲ့ သြမေဃ ဖြစ်တယ်။ အတိတ်၊ ပစ္စုပ္ပန်၊ အနာဂတ်ကာလ အစဉ်တည်ရှိတဲ့ အနန္တတန်ခိုးရှင်ဖြစ်တယ်” ဆိုတဲ့ဘုရားသခင်က သခင်ယေရှုဖြစ်နေတယ်ဆိုတာ ပေါ်လွင်နေတဲ့အခါ ၎င်းတို့အဖွဲ့ဝင်တွေ ဒီအမှန်တရားကို မမြင်နိုင်အောင် “ယေဟောဝါ” ဆိုပြီး ထည့်ကာ သူတို့နောက်လိုက်တွေကို အာရုံထွေပြားစေပါတော့တယ်။ ဒါကြောင့် “သခင်ယေရှု ဟာ Just a Mighty God ပါကွာ၊ Almighty God မဟုတ်ဘူးကွာ” ဆိုတဲ့ အဓိပ္ပါယ်မရှိတဲ့ အလိမ်အညာတွေကို JW.org ရဲ့ ကျမ်းစာအုပ်တွေကိုပဲကိုးကား၍ ယုတ္တိကျစွာဖော်ပြလိုပါတယ်။ ဆက်လက်၍လည်း ယေဟောဝါသက်သေခံအဖွဲ့အစည်း (Watch Tower Society) ရဲ့ အလိမ်အညာ၊ ယွင်းမှားသောအယူတွေကို ဆောင်းပါးများစွာရေး၍ သခင်ယေရှုရဲ့ သက်သေခံတဦးအနေနဲ့ တရားသောနည်းဖြင့် ထောက်ပြသွားပါဦးမည်။ 


တခါတရံ စာဖတ်သူတို့က ThyLogos Page ကို Anti-JW page ကြီးလားဟု ထင်မြင်ကောင်းထင်မြင်မိပါလိမ့်မယ်။ မဟုတ်ရပါ။ ကျွန်တော်တို့ဟာ Christian Apologetics ကိုလုပ်နေတဲ့ နှစ်ခြင်းခရစ်ယာန်အဖွဲ့အစည်းဖြစ်တာကြောင့် သမ္မာတရားကိုမှောက်လှန်တဲ့ “ခရစ်ယာန်” အမည်ခံ မည်သည့်အဖွဲ့အစည်းကိုမဆို ယုံကြည်သူများရှေ့တွင် ၎င်းတို့ မှားယွင်းနေသောအယူဝါဒများကို ထောက်ပြသွားဦးမှာပါ။
ထိုသို့မထောက်ပြပါက အချိန်ကြာလာတဲ့အခါ ဘာသာခြားတွေအမြင်မှာလည်း “ဪ .. ဒီလူတွေက ခရစ်ယာန်ဂိုဏ်းကပါလား” ဆိုပြီး ထင်မှတ်မှားနိုင်သောကြောင့်ဖြစ်ပါတယ်။ ယေဟောဝါသက်သေခံ အဖွဲ့အစည်းဟာ ခရစ်ယာန်ဘာသာအဖွဲ့အစည်းတခုလုံးဝ မဟုတ်ပါဘဲလျက် ၎င်းတို့ကိုယ်၎င်းတို့“ခရစ်ယာန်” တွေပါလို့ လိမ်ညာဖြားယောင်းသွေးဆောင်သောကြောင့်သာ ၎င်းတို့ရဲ့ ယွင်းမှားသောအယူများကို ခရစ်တော်၏နောက်လိုက်တပည့်တော်စစ် ခရစ်ယာန်ညီကိုမောင်နှမများသိရအောင် ရေးသားလိုက်ခြင်းဖြစ်ပါတယ်။ ဤဆောင်းပါးကို မကြိုက်မနှစ်သက်တဲ့ ယေဟောဝါသက်သေခံတစုံတဦးရှိခဲ့လျှင် ထိုသူဟာ JW အဖွဲ့ဝင်ဖြစ်ပါလျက် ၎င်းတို့ အဖွဲ့အစည်းက ထုတ်ဝေထားတဲ့ကျမ်းစာကိုပင် မကြိုက်မနှစ်သက်လို့သာဖြစ်ပါလိမ့်မယ်။ လမ်းမှားရောက်နေသော JW ညီကိုမောင်နှမများ နောင်တရလျက် အနန္တတန်ခိုးရှင် ယေရှုသခင် ထံပြန်လာခဲ့ကြပါ။ ဒီစာကိုဖတ်သူဟာ ယေဟောဝါသက်သေခံအဖွဲ့ဝင်ဆိုလျှင် တကြိမ်တခါလောက် အောက်ပါအတိုင်း စဉ်းစားကြည့်ပါ။