၁ ခုမြောက်သော ဆာလံအား ဥာဏ်ပညာပိုင်းဆိုင်ရာဆာလံ “Wisdom Psalm” ဟုလည်း ခေါ်ဆိုကြသည်။ ထိုဆာလံသည် ကျွန်ုပ်တို့၏ဘဝအတွက် ဘုရားသခင်ထံမှလာသော လမ်းညွှန်ချက်ဟုပင် ဆို၍လည်း ရပေသေး၏။
ကျွန်ုပ်တို့၏ ရွေးချယ်ခြင်း၊ ရပ်တည်ခြင်းများအပေါ်၌ ရရှိလာနိုင်မည့် မင်္ဂလာ သို့တည်းမဟုတ် ဆုံးရှုံးခြင်းတည်းဟူသော အမင်္ဂလာပင် …
မတရားသောသူတို့၏ တိုက်တွန်းခြင်း၊ လမ်းညွှန်ခြင်း၊ လူဆိုးလူမိုက်တို့၏ ဓလေ့ထုံးစံ၊ အဓမ္မလူတို့၏ တိုင်ပင် စည်းဝေးခြင်း စသဖြင့် တရားမဲ့ လုပ်ဆောင်ချက်တို့အား ငြင်းပယ်တတ်သောသူ တရားတော်ကိုသာ ဆင်ခြင်အောက်မေ့တတ်သောသူသည် မင်္ဂလာရှိသည်မှာ ငြင်းဆိုစရာအကြောင်းပင် မရှိဘူး မဟုတ်ပါလား။
ဆန့်ကျင်ဘက်တွင်တော့ ထို မတရားသောသူတည်းဟူသော လူမိုက်တို့၏လမ်း၊ အဓမ္မဒုစရိုက်သမားတို့၏လမ်းသည် ဆုံးရှုံးခြင်းလမ်းတည်းဟူသော အမင်္ဂလာအဖြာဖြာနှင့် ကျက်သရေအလွန့်အလွန်ကိုတုံးလွန်း လှသည်မှာလည်း အင်မတန့်အင်မတန် ကြောက်စရာကောင်းလှပြန်ပေသည်။
ထို့ကြောင့်လည်း သုတ္တံဆရာကတော့ လူသည် ပညာရှိတို့နှင့်ပေါင်းဖော်၍ ပညာရှိတတ်သောသူပင်ဖြစ်လာနိုင်သော်လည်း လူမိုက်၊ လူဆိုး၊ အဓမ္မဒုစရိုက်သမားတို့နှင့် လက်တွဲတတ်သူ၊ ပေါင်းဖော်တတ်သူ၊ စည်းဝါးရိုက်ကာ လုပ်စားတတ်သူတို့မှာတော့ ပစောက်ယပင်းနှင့် ပျက်ကာပင်စီးသည့် လေတိုက်၍လွင့်သော ဖွဲအလား ပျက်စီးခြင်းပေတည်းဟုပင် လမ်းညွှန်ထားသည်ကို နားလည်ရပါသည်။
သုတ္တံကျမ်း ၁၃:၂၀
ပညာရှိတို့နှင့် ပေါင်းဖော်သောသူသည် ပညာရှိတတ်၏။ လူမိုက်တို့နှင့် ပေါင်းဖော်သောသူမူကား၊ ပျက်စီးတတ်၏။
ယနေ့ ကျွန်ုပ်တို့၏ ဘဝအသက်တာတွင် မည်သို့သောသူများနှင့် ဝန်းရံကာ ရှေ့ဆက်ချင်သည်ကို ဆင်ခြင်လျက် ပညာရှိသူတို့နှင့်အတူ တရားတော်အား ဆင်ခြင်နှလုံးသွင်းကာ မင်္ဂလာရှိချင်သည်လား သို့တည်းမဟုတ် ပျက်စီးခြင်းတည်းဟူသော အမင်္ဂလာလမ်းသို့ လူမိုက်တို့နှင့် အတူလျှောက်မည်လား … မိမိကိုယ်ကိုယ် မေးခွန်းထုတ်လျက် မြစ်နားတွင်စိုက်သော အပင်ဖြစ်ပါစေသားဟုပင် ဆုမွန်ကောင်းတောင်းရင်း …
ဘုရားရှင်ဆက်လက်စကားပြောပါစေ။
ယခုဆောင်းပါးသည် မူရင်းစာရေးသူ ဆရာ Titus Kyaw Nyi နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။