တစုံတယောက်မှ မေးခွန်းပို့၍ မေးမြန်းထားသောအကြောင်းအရာနဲ့ ပတ်သက်ပြီး သခင်ယေရှုခရစ်တော်၏ နောက်လိုက်တပည့်တော်များဖြစ်သော ကျွန်တော်တို့ λόγος (ThyLogos) အဖွဲ့သားများမှ ပြန်လည်ဖြေကြားပေးလိုပါသည်။ မေးခွန်းမှာ အောက်ပါအတိုင်းဖြစ်ပါသည်။
“ယေရှုခရစ်တော်က ငါသွားရင် ဥပဇ္စျာယ်ဆရာ ကို လွှတ်မယ်လို့ ပြောတဲ့ ကျမ်းပိုဒ် ကို India က Comparative Religion အားသန်တဲ့ Dr.Zakir Naik ဆိုသူက ဒါက တမန်တော် မိုဟာမက် အကြောင်း Bible မှာ ပြောနေတာ…သန့်ရှင်းသော ဝိညာဥ်တော်က ယေရှုခရစ်တော် မမွေးခင်ကတည်းက ရှိနေပြီးသား … ဒါကြောင့် တမန်တော် မိုဟာမက် ကို ပရောဖက်ပြုထားတာ
ဆိုပြီး ပြောတာ တွေ့ရလို့ပါ။ ဒါ မဟုတ်တာ သိနေပေမယ့် ဒီအချက်ကို သေချာလေး ချေပစေချင်လို့ မေးမြန်းလိုက်တာပါ။”
λόγος (ThyLogos) အား ဤကဲ့သို့ မေးခွန်းပို့မေးမြန်းသောအကြောင်းအရာအတွက် ကျေးဇူးတင်ရှိပါသည်။ မေးသူရဲ့ မေးခွန်းကို အနှစ်ချုပ်ကြည့်ပါက မေးခွန်း “သခင်ယေရှုနောက်ကြွလာမည့် “ဥပဇ္ဈာယ်ဆရာ” ဆိုတာ တမန်တော် မုဟမ္မဒ် (မိုဟာမက်) ကို ပြောတာလား” ဟူ၍ ဖြစ်ပေမည်။ ရှေးဦးစွာ မဖြေဆိုခင် “မသက်ဆိုင်ကြောင်းရှင်းလင်းချက်” (Disclaimer) ကို အရင်ပြုလုပ်လိုပါသည်။
မသက်ဆိုင်ကြောင်းရှင်းလင်းချက် (Disclaimer)
~~~~~~~~~~~~~~~~~~~~~
၁။ ယခုတုံ့ပြန်ချက်သည် ခရစ်ယာန်ဘာသာဝင်များမှ အစ္စလာမ်ဘာသာဝင် မွတ်စလင်များအား ဘာသာရေးတိုက်ခိုက်ခြင်း လုံးဝမဟုတ်ပါ။ အစ္စလာမ်ဘာသာရေးဆရာများမှ ခရစ်ယာန်သမ္မာကျမ်းချက်များကို လိုရာစွဲသုံး၍ အများသူငှါ အထင်အမြင်လွဲမှားစေသောကြောင့် ပြန်လည်တုံ့ပြန်ခြင်းသာဖြစ်ပါသည်။ အကယ်၍ ယခုကဲ့သို့ တုံ့ပြန်ချက်များကို မကြားလို၊ မမြင်တွေ့လိုပါက မိမိတို့၏ အီမာန်ဆရာများအား ခရစ်ယာန်သမ္မာကျမ်းစာကို မမှန်မကန် အသုံးပြု၍ ခရစ်ယာန်ဘာသာအား အများသူငှါအထင်အမြင်လွဲမှားအောင် လုပ်ဆောင်ခြင်းများအား မပြုလုပ်ကြဖို့ရန်နှင့် ထိုသို့လုပ်ဆောင်ခြင်းမျိုးအား ရပ်တန့်စေဖို့ရန်သာ အစ္စလာမ်ဘာသာဝင် အချင်းချင်းတိုက်တွန်းနှိုးဆော်ကြပါဟု မေတ္တာရပ်ခံပါရစေ။
၂။ Online မှာ မြင်တွေ့နေရသော နှုတ်စည်းမစောင့်သည့် ခရစ်ယာန်တရားဟောဆရာအမည်ခံများစွာသည် မြန်မာနိုင်ငံနှစ်ခြင်းခရစ်ယာန်အသင်းတော်များနှင့် အခြားသောခရစ်ယာန်အသင်းတော်ကြီးများအား ကိုယ်စားမပြုပါ။ ထိုသူများသည် အသင်တို့၏ဘာသာတရားကို ပုတ်ခတ်ကောင်းပုတ်ခတ်ပေလိမ့်မည်။ ထိုသို့ပြုလုပ်ခြင်းသည် ၎င်းတို့၏ တသီးပုဂ္ဂလလုပ်ဆောင်ခြင်းမျိုးသာဖြစ်ပြီး မည်သည့်အသင်းတော်ကိုမှ ကိုယ်စားမပြုပါ။ ထိုသို့ အခြေအမြစ်မရှိ တဖက်ဘာသာတရားအား ပုတ်ခတ်ပြောဆိုခြင်းမျိုးအား မိမိတို့ နှစ်ခြင်းခရစ်ယာန်များမှလည်း အစ္စလာမ်ဘာသာဝင်များနှင့်အတူ ရှုံ့ချပါသည်။ ထို့အပြင် မည်သည့် ခရစ်ယာန်အသင်းတော်ကြီးများမှလည်း အခြားဘာသာတရားများအား ထိုကဲ့သို့ ပုတ်ခတ်ပြောဆိုခြင်းမျိုးအား မိမိတို့ တသက် တကြိမ်တခါမျှ မတွေ့မမြင်ဖူးပါ။ ထို့ကြောင့် ထို online မှ ပုဂ္ဂိုလ်များ၏ ပညာမဲ့သောလုပ်ရပ်ကို ကြည့်၍ ခရစ်ယာန်အသင်းတော်များအား တိုက်ခိုက်ခြင်းမျိုးအား ရှောင်ရှားကြပါရန် အစ္စလာမ်ဘာသာဝင်များအား မေတ္တာရပ်ခံပါရစေ။ ထိုနည်းတူ နှုတ်အိန္ဒြေမဆင်ခြင်ဘဲ သူများဘာသာတရားအား မဟုတ်မမှန် ပုတ်ခတ်ပြောဆိုသော ခရစ်ယာန်တရားဟောဆရာအမည်ခံများအားလုံး သခင်ခရစ်တော်ကို ရိုသေခန့်ငြားသောအားဖြင့် ထိုကဲ့သို့ မပြုလုပ်ကြပါရန် တိုက်တွန်းလိုပါသည်။
၃။ မေးခွန်းနှင့်ပတ်သက်၍ ယခုပြန်လည်တုံ့ပြန်ဖြေကြားရာတွင်လည်း မိမိတို့သည် အစ္စလာမ်ဘာသာဝင်များ အလေးအမြတ်ထားရာ ပုဂ္ဂိုလ်တပါးဖြစ်သည့် “မိုဟာမက်” အား ညွှန်းဆိုသည့်အခါတိုင်းတွင် အမည်နာမရှေ့၌ “တမန်တော်” ဟု ထည့်သွင်းဖြေကြားပေးပါမည်။ ထို့ကြောင့် မိမိတို့ λόγος (ThyLogos) အနေဖြင့် “တမန်တော် မုဟမ္မဒ်” ဟု သုံးနှုန်းပြောဆိုခြင်းသည် အစ္စလာမ်ဘာသာဝင်တို့အပေါ် အလေးအမြတ်ထား (mutual respect ပေး)၍ သုံးနှုန်းပေးခြင်းသာဖြစ်ပါသည်။ “မုဟမ္မဒ်” ဟူသည့် ပုဂ္ဂိုလ်အား မိမိတို့အနေဖြင့် ထာဝရဘုရား၏ပရောဖက်တပါးအဖြစ် ယုံကြည်လက်ခံခြင်းကြောင့် လုံးဝမဟုတ်ပေ။ ကျွန်ုပ်တို့ခရစ်ယာန်များသည် “မုဟမ္မဒ်” အား ထာဝရဘုရားသခင်၏ ပရောဖက်စေတမန်အဖြစ် ယုံကြည်မှုလုံးဝမရှိကြောင်း အတိအလင်း ကြိုတင်အသိပေးလိုပါသည်။
တုံ့ပြန်ဖြေရှင်းချက် (Our Response to all Christians and Muslims)
~~~~~~~~~~~
“သခင်ယေရှုနောက်ကြွလာမည့် “ဥပဇ္ဈာယ်ဆရာ” ဆိုတာ တမန်တော် မုဟမ္မဒ် (မိုဟာမက်) ကို ပြောတာလား” ဟူသည့်မေးခွန်းမျိုး ခရစ်ယာန်ဘာသာဝင်များအကြားထွက်ပေါ်လာခြင်းသည် မေးခွန်းမေးသူဖော်ပြထားသည့်အတိုင်း Zakir Naik ဟူသည့် မွတ်စလင်တရားဟောဆရာတဦးကြောင့်ဖြစ်ပါသည်။ စင်စစ် ဤငြင်းခုန်ပြောဆိုချက် (argument) သည် မွတ်စလင်ဓမ္မမိတ်ဆွေတို့အကြား အကြိုက်တွေ့သော ဒဏ္ဍာရီတပုဒ်ဖြစ်ကြောင်း စာရေးသူတို့ ခရစ်ယာန်ဘာသာဝင်များ သတိပြုမိသည်မှာ ကြာခဲ့ပြီဖြစ်ပါသည်။ ဦးစွာ Zakir Naik မည်သူဖြစ်ကြောင်း ကျွန်ုပ်တို့ အကျဉ်းချုပ်သိဖို့လိုပါသည်။
Zakir Naik ၏ အတ္ထုပတ္တိအကျဉ်းချုပ်
~~~~~~~~~~~~~~~~~~~~
Zakir Naik ၏ အမည်အပြည့်အစုံမှာ Zakir Abdul Karim Naik ဖြစ်ပါသည်။ သူဟာ အိန္ဒိယနွယ်ဖွား မွတ်စလင်တရားဟောဆရာတဦးဖြစ်ပြီး Islamic Research Foundation (IRF) နှင့် Peace TV ချယ်နယ်ရဲ့ တည်ထောင်သူနှင့်ဥက္ကဌလည်း ဖြစ်ပါသည်။ သူ့ကို ၁၉၆၅ ခုနှစ်၊ အောက်တိုဘာ ၁၈ ရက်တွင် မွေးဖွားခဲ့သည်။ သူသည် Topiwala National Medical College and B.Y.L. Nair Charitable Hospital, Mumbai ကောလိပ်၌ ဆေးပညာကို သင်ယူလေ့လာခဲ့သည်။ သူ့ကို ယနေ့ခေတ်မွတ်စလင်ကမ္ဘာ၏ ဦးသျှောင်များထဲမှ တဦးအဖြစ် အစ္စလာမ်ဘာသာဝင်များက ကြည်ညိုကြသည်။ ၎င်းကိုယ်တိုင်ကတော့ မိမိသည် မည်သည့်အစ္စလာမ့်ဓမ္မပညာကျောင်းဆင်းမှ ဖြစ်ပါသည်ဟူ၍ တရားဝင်ကြေညာပြောဆိုထားခြင်းမရှိသော်လည်း ၎င်းသည် Salafi School of Thought နှင့် နီးစပ်သူတဦးတော့ဖြစ်ဟန်တူသည်။ ထိုကဲ့သို့ အစ္စလာမ်ဘာသာဝင်များ ကြည်ညိုလေးစားသူတဦးဖြစ်သည့် Zakir Naik သည် လက်ရှိတွင် အိန္ဒိယအစိုးရမှ အလိုရှိနေသော တရားခံပြေးတဦးဖြစ်ပါသည်။ ၂၀၁၆ ခုနှစ်၌ ၎င်းသည် မလေးရှားနိုင်ငံ၌ ရောက်ရှိနေစဉ် ငွေကြေးခဝါချမှု (Money Laundary) ဖြင့် အိန္ဒိယအစိုးရ၏ စွဲချက်တင်ခြင်းခံခဲ့ရသည်။ ထိုစွပ်စွဲချက်များကို ၎င်းက ငြင်းဆိုထားသည်။ ထို့အပြင် အိန္ဒိယနိုင်ငံ ပြည်ထဲရေးဝန်ကြီးဌာနမှလည်း Zakir Naik အား “လူထုအကြား အမုန်းတရားပြန့်ပွားစေသော အစ္စလာမ်မစ်အစွန်းရောက်အယူဝါဒများဖြန့်ဝေသည်” ဟုဆိုကာ အမျိုးသားလုံခြုံရေးကို အကြောင်းပြု၍ (25th July, 2018) ရက်စွဲဖြင့် RED Corner Notice ထုတ်ပြန်ထားခဲ့သည်။ ထိုကိစ္စများကိုအကြောင်းပြု၍ ၎င်းရောက်ရှိနှင့်ပြီးဖြစ်သည့် အစ္စလာမ်မစ်နိုင်ငံဖြစ်သော မလေးရှားနိုင်ငံ၌ ခိုလှုံခဲ့ပြီး လက်ရှိတွင် အမြဲတမ်းနေထိုင်ခွင့် ရရှိထားသည်။ ၎င်း၏ Peace TV ချယ်နယ်အား ဘင်္ဂလားဒေ့ရှ်၊ ကနေဒါ၊ အိန္ဒိယ၊ သိရိလင်္ကာနှင့် ဗြိတိန်နိုင်ငံများတို့တွင် ပိတ်ပင်တားမြစ်ထားပါသည်။ အရှေ့တောင်အာရှနိုင်ငံတနိုင်ငံဖြစ်ပြီး မွတ်စလင်နိုင်ငံ နှစ်နိုင်ငံကြားထဲ၌ တည်ရှိသော စင်ကာပူကျွန်းနိုင်ငံငယ်လေးကမူ အစ္စလာမ်မစ်တရားဟောဆရာ Zakir Naik အား “အစ္စလာမ်မစ်အစွန်းရောက်အယူဝါဒများဖြန့်ဝေပြီး လူထုအကြား ကွဲပြားမှုဖြစ်အောင် သွေးထိုးလုပ်ဆောင်သည်” ဟုဆိုကာ အမျိုးသားလုံခြုံရေးကို အကြောင်းပြု၍ ၂၀၁၄ နှစ်မှစတင်ကာ ပြည်ဝင်ခွင့်ပိတ်ပင်ထားပါသည်။ အစ္စလာမ်ဘာသာကိုစွန့်ခြင်း (Apostasy) နှင့်ပတ်သက်၍ Zakir Naik ၏ ခံယူချက်မှာ ဘာသာစွန့်သူတိုင်းကို သေဒဏ်ပေးရန်မလိုအပ်ဟု ရှုမြင်သော်လည်း အစ္စလာမ်ဘာသာကို စွန့်ပယ်သူသည် ၎င်း၏ယုံကြည်ရာဘာသာသစ်အကြောင်းအား အခြားမွတ်စလင်များအား စည်ရုံးသိမ်းသွင်းပါက “သေဒဏ်” (Capital punishment) ပေးသင့်သည်ဟု ခံယူထားသူဖြစ်သည်။
စာရေးသူအမြင်။ အထက်ပါ အချက်အလက်များအရ Zakir Naik ဆိုသူသည် ငွေရေးကြေးရေးနှင့်ပတ်သက်၍ နာမည်ပျက်ရှိသူဖြစ်သည်။ သူသည် တကယ်ပဲ ငွေကြေးခဝါချသလား၊ မချသလားကတော့ သူကိုယ်တိုင်သာ သိပေမည်။ ထို့ကြောင့် ထိုကိစ္စနှင့်ပတ်သက်၍ မဝေဖန်လို။ သို့သော် အစ္စလာမ်ဘာသာကိုစွန့်ခြင်းနှင့်ပတ်သက်၍ ၎င်း၏ခံယူချက်သည် တခြားမွတ်စလင်ကမ္ဘာမှ လူအများစုကဲ့သို့ပင် အစွန်းရောက်သည်ကို တွေ့ကြရပေမည်။ မည်သည့်ခရစ်ယာန်ဘာသာဝင်တိုင်းပြည်တွင်ဖြစ်ဖြစ် လူတိုင်းသည် လွတ်လပ်စွာဘာသာစွန့်ပိုင်ခွင့်ရှိသလို အချက်အလက်ခိုင်လုံပါက ခရစ်ယာန်ဘာသာစွန့်သူသည် ဘာသာရေးဆရာများနှင့် အသင်းတော်များကို လွတ်လပ်စွာ ဝေဖန်ပြောဆိုပိုင်ခွင့်ရှိသည်။ သူယုံကြည်သည့်ဘာသာသစ်အကြောင်းအားလည်း လက်ခံနားထောင်သူ ခရစ်ယာန်ဘာသာဝင်ကာယကံရှင်မှ ခွင့်ပြုပါက လွတ်လပ်စွာ စည်းရုံးသိမ်းသွင်းပြောဆိုပိုင်ခွင့်ရှိသည်။ မည်သည့်အကြောင်းကြောင့်နှင့်မျှ ဘာသာစွန့်သူအား သို့မဟုတ် ခရစ်ယာန်ဘာသာကို ပုတ်ခတ်ပြောဆိုရေးသားသူအား “သေဒဏ်” ပေးရမည်ဟူ၍ မရှိပေ။ ထိုနည်းတူ ဟိန္ဒူဘာသာမှာသော်လည်းကောင်း၊ ဗုဒ္ဓဘာသာမှာသော်လည်းကောင်း၊ ရဟူဒီ (Judaism) ဘာသာမှာသော်လည်းကောင်း ထိုသို့ဘာသာစွန့်သူများအား၊ ကိုယ်စွန့်ခဲ့သော ဘာသာတရားအားပုတ်ခတ်ပြောဆိုသူများအား “သေဒဏ်” ပေးရမည်ဟူသည့် ဘာသာရေးဥပဒေ လုံးဝမရှိပေ။ အခြားသော ဘာသာတရားများ၌ “ဘာသာသာသနာညှိုးနွမ်းစေမှု”ဟူသည့် ဥပဒေမျိုးဖြင့် အရေးယူကြတာမျိုး ရှိနိုင်ပါသည်။ ဥပမာ … ငွေဒဏ် သို့မဟုတ် ထောင်ဒဏ်လောက်သာဖြစ်သည်။ အစ္စလာမ်ဘာသာတခုတည်း၌သာ “သေဒဏ်”ပေးသည့် ဘာသာရေးဥပဒေ (ရှာရီယာ) ရှိပေသည်။ ထို့အပြင် Zakir Naik ဟူသည့် ထိုသူကိုယ်တိုင်ပင် အစ္စလာမ်ဘာသာကို ဝေဖန်ထောက်ပြပြောဆိုသူများအား “သေဒဏ်” ပေးရန် ထောက်ခံအားပေးပြောဆိုသူဖြစ်သည်ကို တွေ့ရှိရသည်။ သို့သော် သူကိုယ်တိုင်ကတော့ အခြားသောဘာသာတရားများ၏ ကျမ်းဂန်များကို လိုရာစွဲသုံး၍ ပေါ်ပေါ်ထင်ထင်ဝေဖန်ပြောဆိုလေ့ရှိသူဖြစ်ပြီး ထိုနည်းကိုပဲ အသုံးပြုပြီး မွတ်စလင်များကိုသော်လည်းကောင်း၊ အခြားသောဘာသာဝင်များကိုသော်လည်းကောင်း စည်းရုံးသိမ်းသွင်းလေ့ရှိသူတဦးဖြစ်ပေသည်။ အထက်ပါ နိုင်ငံတကာအစိုးရဌာနများ၏ ထုတ်ပြန်ချက်များအရ Zakir Naik သည် ကိုယ်ရေးရာဇဝင်နောက်ကြောင်းကင်းရှင်းသူတော့ မဟုတ်သည်ကို ကျွန်ုပ်တို့သိရှိထားရသည်။ ထို့ပြင် ၎င်းသည် ခရစ်ယာန်ကျမ်းစာကိုသော်လည်းကောင်း၊ တခြားဘာသာတရားတပါးပါး၏ ကျမ်းဂန်များကို ကိုးကားရာတွင်လည်းကောင်း ရိုးသားမှုမရှိ ဗြောင်လိမ်သူဖြစ်သည်ကို ၎င်း၏အတ္ထုပတ္တိအကျဉ်းချုပ်ကို လေ့လာခြင်းဖြင့် အကြမ်းဖျင်းသိရှိနိုင်သည်။ သခင်ယေရှုနောက်ကြွလာမည့် “ဥပဇ္ဈာယ်ဆရာ” ဆိုတာ တမန်တော် မုဟမ္မဒ် (မိုဟာမက်) ကို ပြောတာဟုတ်မဟုတ် အောက်ပါ ခေါင်းစဉ်များတွင် ဆက်လေ့လာကြည့်ကြဖို့ရန် ဖိတ်ခေါ်အပ်ပါသည်။
“ဥပဇ္ဈာယ်ဆရာ” ၏ ဝေါဟာရအဓိပ္ပါယ်
~~~~~~~~~~~~~~~~~~~~~
သခင်ယေရှုနောက်ကြွလာမည့် “ဥပဇ္ဈာယ်ဆရာ” ဆိုတာ တမန်တော် မုဟမ္မဒ် ကို ရည်ညွှန်းပြောဆိုထားခြင်းဖြစ်သည်ဟူ၍ Zakir Naik ကိုးကားပြောဆိုသည့် ကျမ်းပိုဒ်မှာ ရှင်ယောဟန်ခရစ်ဝင် ၁၆:၇ မှ ဖြစ်ပါသည်။
“ငါ အ မှန် အ ကန် ဆို သည် ကား၊ ငါ သွား လျှင် သင် တို့ အ ကျိုး ရှိ လိမ့် မည်။ အ ကြောင်း မူ ကား၊ ငါ မ သွား လျှင် ဥ ပ ဇ္ဈာယ် ဆ ရာ သည် သင် တို့ ဆီ သို့ မ လာ။ ငါ သွား လျှင် ထို သူ ကို သင် တို့ ဆီ သို့ ငါ စေ လွှတ် မည်။”
~ သခင်ယေရှု
ခရစ်ယာန်များ ယုံကြည်သည်မှာ သခင်ယေရှုနောက်ကြွလာမည့် ထို “ဥပဇ္ဈာယ်ဆရာ” မှာ “သန့်ရှင်းသောဝိညာဉ်တော်ဘုရား” ဖြစ်သည်ဟူ၍ဖြစ်သည်။ သို့သော် Zakir Naik က ထိုကျမ်းကို ကိုးကား၍ ထို “ဥပဇ္ဈာယ်ဆရာ” သည် “တမန်တော် မုဟမ္မဒ်” ဖြစ်သည်ဟု အခိုင်အမာပြောဆိုသည်။ Zakir Naik ၏ နောက်လိုက် မွတ်စလင်အများစုသည်လည်း ထိုကဲ့သို့ အခိုင်အမာပြောဆို၍ ခရစ်ယာန်ဘာသာဝင်များအား စည်းရုံးသိမ်းသွင်းဘာသာဆွယ်လေ့ရှိကြသည်။ ဘယ်သူမှန်သနည်း။ ခရစ်ယာန်များ မှန်သလော၊ မွတ်စလင်တို့ မှန်သလော။ ထိုအရာကို ပိုင်းခြားတတ်စေရန် ဆရာယုဒသန် ပြန်ဆိုပေးထားသည့် “ဥပဇ္ဈာယ်ဆရာ” ၏ အဓိပ္ပါယ်ကို ဦးစွာလေ့လာကြမည်။ ပါဠိမြန်မာအဘိဓာန်တွင် ဤသို့ဆိုထားသည်။
ဥပဇ္ဈာယ်ဆရာ (နာမ်)
အသံထွက်။ ။ “အုပျစ်ဇယ်ဆယာ”
အဓိပ္ပါယ်။ ။ တပည့်ရဟန်း သာမဏေအား ကြည့်ရှုဆုံးမရသော ဆရာရင်း။
ဤစကားလုံးအတွက် မူရင်းဂရိသမ္မာကျမ်းစာတွင် Παράκλητος ဟူသည့် စကားလုံးကို အသုံးပြုထားသည်။ Paráklitos (ပါရာကလိတို့စ်) ဟု အသံထွက်နိုင်သည်။ အင်္ဂလိပ်လိုဆိုလျှင် an intercessor, counselor: advocate, comforter ဟူ၍ အဓိပ္ပါယ်ရသည်။ ထို့ကြောင့်ပဲ အင်္ဂလိပ်ကျမ်းစာများတွင် The Comforter (KJV), The Helper (ESV & NKJV), The Counselor (HCSB) ဟူ၍ အသီးသီးပြန်ဆိုပေးထားသည်။ ထိုစကားလုံးကို ဆရာကြီးယုဒသန်က “ဥပဇ္ဈာယ်ဆရာ” ဟု ပြန်ဆိုပေးခဲ့သည်။ ထိုပါဠိစကားလုံးသည် အင်မတန်အဆင့်အတန်းမြင့်မားပြီး ကျမ်းဂန်ဆန်စေသည့်အပြင် မူရင်းဂရိစာလုံးနှင့်လည်း အဓိပ္ပါယ်တထပ်တည်းကျစေသည့်အတွက် စာရေးသူ သဘောကျနှစ်ခြိုက်ပါသည်။ ထို့အပြင် ဗုဒ္ဓဘာသာဝင်အများစုရှိရာ ပါဠိစာနှင့်ရင်းနှီးကျွမ်းဝင်ထားသည့် သူများအတွက် နားလည်လွယ်စေသည်။ မြန်မာ့စံမီသမ္မာကျမ်းတွင်တော့ Παράκλητος ကို “ကူညီမစသူ” ဟူ၍ ယနေ့ခေတ်မြန်မာစကားပြောသူများ နားလည်လွယ်စေသည့် ရိုးစင်းသောမြန်မာစကားလုံးကို အသုံးပြုပေးထားသည်။ ဤကဲ့သို့ပြန်ဆိုခြင်းသည်လည်း သင့်တော်လျောက်ပတ်သည်ဟု စာရေးသူရှုမြင်ပါသည်။
ထို့ကြောင့် “ဥပဇ္ဈာယ်ဆရာ” ၏ ဝေါဟာရအဓိပ္ပါယ်မှာ “တပည့်ရဟန်း သာမဏေအား ကြည့်ရှုဆုံးမရသော ဆရာရင်း” ဟူဖြစ်သည်။ ဤရှင်ယောဟန်ခရစ်ဝင်ကျမ်း ၁၆ သည် သခင်ယေရှုခရစ်တော်ဘုရားမှ ကိုယ်တော်ရှင်၏ နောက်လိုက်တပည့်သာဝကများ (တမန်တော်များ) အား မှာကြားနေခဲ့သော နှုတ်ကပတ်တော်များ ဖြစ်ပါသည်။
တမန်တော် မုဟမ္မဒ်ကို အလ္လာဟ်သျှင်မြတ်က စေလွှတ်သလော၊ ခရစ်တော်သခင် ယေရှုရှင်က စေလွှတ်သလော
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ထိုဥပဇ္ဈာယ်ဆရာ (The Comforter) ဟူသည့် ဝေါဟာရကြောင့် Zakir Naik နဲ့ သူ၏နောက်လိုက် မွတ်စလင်များက သခင်ယေရှုမိန့်တော်မူသည့် သူ့နောက်ကြွလာမည့် ကူညီမစသူ သည် ဘုရားမဖြစ်နိုင်၊ လူသာလျှင် ဖြစ်ရမည်။ ထို့ကြောင့် ဤဥပဇ္ဈာယ်ဆရာသည် ၎င်းတို့၏ တမန်တော် မုဟမ္မဒ် ဖြစ်သည်ဟု အခိုင်အမာပြောဆိုကြသည်။ ၎င်းတို့၏ တမန်တော် မုဟမ္မဒ် ကြွလာသည့်အခါ “သ မ္မာ တ ရား ကို သင် တို့ အား အ ကြွင်း မဲ့ သွန် သင် ပြ သလိမ့် မည် … နောင် လာ လ တ္တံ့ သော အ ရာ တို့ ကို လည်း သင် တို့ အား ဖော် ပြ လိမ့် မည်။” ဟု ဆိုကြပြီး သခင်ယေရှုကိုယ်တော်တိုင်ပင် တမန်တော် မုဟမ္မဒ်ကြွလာမည့်အကြောင်း ပရောဖက်ပြုခဲ့သည် ဟူ၍ အခိုင်အမာပြောဆိုကြပါသည်။ ထိုအဆိုသည် ဟုတ်မှန်ပါသလော၊ ရိုးသားဖြောင့်မတ်ပါ၏လော။
မွတ်စလင်တိုင်းသည် တမန်တော် မုဟမ္မဒ်ကို အလ္လာဟ်သျှင်မြတ်က စေလွှတ်ခြင်းဖြစ်သည် ဟု ယုံကြည်ကြပါသည်။ ထိုသို့ ယုံကြည်သည့် မွတ်စလင်တိုင်းအတွက် ရှင်ယောဟန်ခရစ်ဝင် ၁၆:၇ ကို ကိုးကားပြီး သခင်ယေရှုကိုယ်တော်တိုင်ပင် တမန်တော် မုဟမ္မဒ်ကြွလာမည့်အကြောင်း ပရောဖက်ပြုခဲ့သည် ဟူ၍ အခိုင်အမာပြောဆိုခြင်းသည် သခင်ယေရှုကို မွတ်စလင်တို့ကိုယ်တိုင်ပင် အလ္လာဟ်သျှင်မြတ်ဟု သမုတ်လိုက်ခြင်းမည်ပေ၏။ ဤ ရှင်ယောဟန် ၁၆:၇ ကို ယူပြီး ကူညီမစပေးမည့်သူ (The Comforter)က တမန်တော် မုဟမ္မဒ်ဖြစ်သည် ဟု အခိုင်အမာပြောဆိုပါက ထိုကဲ့သို့ ပြောဆိုသူသည် သခင်ယေရှုအား တမန်တော်မုဟမ္မဒ်အား စေလွှတ်သော အလ္လာဟ်သျှင်မြတ် (ဘုရားသခင်)အဖြစ် သတ်မှတ်လိုက်ခြင်းပင် မည်၏။ ထိုကျမ်းပိုဒ်ကို သေချာပြန်ဖတ်ကြည့်ပါ။
“ငါ အ မှန် အ ကန် ဆို သည် ကား၊ ငါ သွား လျှင် သင် တို့ အ ကျိုး ရှိ လိမ့် မည်။ အ ကြောင်း မူ ကား၊ ငါ မ သွား လျှင် ဥ ပ ဇ္ဈာယ် ဆ ရာ သည် သင် တို့ ဆီ သို့ မ လာ။ ငါ သွား လျှင် ထို သူ ကို သင် တို့ ဆီ သို့ ငါ စေ လွှတ် မည်။”
~ သခင်ယေရှု
ငါ သွား လျှင် ထို သူ ကို သင် တို့ ဆီ သို့ ငါ စေ လွှတ် မည်။ ထိုကျမ်းပိုဒ်မှာ အတိအလင်းဖော်ပြထားသည်မှာ
ဥပဇ္ဈာယ်ဆရာ ကို စေလွှတ်မည့် သူမှာ သခင်ယေရှုကိုယ်တော်တိုင်ပင် ဖြစ်သည်။
စာဖတ်သူသည် ခရစ်ယာန်ဘာသာဝင်တဦးဆိုလျှင် ယခုကဲ့သို့ ကျမ်းချက်များကို တချက်ချင်းရှင်းပြကာ ၎င်းတို့၏ ယုတ္တိအမှားကို မြင်အောင်ပြပါဟု အကြုံပြုလိုပါသည်။
မွတ်စလင် ဓမ္မမိတ်ဆွေများကိုတော့ စာရေးသူ သေသေချာချာ စဉ်းစားဆင်ခြင်စေသည့်အရာမှာ မိမိတို့၏ “တမန်တော် မုဟမ္မဒ်ကို အလ္လာဟ်သျှင်မြတ်က စေလွှတ်သလော၊ ခရစ်တော်သခင် ယေရှုရှင်က စေလွှတ်သလော” ဟူသည့်မေးခွန်းကို မိမိကိုယ်ကို ပြန်မေးပါ။ အကယ်၍ အလ္လာဟ်သျှင်မြတ်က စေလွှတ်သည်ဟု ယုံကြည်ပါက ကျွန်ုပ်တို့ ခရစ်ယာန်သမ္မာကျမ်းစာချက်များကို လိုရာဆွဲ၍ မိမိစိတ်ထင်သလိုပြောဆိုလေ့ရှိသော မိတ်ဆွေတို့ရဲ့ ဆရာသမား Zakir Naik ၏ အခိုင်အမာပြောဆိုချက်များသည် ရိုးသားမှန်ကန်မှုမရှိကြောင်း လက်ခံနိုင်ပါစေ။
သခင်ခရစ်တော်၏နှုတ်ကပတ်တော်အရ ဥပဇ္စျာယ်ဆရာအား မည်သူကစေလွှတ်၍ ထိုအရှင်သည် မည်သူ့ထံမှ ကြွလာတော်မူသောသူနည်း
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
“ခ မည်း တော် ထံ မှ ထွက် လာ၍ (From The Father, not from Allah) သ မ္မာ တ ရား နှင့် ပြည့် စုံ သော ဝိ ညာဉ် တော် တည်း ဟူ သော ခ မည်း တော် ထံ မှ သင် တို့ ဆီ သို့ ငါ စေ လွှတ် လ တ္တံ့ သော ဥ ပ ဇ္ဈာယ် ဆ ရာ သည် ရောက် လာ သော အ ခါ၊ ငါ၏ အ ကြောင်း ကို သက် သေ ခံ လိမ့် မည်။- သင် တို့ သည် လည်း ရှေ့ ဦး စွာ မှ စ၍ ငါ နှင့် အ တူ ရှိ နေ သော ကြောင့် သက် သေ ခံ ရ ကြ လိမ့် မည်။” ~ သခင်ယေရှု (ရှင်ယောဟန် ၁၅:၂၆-၂၇ ~ ဆရာကြီး ယုဒသန် ဘာသာပြန်ကျမ်း)
“ခမည်းတော် ထံမှ သင် တို့ ထံသို့ ငါ စေလွှတ် မည့် ကူညီ မစ သူ တည်းဟူသော ခမည်းတော် ထံမှ လာ သည့် သမ္မာတရား ၏ ဝိညာဉ် တော် ရောက်လာ သောအခါ ငါ့ အကြောင်း ကို သက်သေခံ လိမ့်မည်။ သင် တို့ သည် လည်း အစအဦး က ပင် ငါ နှင့်အတူ ရှိ ကြ သောကြောင့် သက်သေခံ ကြ လိမ့်မည်။” ~ သခင်ယေရှု (ရှင်ယောဟန် ၁၅:၂၆-၂၇ ~ မြန်မာ့စံမီသမ္မာကျမ်း)
“But when the Helper comes, whom I shall send to you from the Father, the Spirit of truth who proceeds from the Father, He will testify of Me. And you also will bear witness, because you have been with Me from the beginning.” ~ Lord Jesus Christ (John 15:26-27 ~ New King James Version)
ဥပဇ္ဈာယ်ဆရာ တည်းဟူသော ကူညီမစမည့်သူအား မည်သူက စေလွှတ် ? — သခင်ယေရှုက “ငါစေလွှတ်မည်” (I shall send) လို့ မိန့်တော်မူပါသည်။
ဥပဇ္ဈာယ်ဆရာ တည်းဟူသော ကူညီမစမည့်သူသည် မည်သူ့ထံတော်မှ ကြွလာ ? — သခင်ယေရှုက “ခမည်းတော်ထံတော်မှ” (From the Father) ကြွလာတော်မူလိမ့်မည်ဟု မိန့်တော်မူပါသည်။
ထို့ကြောင့် ခရစ်ယာန်တယောက်အနေဖြင့် မွတ်စလင်တယောက်အား ပြန်လည်မေးနိုင်သည့်အရာမှာ “သင်တို့၏ တမန်တော် မုဟမ္မဒ်သည် ခမည်းတော်ထံတော်မှ ကြွလာသလော၊ အလ္လာဟ်ဆီမှ လာသလော” ဟူသည့် မေးခွန်းပင်ဖြစ်ချေသည်။
ခရစ်ယာန်များအပါအဝင် မွတ်စလင်များ ထင်မှတ်မှားနေသည့် ဒဏ္ဍရီတခုက “မွတ်စလင်တို့၏ အလ္လာဟ် (The Allah) နှင့် ခရစ်ယာန်တို့၏ ခမည်းတော်ဘုရားသခင် (The Father) က အတူတူပဲ” ဟူ၍ ဖြစ်သည်။
စင်စစ်သော်ကား ထိုသို့မဟုတ်ပါ။ မွတ်စလင်များသည် အလ္လာဟ်သျှင်မြတ်အား ဖခမည်းတော်ဘုရားသခင်အဖြစ် လုံးဝ မယုံကြည်ပါ။ ၎င်းတို့၏ ကုရ်အာန်ကျမ်း၌ အတိအလင်းဖော်ပြထားပါသည်။
ကုရ်အာန် (၁၁၂:၃)
لَمْ يَلِدْ وَلَمْ يُولَدْ ٣
He neither begets nor is born,
အရှင်မြတ်သည် မည်သူတစ်ဦးတစ်ယောက်ကိုမှ မွေးဖွားတော်မူခဲ့သည်မဟုတ်ပေ။ မည်သူ တစ်ဦးတစ်ယောက်၏ မွေးဖွားခြင်းကိုမှလည်း ခံခဲ့ရတော်မမူပေ။
ကုရ်အာန် (၂:၁၁၆)
وَقَالُوا۟ ٱتَّخَذَ ٱللَّهُ وَلَدًۭا ۗ سُبْحَـٰنَهُۥ ۖ بَل لَّهُۥ مَا فِى ٱلسَّمَـٰوَٰتِ وَٱلْأَرْضِ ۖ كُلٌّۭ لَّهُۥ قَـٰنِتُونَ ١١٦
They say, “Allāh has taken a son.” Exalted is He! Rather, to Him belongs whatever is in the heavens and the earth. All are devoutly obedient to Him,
2|116| ထို(ခရစ်ယာန်) တို့သည် အလ္လာဟ် အရှင်မြတ်၌ သားတော်ရှိသည်ဟူ၍ (မဟုတ်မလျား စွပ်စွဲ) ပြောဆိုကြကုန်၏။ (ဤစကားသည် မှားလေစွ၊ အကြောင်းမှာ) အလ္လာဟ် အရှင်မြတ်သည် (ဃရာဝါသ အိမ်ထောင်မှုကိစ္စတို့မှ) လုံးလုံးကင်းစင်တော်မူသော အရှင်တည်း။ စင်စစ်တမူကား မိုးကောင်းကင်နှင့် ပထဝီမြေပြင်၌ ရှိရှိသမျှသော အရာခပ်သိမ်းတို့ကို အလ္လာဟ် အရှင်မြတ်သာလျှင် ပိုင်ဆိုင်တော်မူ၏။ ထိုထိုသော အရာခပ်သိမ်းတို့ သည်လည်း ထိုအရှင်မြတ်၏ အမိန့်တော်ကို နာခံလျက် ရှိကြကုန်၏။
မှတ်ချက်။ ။ အင်္ဂလိပ်၊ မြန်မာဘာသာပြန် ကုရ်အာန်ကျမ်းများရှိ ကွင်းခတ်ထားသော ( ဘာညာသာရကာ ) စာများသည် မူရင်း အာရဗစ်စာတွေ မပါရှိပါ။ မွတ်စလင်ဘာသာပြန်အဖွဲ့အစည်း သို့မဟုတ် လူပုဂ္ဂိုလ်၏ တသီးပုဂ္ဂလဖြည့်စွက်ရှင်းပြချက်များသာဖြစ်ပါသည်။ ခရစ်ယာန်ညီကိုမောင်နှမများအား အစ္စလာမ်အသုံးနှုန်းများအား ဗဟုသုတအနေဖြင့်ဖော်ပြရသော် ၎င်းတို့သည် အခန်းကြီး (ခေါ်) ကဏ္ဍကို “စူရာဟ်” (Surah) ဟူ၍လည်းကောင်း၊ အခန်းငယ်ကိုမူ “အာရာသ်” (Ayat) ဟူ၍လည်းကောင်း ခေါ်တွင်ကြပါသည်။ ထိုစကားလုံးများသည် အာရဗစ်စာလုံးမှ တိုက်ရိုက်အသံထွက်ပြန်ဆိုထားကြခြင်းဖြစ်ပါသည်။ ထို့အပြင် ကုရ်အာန်ကျမ်း၌ ကျွန်ုပ်တို့ သမ္မာကျမ်းစာကဲ့သို့ပင် အခန်းကြီးနာမည်များအသီးသီးရှိကြပါသည်။
ထို့ကြောင့် အထက်ပါ ကုရ်အာန် (၂:၁၁၆) အား နှုတ်ဖြင့်အသံထွက်ဖတ်သော် ဤသို့ ဖတ်ပါသည် “စူရာဟ် ဘကရာ အာရာသ် တရာတဆယ့်ခြောက်”
မည်သို့ပင်ဆိုစေကာမူ၊ အထက်ပါ ကုရ်အာန်စာပိုဒ်များအရသော်လည်းကောင်း၊ မွတ်စလင်တို့၏ ယုံချက်အရသော်လည်းကောင်း အလ္လာဟ်သည် မည်သူတဦးတယောက်၏ ဖခင်/ဖခမည်းတော် မဟုတ်ပေ။ ထို့ကြောင့် သခင်ယေရှုပြောသော ခမည်းတော်ဘုရားသခင်နှင့် အလ္လာဟ်သည် တူညီသော ဘုရားသခင် မဟုတ်ချေ။ အကယ်၍ သခင်ယေရှုနောက် ကြွလာတော်မူမည့် ဥပဇ္ဈာယ်ဆရာ တည်းဟူသော ကူညီမစမည့်သူသည် မွတ်စလင်တို့၏ တမန်တော်မုဟမ္မဒ်ဖြစ်သည် ဆက်လက်ပြီး အခိုင်အမာပြောဆိုနေကြပါက မွတ်စလင်ဓမ္မမိတ်ဆွေတို့ ကိုယ်တိုင်ပင် တမန်တော်မုဟမ္မဒ်အား အလ္လာဟ်စေလွှတ်ခြင်းမဟုတ်ဘဲ သခင်ယေရှုကိုယ်တော်တိုင် စေလွှတ်တော်မူသည်ဟု သက်သေခံရုံသာမက တမန်တော် မုဟမ္မဒ်သည် အလ္လာဟ်သျှင်မြတ်ထံမှ ကြွလာသောသူမဟုတ်ဘဲ ဖခမည်းတော်ဘုရားသခင် (God The Father) ထံတော်မှ ကြွလာသည်ဟု သက်သေခံရာရောက်သောကြောင့် မိမိတို့ကိုယ်တိုင်ပင် အလ္လာဟ်နှင့် ကုရ်အာန်ကျမ်း၏ မိန့်ဆိုချက်များသည် မှားယွင်းနေသည်ဟု ခံယူရာရောက်နေသည်ကို စာရေးသူမြင်စေချင်ပါသည်။
ခရစ်တော်သခင် ယေရှုရှင်စေလွှတ်တော်မူသော ဥပဇ္စျာယ်ဆရာကား အဘယ်သူနည်း
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
ထိုမေးခွန်းအတွက် သင်နှင့်ကျွန်ုပ် တကူးတက စဉ်းစားရန်ပင် မလိုပါ။ “ဥပဇ္စျာယ်ဆရာကို ငါ စေလွှတ်မည်” ဟု မိန့်တော်မူခဲ့သော ခရစ်တော်သခင် ယေရှုရှင် ကိုယ်တော်တိုင် ကြိုတင်ဖြေခဲ့ပြီး ဖြစ်ပါသည်။ ထို့ကြောင့် ရှင်ယောဟန်ခရစ်ဝင် ၁၆:၇ မှာပဲ ရပ်မနေဘဲ အောက်နားက အပိုဒ်ငယ်လေးတွေကို ဆက်ဖတ်ပါ။ ဤသည်ကား၊ စာတတ်သူတို့၏ ကျမ်းဂန်စာပေဖတ်ရှုလေ့လာနည်းပင် ဖြစ်သတည်း။ ကျွန်ုပ်တို့သည် အကြောင်းအရာတစုံတခုကို သေချာနားလည်လိုသည့်အခါ စာကို တပိုင်းတစသာ ဖတ်ပြီး ဖြစ်သလို မတွေးဘဲ ပညာရှိသူပီပီ အခန်းကြီးတခန်းလုံးအား ဆက်ဖတ်သွားပါက သခင်ယေရှု အဘယ်အရာများမိန့်ကြားခဲ့လိုသည်ကို ကောင်းစွာနားလည်သဘောပေါက်လာပါလိမ့်မည်။
“သင် တို့ အား ငါ ပြော စ ရာ စ ကား အ များ ရှိ သော် လည်း၊ သင် တို့ သည် ယ ခု မ ခံ နိုင် ကြ။-
သ မ္မာ တ ရား နှင့် ပြည့် စုံ သော ထို ဝိ ညာဉ် တော် (The Spirit) သည် ရောက် လာ သော အ ခါ၊ သ မ္မာ တ ရား ကို သင် တို့ အား အ ကြွင်း မဲ့ သွန် သင် ပြ သလိမ့် မည်။
ထို ဝိညာဉ်တော် (The Spirit) သည် ကိုယ် အ လို အ လျောက် ဟော ပြော မည် မ ဟုတ်။ ကြား သ မျှ တို့ ကို ဟော ပြော လိမ့် မည်။ နောင် လာ လ တ္တံ့ သော အ ရာ တို့ ကို လည်း သင် တို့ အား ဖော် ပြ လိမ့် မည်။-
ထို သူ သည် ငါ့ ဘုန်း ကို ထင် ရှား စေ လိမ့် မည်။ အ ကြောင်း မူ ကား၊ ငါ နှင့် စပ် ဆိုင် သော အ ရာ ကို ယူ၍ သင် တို့ အား ဖော် ပြ လိမ့် မည်။- ခ မည်း တော် နှင့် စပ် ဆိုင် သ မျှ သည် ငါ နှင့် စပ် ဆိုင်၏။ ထို ကြောင့် ငါ နှင့် စပ် ဆိုင် သော အ ရာ ကို ယူ၍ သင် တို့ အား ဖော် ပြ လိမ့် မည် ဟု ငါ ပြော၏။”
~ သခင်ယေရှု (ရှင်ယောဟန်ခရစ်ဝင် ၁၆:၁၂-၁၅)
ထို့ကြောင့် ထိုဥပဇ္စျာယ်ဆရာ (ကူညီမစမည့်သူ) မှာ သန့်ရှင်းသောဝိညာဉ်တော်ဘုရား (God The Holy Spirit) ဖြစ်ကြောင်း သခင်ယေရှုဘုရား ကိုယ်တော်တိုင်ပင် မိန့်တော်မူခဲ့ပြီးဖြစ်ပါသည်။ ကျမ်းဂန်စာပေကို ရိုးသားစွာဖတ်လျှင်သော်လည်းကောင်း၊ စာပေအသွားအလာ၏ ရှေ့နောက်ဆက်စပ်မှုကိုသော်လည်းကောင်း ဖတ်ရှုဆင်ခြင်ကြည့်သော် Zakir Naik အခိုင်အမာပြောဆိုသည့် “ထိုဥပဇ္စျာယ်ဆရာ (ကူညီမစမည့်သူ) မှာ ၎င်းတို့၏ တမန်တော် မုဟမ္မဒ်ဖြစ်သည်” ဆိုသည်မှာ စိုးစဉ်းမျှအဓိပ္ပါယ်အခြေအမြစ်မရှိသည်ကို အတိုင်းသားတွေ့နိုင်ပါသည်။ ဝိညာဉ်တော် (The Spirit) သည် ကျွန်ုပ်တို့ လူသားများကဲ့သို့ အရိုး၊ အသား ရုပ်ခန္ဓာ (Flesh) မရှိပါ။
ကုရ်အာန်ကျမ်းအရ တမန်တော် မုဟမ္မဒ်သည် ဝိညာဉ်တော် (The Spirit) ဟုတ်ပါသလော
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
မွတ်စလင်တို့က အလ္လာဟ်သျှင်မြတ်၏ နှုတ်ကပတ်တော်ဟု ယုံကြည်သော ကုရ်အာန်ကျမ်းထဲ၌ပင် တမန်တော် မုဟမ္မဒ်သည် ဝိညာဉ်တော် (The Spirit) မဟုတ်ကြောင်း အတိအလင်းဖော်ပြထားရုံသာမက ထိုဝိညာဉ်တော် (Spirit) သည် ကောင်းကင်တမန်လည်း (angel) မဟုတ်ဘဲ အမြဲတမ်း The Spirit and angels ဟူ၍ ခွဲပြောထားသည့် အာရာသ် (အခန်းငယ်) အချို့ကို အံ့ဩဖွယ်တွေ့ရပါသည်။ ထို့အပြင် ကုရ်အာန်ကျမ်း၌ဖော်ပြသော ဝိညာဉ်တော် (The Spirit) သည် အရိုး၊ အသား ခန္ဓာရှိသော လူပုဂ္ဂိုလ်လည်း မဖြစ်နိုင်ပေ။ အောက်ဖော်ပြပါကျမ်းချက်များ၏ မြန်မာကုရ်အာန်ဗားရှင်းများ၌မူ “ဝိညာဉ်တော် (Spirit/Ruh)” ဟု ရေးထားသည့်နေရာတိုင်း၌ “ဝဟီ (ခေါ်) ဗျာဒိတ်တော် (Revelation (or) Inspiration/Wahyi)” ဟု ပြင်ဆင်ပြန်ဆိုထားသည်ကို တွေ့ရပြီး မူရင်း အာရဗစ်၌ ထို ဝဟီ (وحي) စကားလုံး မပါရှိပေ။ အာရဗစ်၌ “ရုဟ်ခ်” (رُوحٌ) သို့မဟုတ် (روح) ဟုသာ ပါရှိကြောင်း မူရင်းအာရဗစ်ကုရ်အာန်စာလုံးများနှင့် Arabic Lexicon Dictionary များ၏ လင့်ခ် အတိအကျဖြင့် “ကိုးကားကျမ်းဂန်၊ စာအုပ်များနှင့် ဆောင်းပါးများ” ၌ ထိမ်ဝှက်ခြင်းအလျင်းမရှိ၊ အတိအလင်း စာရေးသူ ဖော်ပြထားပေးပါသည်။ စာရေးသူအား မယုံပါက ကိုယ်တိုင် သွားရောက်တိုက်စစ်၍ စာရေးသူမှားကြောင်း အလွယ်တကူသက်သေပြနိုင်ပါသည်။ မြန်မာမွတ်စလင်ဘာသာပြန်ဆရာများ မည်ကဲ့သို့သော ရည်ရွယ်ချက်ဖြင့် မူရင်းအာရဗစ်မှာ မပါသော စကားလုံး၊ အဓိပ္ပါယ်များကို သုံးနှုန်းပြန်ဆိုကြသလဲဆိုသည်ကိုတော့ ဘုရားသခင်နှင့် ၎င်းတို့ ဘာသာပြန်သူများသာ သိပေလိမ့်မည်။ စာရေးသူကိုယ်တိုင်ထိတွေ့ပြောဆိုဆွေးနွေးဖူးသော အချို့သော အီမာန်များကလည်း ထိုအာရဗစ်စာလုံး “ရုဟ်ခ်” (رُوحٌ) သို့မဟုတ် (روح) သည် လူများ၏ ဝိညာဉ် (souls) ကို ပြောခြင်းဖြစ်သည်ဟုလည်း အကြောင်းပြချက်ပေးတတ်ကြသည်ကို လေ့လာမှတ်သားဖူးပါသည်။ သို့သော် စာရေးသူလက်လှမ်းမှီသလောက် လေ့လာဆန်းစစ်ကြည့်ရာ အာရဗစ်တွင် ဝိညာဉ် (soul) အတွက် အသုံးပြုသော စကားလုံးကား သက်သက်ရှိပေသည်။ “နာ့ဖ်စ်” (نَفْسٌ) ဟူ၍ ဖြစ်သည်။ ၎င်းစာလုံးသည် ဖန်ဆင်းရှင်ဘုရားသခင်နှင့် မသက်ဆိုင်သော ဖန်ဆင်းခံများ၏ ဝိညာဉ် (soul / nafs) ကို ရည်ညွှန်းရာ၌ အသုံးပြုသောစကားလုံးဖြစ်သည်ကို လေ့လာတွေ့ရှိရပါသည်။ ဥပမာ မြန်မာစကားလုံး၌ပင် ထိုနည်း၎င်းဖြစ်ချေသည်။ “ဝိညာဉ်တော်” နှင့် “ဝိညာဉ်” ဟူသောစကားလုံးသည် ရုပ်ခန္ဓာမရှိခြင်း (non-physical) ဟူသည့် “စိတ်၊ အသက်” ဟူသည့် အဓိပ္ပါယ်ရှိပေသည်။ သို့သော် “ဝိညာဉ်တော်” ဟူသည့်စကားလုံးကိုတော့ ဖန်ဆင်းရှင်ဘုရားသခင်အတွက်သာ အသုံးပြုပြီး ကောင်းကင်တမန်များအတွက်ပင် အသုံးမပြုချေ။ “ဝိညာဉ်” ကိုတော့ ဖန်ဆင်းခံများအတွက်သာ အသုံးပြုသည်။ ထိုနည်းတူ အာရဗစ်၌လည်း “နာ့ဖ်စ်” (نَفْسٌ) သည် ဖန်ဆင်းခံ (non-physical part) ကို ရည်ညွှန်းရာ၌ သုံးလေ့ရှိပြီး “ရုဟ်ခ်” (رُوحٌ) သို့မဟုတ် (روح) ကိုတော့ ဖန်ဆင်းရှင် သို့မဟုတ် လူမဟုတ်သော ကောင်းကင်တမန်များကဲ့သို့ “supernatural being” များအတွက်သာ အသုံးပြုပါသည်။ ဤ အောက်ဖော်ပြပါ ကုရ်အာန်ကျမ်းချက်များ၌ အသုံးပြုထားသော စကားလုံးမှာ ဝဟီ (وحي) လည်း မဟုတ်၊ “နာ့ဖ်စ်” (نَفْسٌ) လည်း မဟုတ်၊ “ရုဟ်ခ်” (روح) ကိုသာ အသုံးပြုထားခြင်းဖြစ်ပြီး ၎င်း روح (The Spirit) ကို ကောင်းကင်တမန်များ (angels) များနှင့် အမြဲတမ်းခွဲခြားဖော်ပြထားသည်ကို တွေ့ရှိရသောကြောင့် ဤကျမ်းများတွင် သုံးထားသော روح (The Spirit) သည် angels များကိုလည်း ရည်ညွှန်းခြင်း မဖြစ်နိုင်ပါ။ ထို့ကြောင့်လည်း Muhammad Marmaduke Pickthall ကဲ့သို့သော English Islamic Scholar တယောက်ပင်လျှင် အောက်ပါအတိုင်း ဘာသာပြန်ထားသည်ကို https://quran.com/ တွင် ရှာဖွေဖတ်ရှုနိုင်ပါသည်။
16:2
يُنَزِّلُ ٱلْمَلَـٰٓئِكَةَ بِٱلرُّوحِ مِنْ أَمْرِهِۦ عَلَىٰ مَن يَشَآءُ مِنْ عِبَادِهِۦٓ أَنْ أَنذِرُوٓا۟ أَنَّهُۥ لَآ إِلَـٰهَ إِلَّآ أَنَا۠ فَٱتَّقُونِ ٢
He sendeth down the angels with the Spirit of His command unto whom He will of His bondmen, (saying): Warn mankind that there is no Allah save Me, so keep your duty unto Me.
70:4
تَعْرُجُ ٱلْمَلَـٰٓئِكَةُ وَٱلرُّوحُ إِلَيْهِ فِى يَوْمٍۢ كَانَ مِقْدَارُهُۥ خَمْسِينَ أَلْفَ سَنَةٍۢ ٤
(Whereby) the angels and the Spirit ascend unto Him in a Day whereof the span is fifty thousand years.
78:38
يَوْمَ يَقُومُ ٱلرُّوحُ وَٱلْمَلَـٰٓئِكَةُ صَفًّۭا ۖ لَّا يَتَكَلَّمُونَ إِلَّا مَنْ أَذِنَ لَهُ ٱلرَّحْمَـٰنُ وَقَالَ صَوَابًۭا ٣٨
On the day when the angels and the Spirit stand arrayed, they speak not, saving him whom the Beneficent alloweth and who speaketh right.
97:4
تَنَزَّلُ ٱلْمَلَـٰٓئِكَةُ وَٱلرُّوحُ فِيهَا بِإِذْنِ رَبِّهِم مِّن كُلِّ أَمْرٍۢ ٤
The angels and the Spirit descend therein, by the permission of their Lord, with all decrees.
ထို့ကြောင့် အထက်ပါ ကုရ်အာန်ကျမ်းချက်များကို ဖတ်ရှုခြင်းဖြင့် တမန်တော် မုဟမ္မဒ်သည် ဝိညာဉ်တော် (The Spirit) မဟုတ်ကြောင်း ရှင်းလင်းစွာတွေ့နိုင်ပါသည်။ ယခုအချိန်ထိ ခရစ်ယာန်သမ္မာကျမ်းစာအရသော်လည်းကောင်း၊ အစ္စလာမ် ကုရ်အာန်ကျမ်းအရသော်လည်းကောင်း သခင်ယေရှုကြိုတင်မိန့်တော်မူခဲ့သော ကိုယ်တော်နောက် ကြွလာတော်မူမည့် ဥပဇ္ဈာယ်ဆရာ တည်းဟူသော ကူညီမစမည့်သူသည် တမန်တော် မုဟမ္မဒ်ဖြစ်ကြောင်း သက်သေအထောက်အထား တစုံတရာမျှ မရှိပါချေ။
ဥပဇ္ဈာယ်ဆရာ တည်းဟူသော ကူညီမစမည့်သူကြွလာပါက မည်သည့်အမှုတော်မြတ်များကို လုပ်ဆောင်တော်မူမည်နည်း
~~~~~~~~~~~~~~~~~~~~~~~~~~~~~~~~~~~~~~~~~~~~~~~
“ဥ ပ ဇ္ဈာယ် ဆ ရာ သည် ရောက် လာ လျှင်၊ ဒု စ ရိုက် အ ပြစ် ကို လည်း ကောင်း၊ အ ပြစ် ကင်း ခြင်း ကို လည်း ကောင်း၊ အ ပြစ် စီ ရင် ခြင်း ကို လည်း ကောင်း၊ လော ကီ သား တို့ အား ထင် ရှား စွာ ဖော် ပြ မည်။- ငါ့ ကို မ ယုံ ကြည် ကြ သော ကြောင့် ဒု စ ရိုက် အ ပြစ် ကို ဖော် ပြ မည်။- ငါ သည် ခ မည်း တော် ထံ သို့ သွား မည် ဖြစ်၍၊ သင် တို့ သည် နောက် တစ် ဖန် ငါ့ ကို မ တွေ့ မ မြင် ရ သော ကြောင့်၊ အ ပြစ် ကင်း ခြင်း ကို ဖော် ပြ မည်။”
~ သခင်ယေရှု (ရှင်ယောဟန်ခရစ်ဝင် ၁၆:၈-၁၀)
“ငါ့ ကို မ ယုံ ကြည် ကြ သော ကြောင့် ဒု စ ရိုက် အ ပြစ် ကို ဖော် ပြ မည်။” ဟူသည့်အချက်သည် ထူးခြားပါသည်။ သခင်ယေရှုက ခမည်းတော်ဘုရားသခင်ကို မယုံကြည်သောကြောင့်လို့ မမိန့်ဘဲ “ငါ့ကို” မယုံသောကြောင့် သန့်ရှင်းသော ဝိညာဉ်တော်ဘုရားက ဒုစရိုက်အပြစ်ကို ဖော်ပြပေးလိမ့်မည်ဟု မိန့်တော်မူခဲ့ပါသည်။ အဘယ့်ကြောင့်နည်း။ သခင်ယေရှု၏ တပည့်တော်များနှင့် နောက်လိုက်များသည် ဂျူးလူမျိုးအများစုဖြစ်ပေသည်။ ဂျူးလူမျိုးတို့သည် “ယေဟောဝါ” ထာဝရဘုရားကို ကိုးကွယ်နှင့်ပြီးသူများဖြစ်ပေသည်။ သို့သော် သူတို့သည် သခင်ယေရှုသည် ကောင်းကင်မှ ဆင်းကြွလာသောသူဖြစ်သည်ကိုတော့ မယုံကြည်ကြချေ။ သခင်ယေရှုနောက်ကြွလာမည့်သူသည် တမန်တော် မုဟမ္မဒ်ဖြစ်သည်ဟုယုံကြည်နေကြသော မွတ်စလင်ဓမ္မမိတ်ဆွေများအနေနဲ့ စဉ်းစားကြည့်သင့်အရာက မိတ်ဆွေတို့၏ တမန်တော် မုဟမ္မဒ်သည် ဘယ်သူ့ကို ယုံကြည်ဖို့ဟောခဲ့ပါသနည်း။ အလ္လာဟ်ကိုလော၊ သခင်ယေရှုကိုလော။ အကယ်၍ အလ္လာဟ်သျှင်မြတ် ဟု သင့်စိတ်ထဲက ဖြေနှင့်ပြီးလျှင် ထို ဥပဇ္ဈာယ်ဆရာ တည်းဟူသော ကူညီမစမည့်သူသည် မိတ်ဆွေတို့၏ တမန်တော် မုဟမ္မဒ် မဖြစ်နိုင်ပေ။ အဘယ့်ကြောင့်ဆိုသော် ထိုသူသည် သခင်ယေရှုဘုရားကို ယုံကြည်လက်ခံဖို့ရန်နှင့် မယုံကြည်ပါက ဒုစရိုက်အပြစ်ကို ဖော်ပြပေးမည်ဖြစ်ကြောင်း သခင်ယေရှုကိုယ်တော်တိုင် မိန့်တော်မူခဲ့သောကြောင့်တည်း။
ဆက်လက်၍ သခင်ယေရှုမိန့်တော်မူသော သန့်ရှင်းသောဝိညာဉ်တော်၏ လုပ်ဆောင်ချက်တချို့ကို လေ့လာကြည့်ကြရအောင်။
“သင် တို့ အား ငါ ပြော စရာ များစွာ ရှိ သေး သော်လည်း သင် တို့ သည် ယခု မ ခံယူ နိုင် ကြ။ သို့ရာတွင် သမ္မာတရား ၏ ဝိညာဉ် တော် ရောက်လာ သောအခါ သမ္မာတရား အလုံးစုံ ထဲသို့ သင် တို့ ကို လမ်းပြ ပို့ဆောင် တော်မူ လိမ့်မည်။ အကြောင်းမူကား ထို ဝိညာဉ် တော် သည် မိမိ ဆန္ဒ အလျောက် မြွက်ဆို တော် မ မူ ဘဲ ကြား ရ သမျှ တို့ ကို မြွက်ဆို တော်မူ ၍ နောင် ဖြစ်လာ မည့် အရာ တို့ ကို သင် တို့ အား ဖော်ပြ တော်မူ လိမ့်မည်။ ထို အရှင် သည် ငါ နှင့်ဆိုင်သော အရာ ကို ယူ ၍ သင် တို့ အား ဖော်ပြ မည် ဖြစ် သောကြောင့် ငါ့ ဘုန်း ကို ထင်ရှား စေ မည်။ ခမည်းတော် ၌ ရှိ သော အရာ အားလုံး တို့ သည် ငါ နှင့်ဆိုင်သော အရာ ဖြစ် ၏။ ထို့ကြောင့် ဝိညာဉ် တော် သည် ငါ နှင့်ဆိုင်သော အရာ ကို ယူ ၍ သင် တို့ အား ဖော်ပြ မည် ဟု ငါ ဆို ခဲ့ ၏။” ~ သခင်ယေရှု (ရှင်ယောဟန်ခရစ်ဝင် ၁၆:၁၂-၁၅)
သခင်ယေရှုက “ထို အရှင် သည် ငါ နှင့်ဆိုင်သော အရာ ကို ယူ ၍ သင် တို့ အား ဖော်ပြ မည် ဖြစ် သောကြောင့် ငါ့ ဘုန်း ကို ထင်ရှား စေ မည် (He will glorify Me)” ဟု မိန့်တော်မူပါသည်။ ထိုအရှင်သည် အလ္လာဟ်၏ ဘုန်းကို ထင်ရှားစေမည်ဟု မမိန့်ခဲ့ပါ။ တမန်တော် မုဟမ္မဒ်သည် သခင်ယေရှုဘုန်းတော်ကို ထိုက်သင့်သည့်အတိုင်း ချီးမြောက်ဝန်ခံခဲ့ပါသလား။ Did Muhammad glorify Lord Jesus as he said that’s what The Comforter will do when He comes?
သခင်ယေရှုထပ်မိန့်တာက “ခမည်းတော် ၌ ရှိ သော အရာ အားလုံး တို့ သည် ငါ နှင့်ဆိုင်သော အရာ ဖြစ် ၏။ ထို့ကြောင့် ဝိညာဉ် တော် သည် ငါ နှင့်ဆိုင်သော အရာ ကို ယူ ၍ သင် တို့ အား ဖော်ပြ မည် ဟု ငါ ဆို ခဲ့ ၏။” ဟူ၍ဖြစ်ပါသည်။
မွတ်စလင်ဓမ္မမိတ်ဆွေတို့ကို စာရေးသူမေးချင်သည့်အရာမှာ အလ္လာဟ်သည် စကြဝဠာမိုးမြေအရာခပ်သိမ်းကို ပိုင်သအုပ်စိုးတော်မူပါသလော၊ အလ္လာဟ်သည် မိတ်ဆွေတို့ရဲ့ တမန်တော် မုဟမ္မဒ်၏ ခန္ဓာနှင့်အသက်ဝိညာဉ်ကိုရော ပိုင်ဆိုင်ပါ၏လော။
ပိုင်ဆိုင်သည်ဟု သင် ယုံကြည်လျှင် ယခုသခင်ယေရှု အတိအလင်းဖော်ပြနေသည်မှာ “ထာဝရဘုရားသခင်၌ ရှိသောအရာအားလုံးတို့သည် ငါနှင့်ဆိုင်သောအရာဖြစ်၏” ဟူ၍ဖြစ်ပါသည်။ “All things that the Father has are Mine.”
ထို့ကြောင့် သခင်ယေရှုသည် စကြဝဠာမိုးမြေအရာခပ်သိမ်းကို ပိုင်သအုပ်စိုးတော်မူပါသည်၊ သခင်ယေရှုသည် မိတ်ဆွေတို့ရဲ့ တမန်တော် မုဟမ္မဒ်၏ ခန္ဓာနှင့်အသက်ဝိညာဉ်ကိုလည်း ပိုင်ဆိုင်တော်မူပါသည်။ အဘယ့်ကြောင့်ဆိုသော် သခင်ယေရှုနောက်ကြွလာမည့်သူသည် တမန်တော် မုဟမ္မဒ်ဖြစ်ကြောင်း ခရစ်ယာန်တို့ရဲ့အရှင်သခင်ယေရှု ကိုယ်တော်တိုင်က ကြိုတင်ဟောပြောခဲ့သောကြောင့်ဖြစ်သည်ဟု သင်တို့ အခိုင်အမာဆိုနေသောကြောင့်ပင် ဖြစ်ပါသည်။ ထို့ကြောင့် သခင်ယေရှုခရစ်တော်ကို ဘုရားသခင်အဖြစ် ငြင်းပယ်သော အသင်တို့၏ နောင်တမလွန်ဘဝရေးသည် စိုးရိမ်စရာရှိနေပါသည်။
နိဂုံး
~~~
နိဂိုးချုပ်ရသော် ခရစ်ယာန်ညီကိုမောင်နှမများကိုဝေမျှလိုသည့်အရာမှာ မွတ်စလင်များအနေဖြင့် သခင်ယေရှုနောက်ကြွလာမည့် “ဥပဇ္ဈာယ်ဆရာ” ဆိုသူမှာ တမန်တော် မုဟမ္မဒ် (မိုဟာမက်) ဖြစ်သည်ဟု အခိုင်အမာပြောဆိုရခြင်း အကြောင်းရင်းခံမှာ Zaik Naik တို့ကဲ့သို့ အစ္စလာမ်မစ်အစွန်းရောက်များ၏ ဝါဒမှိုင်းမိ၍ အမှန်တရားကို မရှာဖွေ၊ မလေ့လာသောကြောင့်သာဖြစ်ပါသည်။ ထိုသို့ အခိုင်အမာပြောဆိုခြင်းဖြင့် ခရစ်ယာန်တို့ကိုးကွယ်ဆည်းကပ်ရာ သခင်ယေရှုကိုယ်တော်တိုင်ပင် ခရစ်ယာန်တို့ယုံကြည်သော သမ္မာကျမ်းစာတော်မြတ်၌ပင် ၎င်းတို့၏ တမန်တော် မုဟမ္မဒ်အကြောင်း ကြိုတင်ပရောဖက်ပြုထားသည်ဟု ပရိယာယ်သုံး၍ လှည့်ဖြားကာ ၎င်းတို့၏ အစ္စလာမ်ဘာသာသည် ခရစ်ယာန်ဘာသာထက်ပိုကြီးမြတ်ကြောင်း ဖော်ပြလိုခြင်းကြောင့်ဖြစ်သည်။ ၎င်းတို့၏ တမန်တော် မုဟမ္မဒ်သည် ကျွန်ုပ်တို့၏ ခရစ်တော်သခင် ယေရှုရှင်ထက် ပိုကြီးမြတ်ကြောင်း ပြသလိုစိတ်ပြင်းထန်နေသောကြောင့်ဖြစ်သည်။ သို့သော်လည်း အမှန်တရားကို နှစ်သက်မြတ်နိုးသော ယုံကြည်သူခရစ်ယာန်များအနေဖြင့် ၎င်းတို့၏ မှန်ကန်မှုမရှိသောအခိုင်အမာပြောဆိုချက်များကို စာရေးသူဖော်ပြပေးခဲ့သည့် အထက်ပါ အချက်အလက်များတချက်ခြင်းစီအသုံးပြု၍ လွယ်ကူစွာချေပနိုင်မည်ဖြစ်ကာ ၎င်းတို့အား သခင်ခရစ်တော်ထံပါးသို့ ပြောင်းလဲစေနိုင်မည်ဟု မျှော်လင့်စရာရှိပါသည်။ ထို့ကြောင့် ခရစ်ယာန်သမ္မာကျမ်းစာအရသော်လည်းကောင်း၊ အစ္စလာမ် ကုရ်အာန်ကျမ်းအရသော်လည်းကောင်း၊ ယုတ္တိကျစွာ ဆင်ခြင်စဉ်းစားကြည့်လျှင်သော်လည်းကောင်း သခင်ယေရှုနောက်ကြွလာမည့် “ဥပဇ္ဈာယ်ဆရာ” ဆိုသူမှာ တမန်တော် မုဟမ္မဒ် (မိုဟာမက်) လုံးဝ မဟုတ်ပါချေ။ မွတ်စလင်တို့ လိုရာစွဲ၍ယူသုံးသော ရှင်ယောဟန်ခရစ်ဝင်ကျမ်း ၁၄၊ ၁၅၊ ၁၆ ရှိ သခင်ယေရှုနောက် ကြွလာတော်မူမည့် ကူညီမစသူ ဥပဇ္စျာယ်ဆရာအား။ ။
(၁) သခင်ယေရှုဘုရားက စေလွှတ်ပါသည်။ အလ္လာဟ် မဟုတ်ပါ။
(၂) ထိုအရှင်သည် ခမည်းတော်ထံတော်မှ (From The Father) ကြွဆင်းလာသူဖြစ်သည်။ အလ္လာဟ်ထံမှ မဟုတ်ပါ။
(၃) ထိုအရှင်သည် သခင်ယေရှုကို မယုံကြည်သောကြောင့် မယုံကြည်သည့် ဒုစရိုက်အပြစ်ကို ဖော်ပြပေးမည်ဖြစ်ပါသည်။ အလ္လာဟ်ကို မယုံကြည်သောကြောင့် မဟုတ်ပါ။
(၄) ထိုအရှင်သည် သခင်ယေရှု၏ ဘုန်းကို ထင်ရှားစေမည့်သူဖြစ်ပါသည်။ အလ္လာဟ်၏ ဘုန်း မဟုတ်ပါ။
(၅) ထိုအရှင်သည် ခမည်းတော်နှင့်သော်လည်းကောင်း၊ သားတော်ယေရှုဘုရားနှင့်သော်လည်းကောင်း စပ်ဆိုင်သောအရာများကို ဖော်ပြမည် ဖြစ်ပါသည်။ အလ္လာဟ်နှင့် စပ်ဆိုင်သောအရာကို ဖော်ပြမည် မဟုတ်ပါ။
(၆) ထိုအရှင်သည် သန့်ရှင်းသောဝိညာဉ်တော်ဘုရားဖြစ်ပါသည်။ တမန်တော် မုဟမ္မဒ် မဟုတ်ပါ။
ထို့အပြင် မွတ်စလင်ဓမ္မမိတ်ဆွေများသည် ခရစ်ယာန်သမ္မာကျမ်းစာအား မူရင်းပျောက်ပြယ်အောင် ပြင်ဆင်ထားခြင်းခံရသည် (They say Bible is corrupted) ဟု မကြာခဏ စွပ်စွဲပြောဆိုလေ့ရှိသော်လည်း ထိုကျမ်းစာကိုပဲ ယခုကိုးကား၍ ၎င်းတို့၏ တမန်တော်အကြောင်းကို သခင်ယေရှုကိုယ်တိုင်ကြိုပြောခဲ့သည်ဟု ပြောဆိုခြင်းမှာ ကျိုးကြောင်းညီညွတ်မှုလုံးဝ မရှိပေ။ မည်သို့ပင် ဆိုစေကာမူ ထာဝရဘုရား၏သမ္မာကျမ်းစာသည် မူရင်းပျောက်ပြယ်အောင် ပြင်ဆင်ထားခြင်းခံရသည်ဟူသည့် မွတ်စလင်ဓမ္မမိတ်ဆွေများ၏စွပ်စွဲချက်မှာ မဟုတ်မှန်ကြောင်း နောင်ထွက်ရှိမည့် စာတမ်းတွင် အသေးစိတ်ဖော်ပြပေးသွားပါမည်။ နောက်ဆုံးအနေဖြင့် မိစ္ဆာပရောဖက်များနှင့် ပတ်သက်၍ သခင်ယေရှု ကြိုတင်ဟောပြောချက်ဖြင့် အဆုံးသတ်လိုပါသည်။
“အတွင်း၌ ကြမ်းတမ်းသော တောခွေးဖြစ်လျက် သိုးရေကိုခြုံ၍ သင်တို့ရှိရာသို့လာသော မိစ္ဆာပရောဖက်တို့ကို သတိနှင့် ရှောင်ကြလော့။-
ထိုသူတို့၏အကျင့်ကို ထောက်၍ သူတို့၏သဘောကို သိကြလိမ့်မည်။ ဆူးပင်၌ စပျစ်သီးကို ဆွတ်တတ်သလော။ ဆူးလေပင်၌ သင်္ဘောသဖန်းသီးကို ဆွတ်တတ်သလော။
– ကောင်းသောအပင်သည် ကောင်းသောအသီး၊ မကောင်းသောအပင်သည် မကောင်းသောအသီးကို သီးတတ်၏။
– ကောင်းသောအပင်သည် မကောင်းသောအသီး၊ မကောင်းသောအပင်သည် ကောင်းသောအသီးကို မသီးနိုင်။
– ကောင်းသောအသီး မသီးသော အပင်ရှိသမျှတို့ကို ခုတ်လှဲ၍ မီးထဲသို့ ချလိုက်တတ်၏။
– သို့ဖြစ်လျှင် ထိုပရောဖက်တို့၏ အကျင့်ကိုထောက်သော် သူတို့၏ သဘောကို သိရကြလိမ့်မည်”
~ သခင်ယေရှု (ရှင်မဿဲခရစ်ဝင်ကျမ်း ၇:၁၅-၂၀)
ခမည်းတော်၊ သားတော်၊ သန့်ရှင်းသောဝိညာဉ်တော်၏ နာမတော်မြတ်၌။ အာမင်။
ကိုးကားကျမ်းဂန်၊ စာအုပ်များနှင့် ဆောင်းပါးများ
~~~~~~~~~~~~~~~~~~~~~~~~~~~~~
- သမ္မာကျမ်းစာ (ဆရာကြီးယုဒသန်ဘာသာပြန်ကျမ်း နှင့် မြန်မာ့စံမီသမ္မာကျမ်း)
- Holy Bible in English (New King James Version)
- မြန်မာ ကုရ်အာန် ဗားရှင်းများ (သီရိပျံချီ ဃာဇီမိုဟာမက်ဟာရှင်မ် နှင့်အဖွဲ့၊ သီရိပျံချီ ဦးဘစိန်)
- Quran in English (Saheeh International, M. Pickthall)
- Arabic Dictionary (LEXILOGOS – Word and wonders of the world) [https://www.lexilogos.com/english/arabic_dictionary.htm]
- “Ruh” Meaning of Arabic Word (رُوحٌ) – Lingea Dictionary [https://www.dict.com/arabic-english/spirit]
- “Wahyi” Meaning of Arabic Word (وحي) – English-Arabic Reverso Dictionary [https://context.reverso.net/translation/english-arabic/revelation]
- Zakir Naik (Wikipedia) [https://en.wikipedia.org/wiki/Zakir_Naik]
- RED CORNER NOTICE AGAINST ZAKIR NAIK (Ministry of Home Affairs | India) [https://www.mha.gov.in/MHA1/Par2017/pdfs/par2018-pdfs/rs-25072018-English/884.pdf]
- Singapore bans two Muslim preachers, citing divisive views (Arab News) [https://www.arabnews.com/node/1185591/world]
- Updates on Cases Under the Internal Security Act (Ministry of Home Affairs | Singapore) [https://www.mha.gov.sg/mediaroom/press-releases/detention-of-singaporean-youth/#:~:text=%5B1%5D%20Naik%2C%20an%20Islamic,(over%20Muslims)%20in%20elections.]
- Tribunal confirms MHA ban on Zakir Naik’s foundation [https://economictimes.indiatimes.com/news/india/tribunal-confirms-mha-ban-on-zakir-naiks-foundation/articleshow/90577739.cms?from=mdr]
ယခုဆောင်းပါးသည် မူရင်းစာရေးသူ ဆရာ John The Beloved နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။